भजनसंहिता 89

देस को आफत को बेरा स्तुति गान

एजराबंसी एतान का मसकील।

1मी यहोवा को सबरी करूना को बारे मा हरामेसा गाना गातो रव्हुँ।

मी आपनो टोन्ड लक तोरी सच्चाई

पीढ़ी- पीढ़ी लग सांगतो रव्हू।

2मी यो जानासू का तोरो करूना,

हरामेसा-हरामेसा को लाय सेत।

तोरी सच्चाई को जसो पक्को से।

3तूना असो कह्यो से, “मीना आपरो बनायो राजा

को संग करार कियो से,

मीना आपरो सेवक दाऊद को संग यो किरिया खायो सेऊ1

4मी तोरो को बन्स ला जूग-जूग तकन पक्को ठेउन।

वोको सिंघासन ला पीढ़ी- पीढ़ी

लक बनयो राखू।”2

सेलाह

5ओ पिरभू, सरग तोरो अचरज को काम

को धन्यवाद करे,

अना पवीतर सन्तगिनको सभा मा

उ तोरो सच्चाई को गूनगान करे।

6काहेका बादल को वरता मा पिरभू को जसो कोन से?

सरगदूत गिनमा3 कोन पिरभू को जसो हो सकासे?

7परमेस्वर पवीतर सन्त गिनको सभा मा भेव को काबील से।

उ आपरो चारी कना रव्हन वालो मा भेव को काबील से।

8ओ ताकतवर परमेस्वर ,

तोरो जसो अखीन कोन सेत?

ओ पिरभू, तोरो चारी कना तोरी सच्चाई से।

9तूमिना उफनतो समुंदर को मा सासन करासे।

वोको ताकत वर लहरो ला तूमिना सान्त करासेत।

10तूमिना पानी को दानव रहब ला लास को जसो कुचल डाकयो होतो।

अपरो दुस्मन गिन ला आपरो ताकत लक छिनभीन कियो होतो।

11बादल तोरो आय, धरती भी तोरो च आय!

संसार अखीन वोमा जोन काही भी चीज से

उनला तूच ना बनायो से।

12तूमिना च उत्तर अना दक्सिन बनायो सेत।

ताबोर अना हारमोन पहाड़ तोरो नाव को जयजय कार करासेत।

13तोरी भुज्जा बलवान से,

तोरी हात मा ताकत से।

तोरो उज्जो हात परबल से।

14तोरो सिंघासन को मूल , धरमी अखिन नियाय से,

करूना अखिन सच्चाई तोरो मोहरा-मोहोरा चलासे।

15का च धन्य से उ समाज जोन मजा की ललकार ला ओरखा से।

ओ यहोवा , वोय लोख तोरो चेहेरा को उजाड़ो मा चलासेत ,

16वोय तोरी नाव को लाय दिवस भर मगन रव्हासेत ,

अखिन तोरो न्याय को कारन महीमा कर सेजन।

17काहेकि तू वोय ताकत की सोभा से,

अखिन आपरो दया लक मोरो सींग ला उच्चो करजोस।

18काहेकि आमरो ढाल यहोवा को कन लक से,

आमारो राजा इसरायल को पवीतर को कन लक से।

दाऊद लक परमेस्वर का वादा

19एक बेरा तू आपरो सेवक ला दरसन देयके गोस्टि करयो,

अखिन कह्यो , मी ना मदत करन को भार एक बीर पर ठेयो से ,

अखिन परजा को लोखहुन मा लक एक निवड़ के बढ़यो से।

20मी ना आपरो दास दाऊद ला लेयके,

आपरो पवीतर तेल लक वोको अभिसेक करयो से।,4

21मोरो हात उसकी संगा बनो रहेत,

अखिन मोरो भुजा वोला पक्का ठेवेत।

22दुस्मन वोला तंग करनो नही पाहे,

अखिन न बेअक्कल लोक वोला दुख देवनो पाहे।

23मी वोको दुस्मन गिनला वोको समोर लक नास करून ,

अखिन वोको बयरी गिनला मार डाकू।

24पर मोरो सच्चाई अखिन करूना वोको पर

बनयो रव्हेत , अखिन मोरी नाव को लक

वोको सींग उच्चो हो जाहेत।

25मी समुंदर ला वोको हात को खाल्या अखिन नद्दी ला वोको उज्जो हात को खाल्या कर देऊ। 5

