भजनसंहिता 115

एकच सच्चो परमेस्वर

1ओ यहोवा आमारो नही, आमारो नही, पर आपरो नाव की बड़ाई कर,

काहेका तू करूना अना सच्चाई लक पुरो सेस।

2राज-राज का लोग काहे कव्हन पाहेत का,

“उनको परमेस्वर कहांन से?”

3आमरो परमेस्वर ता सरग मा से,

जो वोला साजरो लगा से वसोच ऊ करासे।

4वोना लोगहुन की मुरती ता सोन्नो अना खूरो की ता सेत,

पर वय मानूस को हातगिन की बनाई हुयी सेत।

5उनको टोंड ता रव्हासे पर वय बोल नही सकत,

उनका डोरा ता रव्हा सेत पर उनला चोय नही सकत।

6उनका कान ता रव्हा सेत पर वय आयक नही सकत,

उनकी नाक ता रव्हा से पर वय सूंघ नही सकत।

7उनका हात ता रव्हा सेत पर वय छी नही सकत,

उनका पाय ता रव्हा सेत पर वय चल नही सकत,

उनको गरो लक वय बोल भी नही सकत।

8मुरती ला बनावन वाला भी उनको जसा सेत,

अना उनको पर सब भरोसा राखन वाला भी

उनको जसा होय जाहेत।

9ओ इसराइल, यहोवा पर भरोसा राख,

तोरो सहायक अना ढाल ऊच से।

10ओ हारून को घरानो, यहोवा पर भरोसा राख,

तुमरो सहायक अना ढाल ऊच से।

11ओ यहोवा लक भेव वाला,

यहोवा पर भरोसा राखो!

तुमरो सहायक अना ढाल उच से।

12यहोवा ना आमला हेत करयो से,

ऊच आसीरवाद देहे, ऊ इसराइल को अना

हारून को घरानो ला आसिरवाद देहे।

13का नहान का मोठा जेतरा यहोवा का

डरानवाला सेत, ऊ उनला आसीरवाद देहे।

14यहोवा तुमला अना तुमरो बंस ला लगत बढ़ाहे।

15यहोवा जोन बदल अना धरती को बनान वालो से,

वोको कन लक तुमी आसीरवाद पाया सेव।

16सरग ता यहोवा को से,

पर धरती वोना मानूस गिन ला दियो से।

17मुरदा जेतरा पड़या सेत,

वय ता यहोवा की बड़ाई नही कर सकत,

18पर आमी ता अबा लक धरके

सदा वोला धन्य कव्हबिन।

यहोवा की बड़ाई करो!