Powari Standard Project
भजनसंहिता 119
परमेस्वर को कानून
आलेफ
धन्य सेत वय लोख जोन निरदोस , आपरो चाल मा खरो सेत।
जोन पिरभू को कानून को अनुसार चलासेत।
धन्य सेत वय लोख जोन वोको हुकूम अना नियम मा चलासेत,
अना पूरो मन लक वोला खोजसेत।
मंग वय बेकार को काम नही करासेत।
वय वोको मारग मा चलासेत।
ओ पिरभू तू ना आपरो नियम एकोलाय दियो सेस
का वय जतन लक मानयो जाहेत।
भला होतयो का तोरो नियम मानन को लाय
मोरो चाल चलन मजबूत भयी जाय।
तबा मी तोरो सप्पा हुकुम गिन कन आपरो चित लगायो रव्हू
तबा मोला सरमिन्दा न पड़े।
जब मी तोरो न्यायीपन को नियम ला सीकहीन,
तबा तोरो धन्यवाद सीदो मन लक करहीन।
मी तोरी नियम गिनला मानहू
मोला पूरो रीत लक नोको तज।
परमेस्वर को कानून ला माननो
जुवान लोक आपरो जिन्दगी कसो सुद्ध राख सकासेत?
तोरो हुकुम को पालन करके।
मी पूरो मन लक तोरो सेवा करन को जतन करासू,
मोला आपरो आदेस ला नही माननो लक रोख।
मी तोरो नियम ला आपरो दिल मा राखासू का
तोरो बिरोध मा पाप नोको करू।
ओ धन्य परमेस्वर! मी तोरो लक अरज करासू
का मोला आपरो बिधि सीकाव।
मी तोरो लक दियो सप्पा नियम गिनला
उच्चो अवाज मा दोहराहिन।
मोला बेजा धन दवलत लक लगत
तोरो हुकुम माननो लक खुसी भेटासे।
मी तोरो निरदेस ला वाचत रव्हासू,
मी तोरो सिक्सा गिनला परखासू।
मी तोरो नियमगिन लक खुस सेऊ,
मी तोरो हुकुम ला नही बिसरू।
पिरभू को कानून मा खुसी
गिमेल
आपरो दास पर उपकार कर का मि जिन्दो रव्हु,
अखिन तोरो बचन मा चलतो रव्हु।
मोरो डोरा उघाड़ दे,
का मी तोरी कानून को अचरज भरयो
सच्चाई गिनला चोव सकहु।
मी इता कन धरती मा बस जरासो बेरा को लाय परदेसी सेऊ,
आपरो हुकुम मोरो लक नोको लुकाय।
मोरो मन लालसा लक दुखासे।
मी हरेक बेरा दुखित होय तोरो फयसला ला जाननो चाव्हासेऊ।
तू घमन्डी गिनला डटकारासेत,
सिरापित सेत वय जोन तोरो हुकुम गिनला तोड़ासेत।
मोला उनको बेइज्जती अना दुरियानो लक दुहुर कर
काहेका मी ना तोरो हुकुम ला मानयो से।
अना अधिकारी हुन एकमेक लक मिलके मोरो बिरोध मा साजीस करासेत,
पर मी तोरो ला बिधि सीकहीन।
तोरी उपदेस मोला खूसी देवासेत,
वो मोला सला देवासेत।
पीरभू को कानून ला पालन करन को पक्को इरादा
दाल्थ
मी धूल्लो मा पड़यो सेऊ,
तू आपरो बचन को अनुसार
मोला जिन्दो कर!
मी ना तोरो लक आपरो
चाल-चलन को बखान करयो सेऊ,
अखीन तूना मोरी गोस्टी मान लियो से,
तू मोला आपरो नियम सिकाव!
आपरो नियम गिनको समझन ला मोला सांग,
तबा मी तोरो अचरज को काम पर धियान करहीन।
मोरो जीव उदासी को कारन लक दुख रह्यो से,
तू आपरो बचन को अनुसार मोला ताकत दे!
