भजनसंहिता 17

एक भोलो मानूस को पिराथना

दाऊद को पिराथना

1ओ यहोवा परमेस्वर न्याय सच्चाई को बचन सुन

मोरी हाक्लनो को तरप धियान दे,

मोरी पिरथना को तरप

कान लगाय जोन कपट वालो होठ से नही हीटयो। 1

2मोरो मुकद्दमा को फैसला तोरो मोहरा होय,

तोरो डोरा न्याय पर लगयो रहेत।

3तू न मोरो हिदय ला जाच से;

तू न रात ला मोला देखयो से

तू न मोला परखोयस मघ काही भी खोटापन नहीं पायो।

मी न ठान लियो सेव कि मोरो टोंड लक

अपराध की बात नहीं हिटे।

4मानूसपन को काम लक मी तोरो टोंड को बचन को लक

हिंसक चाल लक आपरो ला बचाय रखु।

5मोरो पाय तोरो रास्ता मा पक्को रहेत, घिसरेत नहीं।

6ओ परमेस्वर ,मी न तोरो लक पिराथना करयो सेव,

काहेकि तू मोला जवाब देवजोस।

आपरो कान मोरो कन लगायके

मोरी बिनती आयक लेवजोस।

7ओ परमेस्वर, तू जोन आपरो उज्जो हात लक

आपरो सरनागत ला उनको बिरोधी गिन लक बचावासेत,

आपरो अद्भुत करूना दिसाव।

8आपरो डोरा की पुतली जसो मोला संभाल ,

मोला आपरो पंखा को खाल्या लुकाय ले।

9उन दुस्ट गिन लक, जोन मोरो पर हमला करासेत।

मोरो जान लेवन वालो दुसमन लक जोन मोला घेरो सेत।

10दुस्ट जन घमंड को कारन परमेस्वर

कि गोस्टि पर कान नहीं लगाव से,

अखिन आपरो ढींग हाँकत रव्ह से।

11उनना पग- पग मा अमीला घेरो सेत,

वोय अमिला धरती मा पटकन काजी घात लगायो सेत,

12ऊ वोना सेर जसो से,

जोन आपरो सीकार को इक्सा राखासेत।

अना जुवान सेर को जसो घात करन को जघागिन मा बसासेस।

13ओ यहोवा, उठ

वोको सामना कर,वोला पटक देय,

आपरो तरवार को बल लक

मोरो पिरान ला दुस्ट लक बचाय ले।

14आपरो हात लम्बो कर ,

ओ यहोवा मोला मानूस गिन लक बचाय।

मजे संसारी मानूसगिन लक जोनको हिस्सा

योच जिन्दगी मा से।

अना जोनको पोट तू आपरो भन्डार लक भरासेत।

वोय लेकरा-बारा लक सन्तोस सेत।

अना उनको बाकी धन आपरो

लेकरूहुन को लाय सोड के जावासेत।

15पर मी तो न्यायी होयके

यहोवा को टोंड को दरसन करु।

जब मी चेतु तबा तोरो रूप लक सन्तोस होऊ!