भजनसंहिता 57

सूटकारा को लाय पिराथना

परधान बजानवालो को लाय अल-तसहेत राग मा दाऊद को मिक्ताम जब उ साऊल लक पराय के गुफा मा लुक गयो होतो।

1ओ परमेस्वर, मोरो पर किरपा कर,

मोरो पर किरपा कर,

काहेकि मी तोरो सरन मा आयो सेऊ

अना जबा तकन ये आफद हीटना जाय

तबा तकन मी तोरो पंखा को खाल्या सरन लियो रव्हुँ।

2ओ परमेस्वर मी मदद मिलन को लाय,

तोरो लक बिनती करासू

परमेस्वर मोरो पूरो-पूरो धियान रखासे।

3परमेस्वर सरग लक धाड के मोला बचा लेहे,

जब मोरो गिटकन वालो निन्दा कर रह्यो होय।

परमेस्वर आपरो करूना अना सच्चाई परगट करहे।

4मोरो बयरी गिन मोला चारी कना लक घेर लियो सेत

मोरो पिरान संकट मा से।

वोय असो सेत जसो आदम खोर बाघ

अना उनको दाँत पजयो हुयो भाला अना तीर जसी

अना उनको जुबान तेज तरवार जसी सेत।

5ओ परमेस्वर, तु महान आस,

तोरी महीमा धरती मा छायो से

जोन बादल लक उच्चो से।

6मरो बयरी गिन ना मोरो लाय जाल फैलायो सेत,

मोला फसान को जतन करासेत अना मोरो जियान बसन लगयो।

उन ना मोरो लाय खोदरा खन्दयो से

का वय वोको मा पड जाहेत।

7ओ परमेस्वर, मोरो मन पक्को से,

मी गाहु पर भजन किरतन करहुँ;

8ओ मोरो मन जग जाय।

वोय सितारा, अना बीन, बजनो सूरू करो!

आवो आमी मिलके सक्कारी जगबीन।

9ओ मोरो मालीक! मी देस-देस को लोगहुन को बीच मा,

मी तोरो धन्यवाद करहु,

मी राज्य-राज्य को बीच मा तोरो भजन गाहुँ।

10काहे कि तोरी करूना सरग लक उच्चो से,

तोरी सच्चाई बदली तकन पहुँचयो से।

11ओ परमेस्वर, तू सरग को वरता लगत च महान आय!

तोरी महीमा सबरी धरती मा बगर जाय!