भजनसंहिता 18

दाऊद को जय गीत

(2 समुएल 22:1-51)

(परधान बजावनवारो को लाय। यहोवा को दास दाऊद को गीत, जेको भजन ओना यहोवा को लाय वोनो बेरा गायो जब यहोवा न ओला ओको सबरी दुस्मन को हात लक, अखिन साऊल को हात लक बचायो होतो। ओने कह्यो;)

1ओ पिरभू, मोरो सक्ति से,

मी तोरो लक पिरेम करुसु।

2ओ पिरभू, मोरी चट्टान,

तूच मोरो रव्हन को जघा

अखिन सूटकारा देवन वालो से।

तू मोरो परमेस्वर, मोरी चट्टान से,

मी तोरी सरन मा आई सेव।

तू मोरी ढाल, मोरो सक्तिसाली,

मुक्ति करन वालो मोरो गढ़ से।

3मी पिरभू ला हाकलासु,

जोन हमेसा स्तुति को जोग से

मी आपरो दुसमन लक बचायो हुयो सेव।

4मऊत को चराटगिन लक

मी आखा-पाखा लक घीर गयो सेऊ,

अना अधरम को पूरा ना मोला डराय दियो।

5मोरो आखा-पाखा पाताल को दोरी होतीन।

अखिन मोरो पर मरन को फन्दा होतीन।

6आपरो संकट मा मीना यहोवा परमेस्वर ला हाकलयो,

मीना आपरो परमेस्वर को दोहाई दियो।

अना वोना आपरो मन्दीर मा लक मोरी गोस्टी आयकयो,

अना मोरी दोहाई वोको जवर पोहोच के वोको कान मा पडयो।

7तब च धरती डोल गइ अखिन काँप उठी

अखिन पहाड़ को पाया कपके हील गयो

काहेकि यहोवा लगत गुस्सा भय गयो।

8ओको नाक को छेदा लक धुंगा हिटन लगयो,

अखिन ओको टोंड लक स्तो हिटके भसम करन लगी,

ओको लक दहकतो स्तो हिटन लगयो।

9यहोवा सरग ला खाल्या नवाके उतर आयो ,

अना वोको पाय को खालया घन्नो इन्धार होतो।

10उ करूब पर बस के उड़ाय गयो

अना वारा पर बस के तेजी लक उड़ गयो।

11ओने इन्धयारो ला आपरो लुकन को जघा

अना आपरो आखा-पाखा बदली

मजे पानी को इन्धार अना

बादल को कारो बदली को मान्ढो बनायो।

12स्तो को इंगरा अना स्तो कि चमक

ओको मोहरा बिजली जसी हिटी,

अना कारी बदली ला चीरती हुयी हिट गयी।

13तबा यहोवा परमेस्वर बादल मा गरजो,

अना परम परधान ना आपरो वानी आयकवायो,

गार अना स्तो।

14वोना आपरो तीर चलाय के उनला छितराय दियो,

वोना बिजली पाड़-पाड़ के उनला हरा दियो।

15तबा पानी को ओघर चोवन लगयो,

अखिन धरती को नींव लक उधड़ी।

यो ता ओ यहोवा, तोरी डाट लक,

अना तोरो नाक को साँस को तेज लक भयी।

16पिरभू न उच्चो जघा लक

आपरो हात बढायके मोला थाम लियो,

ओने मोला गहरो पानी लक वरता झीक लियो।

17ओने मोरो लगत ताकतवर दुसमनहिन लक

अखिन मोरोलक घिरना करन वालो लक मोला छुटवाय दियो।

मोरो दुसमन मोरो लक लगत ताकतवर होतीन।

18मोरो आफद को दिवस मा मोरो पर चघायी करयो,

मघ पिरभू मोरो आसरा होतो।

19पिरभू न मोला खुलयो जाघा मा पहुंचायो,

ओने मोला सोडायो ,

काहेकि उ मोरो लक खुस होतो।

20यहोवा ना मोरो लक

मोरो न्यायीपन को अनुसार बरताव कियो।

अना मोरो हात को सुद्दता को अनुसार

वोना मोला उपहार दियो।

21काहेकि मी यहोवा को रास्ता पर रेगत रह्यो,

अना दुस्टता को कारन आपरो

परमेस्वर लक दूहूर नही भयो।

22काहेका वोको सबरी फैसला मोरो मोहरा बनयो रह्यो।

अखिन मीना वोको हुकुम गिनला नही तजो।

23मी ओको मोहरा पवीतर बनयो रह्यो,

अखिन अधरम1 लक खुदला बचायो रह्यो।

