भजनसंहिता 62

परमेस्वर च एकठिया सरन को जघा

मुखिया बजानवालागिन को लायी दाऊद को भजन यदूतून को राग मा

1सहीमा मी धीर धरके परमेस्वर को कन मन लगयो सेव,

मोरो उध्दार वोको च लक होवासेत।

2सहीमा वोच, मोरो चट्टान अखिन मोरो उध्दार आय,

उ मोरो किला आय मी जादा नही डिगहुन।

3तुम कबा तकन एक अदमी पर धावा करतो रव्हने,

का सबरी मिलके वोला मार डाकने?

वोय त नवो हुयो भीट या

पड़तो हुया रुधान को जसो सेत।

4सहीमा वोय वोला, वोको ऊँचो पद लक पाड़न को सला करासेत;

वोय झूठ लक खूस रव्हासेत। वय तो तोन्ड लक आसीरवाद देवासेत पर मन लक सराप देवासेत।

5ओ मोरी मन, परमेस्वर को समोर सुक- सान्ती लक रव्ह,

काहेकि मोरो आसा वोको लक च से।

6सहीमा वोच मोरो चट्टान, अखिन मोरो उध्दार आय,

उ मोरो किला आय एकोलायी मी नही डिगहुन

7मोरो मोक्स अखिन मोरो महीमा को अधार परमेस्वर आय;

मोरो मजबूत चट्टान, अखिन मोरो सरन को जघा परमेस्वर आय।

8ओ लोखहीन, सबच बेरा वोको मा भरोसा ठेवो,

वोको लक आपरो मन को गोस्टि खोलके कव्हजोस;

परमेस्वर आमरो सरन को जघा आय।

9सदारन लोख छीन भर काजी, अखिन मोठो लोख झुठ्ठो च से,

तवल मा वोय हलका हिटा सेत;

वोय सब को सब सास लक भी हलका सेत।

10अन्धेर करनो मा

भरोसा नोको ठेवजोस,

अखिन लूट पाट पर मत फूलो, चाहे धन संपति बढे,

तबा भी वोको मा मन नोको लगावजोस।

11परमेस्वर न एक गन कह्यो;

अखिन दोन बार मी ना यो आयकयो,

का ताकत परमेस्वर को आय,

12अखिन ओ पिरभू, करूना भी तोरो च आय।

काहेकि तू एक-एक जन ला उनको

काम को अनुसार फर देवासे।1