मोला खोट को मारग लक दूहूर कर
अना करूना करके मोला आपरो नियम मोला सिकाव।
मी ना सच्चाई लक रव्हनो बेच लियो सेऊ,
मीना आपरो फयसला पर धियान दियो से।
ओ पिरभू! मी तोरो नियम मा पक्को सेऊ,
मोला नोको लजान दे।
मी तोरो हुकुम गिनला मानके वोको मारग मा धावासू
काहेका तूना मोरी समज ला बढायो से।
समज को लाय पिराथना
हे
ओ परमेस्वर! मोला आपरो नेम गिनको मारग ला चोवाय,
तबा मी वोला आखीर तकन धरयो रव्हु।
मोला समज दे ,तबा मी तोरो कानून ला
मोरो दिल मा धरयो रव्हु,
अना वोमा मन लगाय के चलहीन।
मोला आपरो हुकुम गिनको मारग मा चलाय,
काहेका मी वोको च लक खुस रव्हासू।
मेरे मन को सुवारत कन नोको
पर आपरो नियम विधान गिन कर लवटा देय। न त आपरो लय स्वारत को कन नोको फेरस।
मोरो डोरा गिनला बेकार को चीज को मारग हुन लक घुमाय देय,
आपरो बचन को अनुसार मोरो पिरान को रक्सा कर।
जोन सेवक तोरो हुकुम ला मानासे,
उन सेवक हुनला जोन बचन तूना दियो से वोला पूरो कर।
जोन बेइज्जति लक मोला भेव से उनला दूहूर कर,
काहेका तोरो नियम लगत साजरो सेत।
मी तोरी हुकुम ला माननो चाव्हासेऊ, मोला नवतो जिन्दगी देव, काहेका तू न्यायी सेस।
पिरभू को कानून पर भरोसा राखनो
वाव
ओ पिरभू! तोरो किरपा अना तोरो करायो उद्दार,
तोरो बचन को हिसाब मा भी मिल्हेत।
तबा जोन मोरो बेइज्जती करासेत,
उनला मी जवाब देय सकीन,
काहेका मोला तोरो बचन मा भरोसा सेत।
मोरो टोंड लक आपरो सही बचन कव्हनो मा नोको हिसक 1
काहेका तोरो नियम मा मोरो आस सेत।
तबा मी तोरो कानून मा लगातार चलतो रहीन।
मी पूरो अजाद रव्हू, काहेका
मी तोरो सिक्सा गिनला मानन को पूरो कोसीस करासू।
मी तोरो हुकुम गिनला राजा गिनला आयकवाहू,
अना मोला लाज नही लगहेत।
मोला तोरो हुकुम मानन लक खुसी भेटासेत,
काहेका मी उनको लक माया राखासू।
मी तोरो पिरेम लक आदर अना माया करासू
मी तोरो हुकूम बिधि मा धियान धरहीन।
पिरभू को कानून मा बिस्वास
जोन
अपरो दास, मजे मोरो लक दियो हुयो
आपरो बचन ला हेत कर,
वोना मोला आस दियो से।
एतरो तकन का मोला दूखमा भी सान्ति भेटयो
काहेका तोरो बचन मोला जिन्दगी देवासेत।
गरबिला मानूस हरमेसा मोरो मजाक उड़ायोसे।
मंग मी तोरो नियम कानून लक नही हटयो।
ओ पिरभू! मी तोरो लगत पहेले को फयसला गिनला हेत करासू,
अना उनको लक मोला सान्ती भेटासे।
जब मी दुस्ट ला तोरो कानून ला तोड़तो चोवासू
ता गुस्सा लक भर जावासू।
अपरो जरासो जिन्दगी को बेरा
तोरो बिधि गीनको बारेमा गाना लिखासू।
ओ पिरभू, रातला मी तोला हेत करतो रव्हासू,
अना तोरो नियम कानून बारेमा सोचासू।
मोला तोरो हुकूम मानन लक मोला खूसी भेटासेत।
पिरभू को कानून को लाय खुदला देवनो
ओ परमेस्वर जोन मी चाव्हासू उ सब तू च आस।
मी तोरो बचन को अनुसार चलन को वादा करासू।
मी पूरो मन लक तोरो लक बिनती करासू,
का तू मोरो पर दया कर जसो तूना वादा करयो से।
मीना आपरो आचरन मा बिचार करयो सेऊ,
अना मी तोरो निरदेस नियम ला पालन करन को वादा करासू।
मी बिना उसीर को तोरो
हुकुम मानन को लाय तैय्यार सेऊ।
दुस्ट गिनना मोरो लाय जाल बिछायो से,
पर मी तोरो नियम कानून ला नही बिसरू।
अरधो राति ला मी जाग के तोरो न्यायी फयसला
को कारन मी तोरो स्तुति करासू।
मी उन सप्पा को मीत सेऊ
जोन तोरो सेवा करासेत।
अना उन सबरी लोक हुन को
जोन तोरो नियम ला पालन करासेत।
ओ पिरभू, धरती तोरो लगातार करूना पिरेम लक भरयो सेत,
मोला आपरो बिधि सिकाव!
