भजनसंहिता 55

दगाबाज को नास को लाय पिराथना

मुखिया बजानवालो को लाय, तारवालो बाजा को संग दाऊद को मस्किल

1ओ परमेस्वर मोरो पिराथना ला धियान धरके आयक,

अना मोरो गिड़गिड़ानो लक टोन्ड नोको मुरकेट।

2मोरो कन धियान देयके,मोला जवाब देय,

मी चिन्ता को मारे तडपासू,

अना बियाकुल रव्हासू।

3काहेका बयरी गिनको हल्ला,अना दुस्ट बूरो उपदरा कर रह्यो सेत।

वोय मोरो पर दोस लगावासेत,

अना हिजड के मोला तंगावासेत।

4मोरो मन भीत्तर च भित्तर संकट मा से।

अना मऊत को भेव मोरो मा समा गयो सेत।

5भेव अना थरथरानो ना मोला धर लियो सेत,

अना भेव को कारन लक मोरो रोमटें उभो भयी गयो सेत।

6मीन कह्यो

“भलो होतो कि मोरो परेवा को जसो पंखा होतिन

अखिन मी उड़ जातो अखिन सुकून पावतो।

7चोवो, मंग मी उडात-उडात दुहूर हिट जातो

अखीन जंगल मा बसेरा कर लेतो,

8मी तेज गरेड-धुन्ध अखीन आँधड़ को झोका लक

बचके कोनी लुकन को जघा मा पराय जातो।”

9ओ पिरभू उनको सतियानास कर अखीन उनकी

भासा मा गड़बड़ी डाक देय,

काहेकि मीना नगर मा उपदरा अना कज्या

चोयो सेत।

10राति-दिवस वोय वोकी परकोट मा चघके,

चारी कना हिन्डा सेत।

अखीन उनको भितर बूरो दुस्टपन अना उपदरा

होवासेत,

11वोको भीतर दुस्टता ना बसेरा कियो से,

अना अन्धेर, अत्याचार अना छल वोको

चवक लक दूहुर नही होवासे,

12जोन मोरी नामधराई करासेत उ बयरी नहात,

नहीं तो मी वोकी सहे लेवतो,

जोन मोरो बिरोध मा बड़ाई मारासेत वा मोरो

बयरी नहात,

नहीं तो मी वोको लक लुक जातो।

13पर उ तू च आस जोन मोरी बरोबरी

को मानूस

मोरो घनो मीत अना मोरी जान पेहचान को होतो।

14अमी दुई एकमेक लक कसी मिठ्ठो-मिठ्ठो

गोस्टि करत होतीन।

अमी गरदी को संग परमेस्वर को भुवन मा जात होतीन।

15उनला मऊत अचानक दड़प लेय,

वोय जिन्दोच पताल मा उतर जाय!

काहेकि उनको घर अना मन दुई बुराई

अखीन उपदरा लक भरयो सेत।

16पर मी तो परमेस्वर ला हाकलू,

अना यहोवा मोला बचा लेहे।

17संजा ला, सक्कारी ला, दुफारी मा , तीनों गन

मी दोहाई देहुँ, अखीन कुन्हाते रव्हुँ,

अखीन उ मोरो सबद आयक लेहे।

18जोन कज्या मोरो बिरोध मा मचो होतो,वोमा वोना

मोला साजरो लक बचा लियो से।

उन ना लगतसो लोक ला संग लेयके मोरो सामना

कियो होतो।

19परमेस्वर जोन सनातन लक बिराजमान से ,यो

आयक के उनला जवाब देहेत।

यो वोय सेत जोनमा कोनी बदलाव नहात अना उनमा

परमेस्वर को भेव च नहात,

20वोना आपरो मेल राखन वालो पर भी हात,

सोड़यो से।

वोना आपरो करार ला तोड दियो से।

21वोकी जुबान कि गोस्टि माखन जसी

चिकनी होति

पर वोको मनमा कज्या कि गोस्टि होती,

वोकी बानी तेल लक जादा नरम होति,

पर चमचमाती तरवार होती।

22अपरो बोझा यहोवा पर डाक देव वा

तोला सम्बालेत,

उ न्यायी ला कभ्भु नही टलन देहेत।

23पर ओ परमेस्वर , तु उन लोख ला

बिनास को खोदरा मा पाड देहेत,

खूनी अना छली मानूस आपरो अरधी उमर

तकन भी जिन्दो नही रव्हेत।

पर मी तोरो पर भरोसा राख्यो रव्हु।