भजनसंहिता 20

बिजय को लाय पिराथना

परधान बजानवारो को लाय दाऊद को भजन

1मुसीबत को दिवस यहोवा तोरी आयक ले।

याकूब को परमेस्वर को नाव

तोला उच्चो जाघा मा ठयरायो रव्हे।

2उ पवीतर जाघा लक तोरी मदद करहे,

अखिन सिय्योन लक तोला सम्भाल ले।

3वय तोरी सबरी भेटहीन ला हेत करहे;

वय तोरी होम बली ला गिरहन करहे।

4उ तोरो मन की इच्छा ला पूरो करेत,

अखिन तोरी सबरी जुक्ति ला सुफल करहे।

5तब आमी तोरी उध्दार को कारन मा जय जयकार करके

खुसी लक गावबिन,

आमी आपरो परमेस्वर को नाव को झंडा उभो करबीन।

यहोवा तोला टोंड को माँगयो बरदान देहे।

6अब मी जान गयो कि पिरभू

आपरो निवाड़ो हुयो राजा को मोक्स करहे ;

उ आपरो उज्जो भुजा को उध्दार करन वालो

ताकत लक आपरो पवीतर सरग लक

आयक के जवाब देहेत।

7कोनि ला रथ

अखिन कोनि ला घोड़ो मा भरोसा से,

पर आमी ला तो आपरो परमेस्वर यहोवा मा भरोसा से।

8वय तो नव गयीन अखिन पड़ गयीन:

अना अमी उभो अना सरको उभोसेन।

9हे यहोवा, बचाय लेव; जोन दिवस आमी हकलयो,

तो माहाराजा आमी ला जवाब देहे।