पिरभू को कानून को किमत
ओ यहोवा, तू ना आपरो बचन को अनुसार
आपरो दास को संग भलाई कियो से।
मोला भलो अक्कल-ताकत अना गियान दे,
काहेकि मी ना तोरो हुकुम पर,
भरोसा कियो से।
वोको लक पहले का मि दुखी भयो,
मी हिन्डत होतो।
पर अबा मी तोरो बचन ला मानासू।
तू भलो आस, अना भलो भी करासेत।
मोला आपरो बिधि गिनला सिकाव।
घमन्डी गिन ना ता मोरो बिरोध खोटो गोस्टि गढयो से,
पर मी तोरो उपदेस गिनको पूरो मन लक
धरयो रव्हिन।
उनको मन मोटा2 भयी गयो से,
पर मी तोरो कानून को कारन सूकी सेऊ।
मोला जोन दुख हुयो उ मोरो लाय,
भलो च हुयो से,
जोन लक मी तोरो बिधि गिनला सीक सकू।
तोरो दियो गयो कानून मोरो लाय
हजारो रुपिया अना सिक्का लक साजरो से।
पिरभू को बेवस्ता को नियाव
तू ना मोला बनायो से,
अना तू च मोरि रक्सा करासेत मोला समज देय,
का मी तोरो नेम सीक सकू।
जोन तोरो मान अना भेव करासेत, वय मोला चोवके खुस होहेत,
काहेका मी ना तोरो बचन पर भरोसा राखयो सेऊ।
ओ पिरभू मी जानासू का तोरो फयसला न्यायीपन से।
अना तूना मोला आपरो सच्चाई को अनुसार मोला दुख दियो से।
तोरो लगातार पिरेम मोला सान्ति देय,
जसो का तूना मोरो लक,
आपरो सेवक लक वादा कियो से।
मोरो पर दया कर, अना मी जिन्दो रव्हिन।
काहेका मी तोरो कानून लक खुस सेऊ।
घमन्डी गिनला मोरो पर खोटो दोस लगावन,
को कारन लजानो पड़ेत।
जहाँन तकन मोरो गोस्टि से,
मी तोरो निरदेस हुन पर धियान करहीन।
जोन तोरो भेव अना मान करहेत,वय सबा मोरो कन आहेत,
मजे जोन तोरो हुकुम ला जानासेत।
का मी तोरो बिधि गिनला पूरो खराई लक पालन कर सकासू,
अना हार अना सरम लक बच सकासू।
सुड़ावनो को लाय एक पिराथना
काफ
मोरो पिरान तोरो सूटकारा को लाय बेचैन से,
पर मोला तोरो बचन पर आस रव्हासे।
मोरो डोरा तोरो बचन पूरो होवन को ,
रास्ता चोवत-चोवत धुंधरो पड़ गयो सेत,
अखीन मी कव्हासु का “तू
मोला कबा सान्ति देहेत”?
काहेका मी धुँगा मा कि कुप्पी,
को जसो भयी गयो सेऊ,
तबा भी तोरो बिधि गिनला नही बिसारो।
तोरो दास को कितरो दिवस रव्ह गयो सेत?
तू मोरो मघा पड़यो हुओ ला कबा सजा देहेत?
घमन्डी जोन तोरो कानून को अनुसार नही चलासेत,
गरबिला जो तेरी बेवस्था के अनुसार नही चलसेत,
उन ना मोरो लाय कबर खोन्दयो सेत।
तोरो सबरी हुकुम भरोसा कबील सेत।
वय लोख खोटा सांगतो हुयो मोरो मंघा, मोला परेसान कर सेत
पड़यो सेत, तू मोरो मदद कर!
वय मोला धरती मा लक मोला मार डाकी होतिन,
पर मी ना तोरो उपदेस गिनला नही सोड़यो।
अपरो लगातार करूना को कारन मोरो पर भलाई कर,
जेको मा तोरो टोंड का नियम गिनको पालन कर सकू।
पिरभू को कानून मा भरोसा
लामेध
ओ पिरभू! तोरो बचन हरामेसा कायम रव्हेत,
यो सरग मा अमर से।
तोरो सच्चाई जुग-जुग तकन कायम रहेत,
तू ना धरती ला वोको जघा मा राख दियो से,
अना उ बनयो हुयो से।
तोरो हुकुम लक सब जूनुस गिन,
अज तकन बनयो हुयो सेत,
काहेका वय सबरी तोरो दास सेत।
अदि तोरो विधि मोरो खुसी को कारन नही होतो,
तोमी दूखहुन लक मर गयो होतो।
मी तोरो उपदेसहुन ला कभ्भु नही दुरियाहु,
काहेका उनको च लक तूना मोला जिन्दो राखयो से।
मी तोरो सेऊ, मोला बचाव!