24यहोवा ना मोला मोरो नेकी को अनुसार ईनाम दियो से,

अना मोरो हात को निरदोसपन को अनुसार

जोनला उ चोवासे।

25दयावान को संग तू आपरो आपला दयावन्त दिसावासे,

अना खरो को संगमा आपरो ला न्यायी दिसावासे।

26साजरो को संग तू साजरो से,

पर बिगडो को संग तू बिगड़ो से।

27काहेकि तू दीन लोख गिनला बचावासे,

पर घमन्ड भरयो डोरा ला नवा देवासेत,

28हव, तू च मोरो टवरी ला पेटवासेत,

मोरो परमेस्वर यहोवा मोरो इन्धार ला उजियारो मा बदल डाकासे।

29हे यहोवा, तोरी मदत लक

मी सेना गिन पर हमला करासू।

तोरी ही सहायता लक ,

मी दुसमनहिन को परकोट लक नहेक जावासू।

30परमेस्वर को रास्ता परखो से,खरो

पिरभू की बचन तायो गयो से।

ऊ आपरो सबरी सरनागत को ढाल से।

31यहोवा ला छोड़ का कोनी दुसरो पिरभू से ?

आमरो परमेस्वर ला छोड़, का अखिन दुसरो चट्टान से ?

32परमेस्वर मोरो कम्मर ला खरो ताकत लक बान्धासेत।

अना मोरो रास्ता ला सरल करा से।

33ऊ मोरो पाय ला हिरनी को पाय जसो चलावासे।

ऊ ऊच्चो जघा मा मोला उभो राखासे। 2

34यहोवा मोरो हात ला लड़ाई करनो सिकावा से,

उ मोरो भुज्जा गिनला ताकत देवासेत, जोनलक मी काँसो को धनुस को दोरी झीक सकू।

35तू ना मोला आपरो सूटकारा की ढाल दियो से,

तू आपरो उज्जो हात लक मोला सभ्भालयो हुयो से,

अखिन तोरी नरमता ला महत्व दियो से।

36तू न मोरो पाय को लाय जाघा चौड़ो कर दियो,

अखिन मोरो पाय नोको घिसरे!

37मी ना दुसमन को मघा गयो अखिन उनला धर लियो

मी तबा तकन नही लवटू जब तकन वोय खत्म न भयी जाय!

38मीना उनला असो मार दियो का वय उठ नही सकत

वोय मोरो पाय मा पड़ गयीन।

39तूना मोला लड़ाई को लाय ताकत लक भर दियोस।

तूना बिरोधिहीन ला मोरो मोहरा नवाय दियोस।

40तून मोरो दुसमन ला मजबूर करयो

कि वय पड़ के पराय गइन।

मीने उनला खत्म कर दियो

जोन मोरो लक घिरना करत होतीन।

41जबा मोरो बयरीगिन ना हाकलीन,

पर उनला बचावन वारो कोनी नहीं होतो।

उनने यहोवा ला हाकलयो,

पर पिरभू ने उनला जवाब नहीं दियो।

42मीने उनला चूर-चूर कर दियो, जसो वारा को समान धूल।

मीने उनला गल्ली को चिखल को जसो हेड़ के फेंक दियो।

43तू न मोला परजा को झगड़ो लक भी छुटायो;

तू न मोला दूसरो राज को लोख हीन को मुखिया बनायो से ;

जोन लोख ला मी जानत भी नहीं होतो,

वय मोरो सेवा करत होतीन।

44मोरो नाव आयकत च

वय मोरी आदेस को पालन करेत ;

परदेसी मोरो बस मा होय जाहेत।3

45परदेसी कुमलाय जाहेत,

अखिन आपरो किलाहीन लक थरथरावत हिटेत।

46पिरभू जिन्दो से, धन्य से मोरी चट्टान,

मोरो मुक्तिदाता परमेस्वर को बडाई होय।

47धन्य से मोरो बदला लेवन वारो परमेस्वर यहोवा

जोन ना देस-देस को लोखगिन ला

मोरो बस मा कर दियो से;

48अखिन मोला मोरो दुसमन लक छुड़वायो से

तू मोला मोरो दुसमन हिन लक उँच्चो करसे,

अखिन हिन्सक लक बचाव से।

49येकोलक मी राज-राज को मोहरा

परमेस्वर तोरो धन्यवाद करुसु,

अखिन तोरो नाव को भजन गाँहु।4

50तू आपरो राजा को मोठो उध्दार करासेत,

तू अपनो निवाड़ो हुयो

दाऊद को बंस पर हरामेसा को लाय करूना करासेत।