भजनसंहिता 28

सायता को लाय पिराथना

(दाऊद को भजन)

1ओ यहोवा, मोरो रक्सक मी तोला च हाकलासू,

मोरो हाका देवनो आयक!

अदी तुम्हि मोला जवाब नही देवजोस

ता मी मरन लोक को दुनिया मा

जावन वालो मा सामील भयी जाँहू!

2जब मी मद्दत लक मी तोला च हाकलु ,

जब मी तोरो पवीतर मन्दिर को भीतरी खोली

को कन हात फैयलाहु,तब मोरी बिनती आयक।

3उन दुस्टहुन अखिन बूरो करन वारो हीन को,

संग मा मोला नोको घसीट,

जोन आपरो सेजारीगिन लक सांती को गोस्टी ता करासेत, मंग उनको मन मा गठान से।

अना हिरदा मा बुराई रव्ह से।

4उनको काम को अखिन उनकी करनी को

उनको बुराई को अनुसार उन लक बरताव कर,

उनको हात को काम को अनुसार उनला बदला दे,

उनको करनी को फर उनला दे।1

5वय यहोवा को काम मा

अखिन ओको हात को कामगिन मा धियान नहीं करत,

एकोलक पिरभू उनला नास करहेत

अखिन उ मंग उनको दुबारा निरमान नहि करहेत।

6यहोवा धन्य से, काहेकि ओना मोरी बिनती को आयकयो से।

7यहोवा मोरो बल अखिन मोरी ढाल से।

ओको पर भरोसा राखनो लक मोरो मन मा सहायता भेटासे;

ऐकोलाय मोरो हिरदा हरो भरो से।

अखिन मी गीत गाय के ओको धन्यवाद करासू।

8यहोवा आपरी परजा को ताकत अना सरन को लेवन को जाघा आय,

उ आपरो अभिसिक्त को लाय उध्दार को पिक्को आसरा से।

9हे यहोवा, आपरी परजा2 को उध्दार कर,

अखीन आपरो हिस्सा को लोगहुन ला,

आसीस देव,

अखिन उनला चराके

सम्भाल के राख।