मीना तोरो हुकुम पालन करन को कोसीस करयो से।
दुस्ट मोला मार डाकन को मौका मा सेत।
पर मी तोरो नियमगिन पर धियान करहून।
मीना सिकयो सेऊ, हरेक चीज को हद होवासेत।
पर तोरो हुकुम साजरो से।
पिरभू को बेवस्था लक पिरेम
मीम
मी तोरो विधि लक कितरो पिरेम राखासू!
मी दिवस भर एको बारेमा सोचासू!
तोरो हुकुम हरेक बेरा, मोरो संग रव्हासे,
अखिन मोला मोरो बयरी गिनलक जादा अक्कलवर बनावासे।
मी आपरो सबरी गुरूजी गिनलक जादा समजासू,
काहेका मी तोरो नियम गिन पर धियान करासू।
मोरोमा बुड़गा गिनलक जादा अक्कल से,
काहेका मी तोरो हुकुम गिन को पालन करासू।
मी सब बूरो चाल-चलन लक दूहूर रह्यो,
काहेका मी तोरो बचन पालन करनो चाव्हासू।
मीना तोरो उपदेस गिन ला नही दुरियावो सेऊ,
काहेका तु च मोरो गुरू आस।
तोरो उपदेस हुन को सुवाद कितरो मिठ्ठो से,
सहेद लक भी जादा मिठ्ठो!
तोरो उपदेस गिनको कारन मी
समजदार हो य जावासू,
एकोलाय मी सबरी खोटो मारग लक बयर राखासू।
परमेस्वर को बेवस्था को परकास
नून
तोरो बचन मोरो पाय को लाय दियो,
अना मोरो मारग को लाय उजाड़ से।
मी ना किरिया खायो अना ठान लियो सेऊ,
का मी तोरो नेकी नियमगिन को अनुसार चलहीन।
मी लगत दूख मा पड़यो सेऊ,
ओ यहोवा, आपरो बचन को अनुसार मोला जिन्दो कर।
ओ यहोवा मोरो बचन हुनला,
खुद को इक्सा बली जानके अपनाव,
अना आपरो नियम हुनला मोला सिकाव।
मोरो पिरान लगातार मोरो अन्जुर पर से,
तबा भी मी तोरो विधि ला नही बिसरि सेऊ।
दुस्टगिन ना मोरो लाय फांदा लगायो से,
पर मी तोरो उपदेस गिन मो मारग लक नही भटकयो।
मी ना तोरो नियम चितावनो ला हरामेसा को लाय,
अपरो खुदको हिस्सा कर लियो सेऊ,
काहेका वय मोरो खूसी को कारन सेत।
मीना आपरो मन ला यो गोस्टि मा लगायो सेऊ,
का आखीर तकन तोरी बिधि गिन पर मरतो दम तक हरामेसा चलतो रव्हिन।
परमेस्वर को नियम मा सुरक्सा
सामेख
ओ यहोवा, जोन पूरो तरीका लक तोरो लाय सच्चो नहात असो लोक हुन लक मोला घिरनासे।
मोला तोरो नियम गिन चहेतो लगासेत।
तू मोरी आड़ अखीन ढाल आस,
मी तोरो बचन को आस करासू।
ओ यहोवा, दुस्ट मानूस गिनला मोरो जवर नोको आवन दे।
मी आपरो परमेस्वर को हुकुम गिनको पालन करहीन।
हे यहोवा, मोला असोच सहारा दे जसो तूना बचन दियो अखीन मी जिन्दो रव्हिन।
मोला तोरो मा बिस्वास से, मोला बेआस नोको कर।
ओ यहोवा, मोला सहारे देय का मोरो उध्दार भयी जाय!