26उ मोला हाकल के कव्हेत, “तू मोरो अजी आस,

मोरो परमेस्वर अजी अखीन मोरो उध्दार को चट्टान से।”

27मंग मी वोको आपरो पहिलौठा ,

अखिन धरती को राजा गिन पर मुखिया ठयराऊ।

28मी आपरो करूना वोको पर हमेसा बनायो रव्हिन,

अखिन मोरो करार वोको लायी अटल रव्हे।

29मी वोको बंस ला हमेसा बनायो रखहुन।

अखिन वोकी सिंघासन सरग को जसो हमेसा बनयो रव्हे।

30अदि वोको बंस को लोख मोरो कानून ला छोड़ेत, अखिन मोरो नियम गिनको अनुसार नोको चले।

31अदि वोय मोरो विधि गिन ला तोड़ेत,

अना मोरी हुकुम ला नोको माने,

32तो मी उनको पाप को सजा छड़ी लक,

अखिन उनको अपराध को सजा कोड़ागिन लक देहुँ।

33पर मी आपरो करूना वोको पर लक नही हटाहून,

अखिन ना सच्चाई ला तियाग के झूठो करुहुँ।

34मी आपरो करार नही तोड़हु ,

अखिन जोन मोरो ओठ लक हिट चुकयो से,

वोला नही बदलहू।

35एक गन मी आपरो पवीतरता को किरिया खायो सेऊ

मी दाऊद ला कभ्भु धोखा नही देवहुँ।

36वोको बंस हमेसा रव्हेत, अखिन वोको

सिंघासन दिन को जसो मोरो मोहोरा ठयरो रव्हे।

37“उ चन्दा को जसो सदा को लाय रहेत।

यो गवाही बादल मा अटल से।” 6

राजा को पराजय मा विलाप

सेलाह

38पिरभू,अबा तूना वोला तियाग दियो,

तूना वोला असुविकार कर दियो,

तू अपरो अभिसिक्त राजा लक लगत गुस्सा भयो से।

39तूना आपरो सेवक को संग

अपनो करार ला तियाग दियो,

तूना वोको मुकुट ला धरती मा पाड़ के असुध्द कर दियो।

40तूना वोको सबरी रक्सा को नाका ला पाड़ दियो,

वोको किला गिनला खन्डहर बना दियो।

41रास्ता लक जावन वालो वोला लुटासेत,

उ सेजारी गिनको निन्दा को नाव धराई को लाय बन गयो से।

42तूना वोको बयरी गिनको भुज्जा को ताकत ला बढायो से।

वोको सबरी बयरी ला खूस कियो से।

43सच्च मा तूना वोकी तलवार की धार ला बोथड़ा कर दियो।

अना लड़ाई मा वोला टिकन नही दियो।

44तूना वोको सासन करन को डन्डा वोको हात लक हिसक लियो। 7

अखीन वोको सिंघासन जमीन पा पाड़ दियो।

45तूना वोको जवानी को दिवस गीनला घटा दियो,

अखीन वोला हार को लाज लक खोदरा जावनो दिय

छुटकारे को लाय पिराथना

46ओ पिरभू कब तकन ?

का तू सदा खुद ला लुकाय राखजोस?

कबा तकन तोरो किरोध स्तो जसो जरतो रव्हेत?

47ओ पिरभू, हेत कर,

जिन्दगी को बेरा कितरो जरासो से,

तूना सबरी मानूस गिनला नास होवन वालो बनायो से।

48असो कोन मानूस से , जोन सदा जिन्दो रव्हेत,अना मऊत ला नोको चोये?

कोन मानूस मरन लोक को हात लक

अपरो जियान सोड़ा सकासेत?

49ओ पिरभू किता से तोरी, जूनो जमाना को करूना!

जोनको किरिया तूना आपरो सेवक दाऊद लक सच्चाई लक खायो होतो?

50ओ पिरभू, आपरो सेवक को निन्‍दा ला हेत कर!

मी कसो आपरो हिरदय मा सबरी राज को लोख गिनको बेइज्जती सहेन करासू। 8

51ओ पिरभू, तोरो दुस्मन गिनना मोरी निन्दा कियो से,

उनना तोरो अभिसिक्त गयो राजा को

डग-डग मा बेइज्जती कियो से।

52पिरभू जुग-जूग को लाय धन्य से।

आमेन अखीन आमीन!