भजनसंहिता 88

मदद को लाय पिराथना;

कोरह बंसीगिन को भजन परधान बजानवालो को लाय: महलतनोत राग मा एजराबंसी हेमान को मस्कील 1: मौऊत लक बचयो को पिराथना गाना ; कोरहवंसी गिन को भजन . 2: मुखया बजानेवालागिन को लायी महलतलग्नोत राग मा एज्रावंसी हेमान को मस्कील

1हे मोरो उध्दार करनवारो परमेस्वर यहोवा ,

मी दिवस ला अखिन राती ला तोरो पुढ़ो हाकलतो आयी सेव

2मोरो पिराथना तोरो तकन पहोचेत ,

मोरी हाकलन को कन कान लगाय!

3काहेकि मोरो पिरान दुख लक भरो हुयो से,

अखिन मोरो पिरान मरन लोक को कठा पहोचो से।

4मी कबर मा पड़नवालों गिनमा मोजो गयो सेव ;

मी कमजोर अदमी को जसो भयी गयो सेऊ।

5मी मुरदा गिन को बीच सोडो गयो सेऊ ,

अखिन जोन मर के कबर मा पड़यो सेत ,

जोनला तू मंग हेत नही करत,

अखिन वोय तोरो बिन मदत को सेत।

उनको जसो मी भयी गयो सेऊ।

6तू ना मोला खोदरा को पेन्दी च मा

इन्धारो अखिन गहेरो जघा मा ठेयो से।

7तोरो लगत गुस्सा मोरो पर बनयो हुयो से,

अखिन तू ना आपरो सबरी लहेर लक

मोला दुख दियो सेस।

8तूना मोला ओरखन वालो ला मोरो लक

दूहुर कियो से, अखिन मोला उनको

निघा मा घिनोनो कियो सेस।

मी बन्दी सेऊ, अखिन हिट नहीं सकू।

9दुख भोगत-भोगत मोरो डोरा गिन धुन्धला गयी।

ओ यहोवा , मी लगातार तोला हाकलतो ,

अखिन आपरो हात तोरो कन फयलातो आयो सेऊ।

10का तू मुरदा गिनको लाय अचरज को काम करजोस ?

का मरयो लोख उभो होयके तोरो धन्यवाद करहेत?

11का समाधी मा तोरी करूना को

अखिन सत्यानास को दसा मा तोरी सच्चाई

को बखान कियो जाहेत?

12का तोरो अचरज को काम इन्धयारो मा ,

या तोरो नेकी दगाबाजी को दसा को देस मा जानो जाहेत?

13पर ओ यहोवा , मीना तोरी दोहाई दियो सेऊ,

अखिन पहाट ला मोरो पिराथना तोरो तकन पोहोचेत।

14ओ यहोवा , तू मोला कायको लाय सोड़यो सेत?

तू आपरो चहेरा मोरो लक काहे लुकायो रव्हासेत?

15मी लड़कपन च लक दुखी बलकी मरन को जवर सेऊ,

तोरो लक डरात-डरात मी लगत बियाकुल भयी गयो सेऊ।

16तोरो किरोद मोरो पर पड़ गयो, वोको भेव लक मी मिट गयो सेऊ।

17उ दिवस भर पानी को जसो मोला घेरो रव्हासे,

उ मोरो चारी कन मोला चोवासेत।

18तूना चहेतो मीत अखिन भाऊ बन्धु गिनला मोरो लक दूहूर करयो सेस।

अखिन मोरी ओरखन वालो ला

इन्धयारो को जवर से डाक देयो सेस।