मी सदा तोरो बिधि गिनको वाचन करतो रव्हिन।
जोन मानूस तोरो नियम लक भटक जावासेत,
उनला तू धिक्कारा सेत,
काहेका उनकी चतुराई बेकार से।
ओ यहोवा, तू यो धरती मा दुस्ट गिनको संग असो बरताव करासेत जसो वय कचरा सेत।
एकोलाय मी तोरी करार लक सदा माया करहीन।
पिरभू, तोरो भेव लक मोरो तन कपासेत,
तोरी नियाव-सिद्दान्त लक मी डरासू।
परमेस्वर को कानून ला माननो
मीना वोच करयो जोन सही अना न्यायी से,
मोला मोरो बयरी गिनको लाय नोको सोड़।
वादा कर का तू आपरो सेवक को मदद करहेत,
घमन्डी गिनला मोरो पर नोको अन्धेर करन देय।
ओ यहोवा, तूना मोरो मुक्ति को एक न्यायी बचन दियो होतो,
पर आपरो मुक्ति ला मोरो डोरा तोरी रास्ता चोवत-चोवत थक गयी।
तू अपरो सच्चो माया मोरो पर परगट कर,मी तोरो दास सेऊ।
तू मोला आपरो बिधान को सिक्सा देय।
मी तोरो दास सेऊ।
आपरो करार ला वाचन अना बिचार करन मा तू मोरो सायता कर।
ओ यहोवा, योच बेरा से तोरो लाय का तू काही कर डाके।
लोख हुन ना तोरो विधि ला तोड़़यो सेत।
ओ यहोवा, चोखो सोन्नो लक भी जादा
मोला तोरी हुकुम चहेतो लगासेत।
तोरो सबरी हुकुम गिनला लगत सतरक होयके पालन करासू।
मी खोटो सिक्सा हुन लक घिरना करासू।
परमेस्वर को बेवस्था पर चलन को मनसा
पे
ओ यहोवा तोरी करार लगत अद्भुत से।
एकोलाय मी वोको पालन करासू।
तोरो लोख बचन ला समजनो कबा सूरू करहेत?
यो असो उजाड़ जसी से जोन उनला जिन्दगी को सच्चो मारग चोवासेत।
तोरो बचन मुरख ला भी अक्कलवर बनावासेत।
मोला तोरो बचन को तहान सेत, काहेका मी
तोरो बचन को इक्सा करासू।
ओ परमेस्वर, मोरो कन पिरेम कर अना मोरो पर दया कर।
तू उन लोख गिनको लाय असी साजरी काम कर जोन तोरो नाम लक माया करासेत।
जसो तूना वादा करयो सेत मोला पड़न लक बचाय,
मोला बूराई लक नोको हारन देव!
मोला उन लोख हुन लक बचा
जोन मोरो पर अन्धेर करासेत!
का मी तोरि हुकुम गिनला मान सकू!
आपरो हाजीर लक मोला आसीरवाद देय,
अना मोला आपरो नियम सिकाव!
मोरो आंसू नद्दी को जसो बोहासेत,
काहेका लोख तोरो विधि ला नही मानासेत।
परमेस्वर को कानून को नियाव
ओ यहोवा, तू न्यायी से,
अखीन तोरो नियम नियाव को सेत।
तूना जोन नियम सांगयो सेत,
वय सबरी भरोसा कबील अना न्यायी सेत।
मोरो गुस्सा मोरो मा स्तो को जसो बरासे,
काहेका मोरो बयरी तोरो हुकुम गिनला नही मानासेत।
तोरो नेम कितरो पक्को से!
मोला यो कितरो चहेतो लगासे।
मी बेकार अना घिरनित सेऊ,
पर तोरी सिक्सागिन ला नही टलासू,
तोरो न्यायीपन हरामेसा बनयो रव्हेत,
अना तोरो विधि हरामेसा सही से।
मी संकट अना चिन्ता लक भरयो हुयो सेऊ,
पर तोरो हुकुम गिन मोला खूसी देवासेत!
तोरो निरदेस नियम हरामेसा न्याय लक भरयो होवासेत।
मोला समज देव, ता मी जिन्दो रव्हीन।
सूटकारा को लाय पिराथना
पूरो मन लक यहोवा मी तोला हाकलासू,
मोला जवाब देय! मी तोरो बिधि हुनला मानासू।
ओ यहोवा, मोरो तोरो लक अरज से,
मोला बचा ले! मी तोरो करार ला मानहुँ।
यहोवा, मी तोरी पिराथना करन को लाय सक्करी पहेटिया उठासू।
मोला उन गोस्टि पर भरोसा से, जोनला तू कव्हासे।
रात मा लगत उसीर तकन तोरो बचनगिन
पर धियान करतो हुयो बसयो रव्हासू।
ओ यहोवा, तू आपरो पूरो माया लक मोरो आयक,
तोला जसो साजरो लगासे वसोच कर, अना मोरो जिन्दगी ला बनायो राख।
लोख मोरो बिरोध मा साजीस रचासेत।
ओ यहोवा, असो यो लोखहुन
तोरी विधि गिन पर नही चलासेत।
पर ओ पिरभू तू मोरो कठा सेत,
अना तोरी सबरी हुकुम गिन अटल सेत।
लगत पेहेले मोला तोरो निरदेसगिन, नियम को बारेमा पता चलयो होतो।
तूना उनला हरामेसा को लाय बनायो राखयो।
मदद को अरज
रेस
मोरो दुख ला डोरा लक चोव,अना मोरो सूटकारा कर,
काहेका मी ना तोरी विधि ला नही दुरियाओ सेऊ!
मोरो मुकदमा को रक्सा कर,
अना मोला अजाद कर
जसो तूना वादा कियो सेत मोला सुड़ा!
दुस्ट गिनको सूटकारा नही होहेत,
काहेका वय तोरो नियम गिनला नही मानासेत3।
ओ परमेस्वर तोरो करूना महान सेत,
अपरो दया चोवाय अना मोला बचाव!
मोरो लगत सो बयरी अना तगांन वालो सेत।
पर मी तोरो नियम गिन ला मान नो लक नही चुकयो सेऊ।
जब मी उन दगाबाज गिन कन चोवासू,
तो घिरना लक भर जावासू,काहेकि वय तोरो हुकुम गिनला नही मानासेत।
चोव,ओ पिरभू! मी तोरो उपदेस गिनलक कितरो माया करासू।
तोरो माया कभ्भू व नही बदलासे,एकोलाय मोला बचाव
तोरी बेवस्था को सार सही से,
अना तोरो सबा न्यायीपन फयसला सनातन सेत।
परमेस्वर को बेवस्था को लाय समरपन
अधिकारी बेकारमा मोरो मघा पड़यो सेत,
पर मोरो हिरदय तोरो बचनगिन को भेव मानासेत।
जसो कोनी मोठो लूट पायके खुसी होवासू,
वसोच मी तोरो बचन को कारन खुसी सेऊ।
झूठ लक तो मी बयर अना घिरना रखासू,
पर तोरो विधि लक माया राखासू।
तोरो नेकी नियम को कारन लक,
मी रोज सात बार तोरो स्तुति करासू।
तोरो विधि लक माया राखनवालो ला,
मोठो सांती होवासेत।
ओ यहोवा मी तोरो लक
सूटकारा पावन को लाय आस करासू,
अना तोरो हुकुम गिन पर चलतो आयो सेऊ।
मी तोरो नियम गिनला जीव लक मानासू,
अना उनलक लगत माया राखतो आयो सेऊ।
मी तोरो उपदेस गिन अना
चितोनी हुन ला मानतो आयो सेऊ,
काहेका मोरो सबरी चाल-चलन तोरो समोर परगट से।
मदद को लाय पिराथना
ताव
ओ यहोवा, मोरो दुहाई तोरो तकन पोहोचे,
तू आपरो बचन को अनुसार मोला समज दे!
मोरो गिड़गिड़ानो तोरो तकन पोहोचे,
तू आरो बचन को अनुसार मोला सोड़ा ले।
मोरो जुबान लक तोरो स्तुति हिटेत
काहेका तू मोला आपरो बिधि ला सिकवासे।
मी तोरो बचन को गाना गाहुँ
काहेका तोरो सबरी हुकूम नेकी को सेत।
तोरो हात मोरो मद द करन को लाय तैय्यार से
काहेका मीना तोरो उपदेस गिनला अपनायो सेऊ।
ओ यहोवा मी तोरो लक सूटकारा पान को मनसा राखासू,
मी तोरो विधि लक खुसी सेऊ।
मोला जिन्दो कर, अना मी तोरो स्तुति करहीन
तोरो नियम लक मोरो मदद होय।
मि गुमयो हुओ मेन्ढा को जसो भटको हुयो सेऊ,
तू आपरो दास ला तपास ले,
काहेका मी तोरो हुकुम गिनला बिसर नही गयो।
Source notes (3)
- Footnote मूल मा, मोरो टोन्ड मा लक बिल्कुल नोको हिसक
- Footnote मूल में, चरबी को जसो मोटो
- Footnote उद्धार दुस्ट गीनलक दूहूर से।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.