भजनसंहिता 22

दुख लक हाकलनो अखिन खुसी को गाना

परधान बजानवालो को लाय अभ्येलेरसर हिरनी राग मा दाऊद को भजन

1ओ मोरो परमेस्वर, ओ मोरो परमेस्वर,

तून मोला कायको लाय सोड़ दियोस?

तू मोरी हाकलन लक अना मोरी मदद करन लक

कायको लाय दूहुर रव्हासेत?

मोरो उध्दार किता से?

2हे मोरो परमेस्वर, मी दिवस ला हाकलुसु

अना तू जवाब नहीं देवस;

अखिन राती मा भी मी चुप्पयी नही रव्हु।

3अना तू जोन इसरायल की

स्तुति को सिंघासन मा बिराजमान से।

तू तो पवीतर आस।

4तोरो च पर आमारो आजा-बाबागिन ना

भरोसा करयो होतो

वोय भरोसा ठयो होतो,

अखिन तू उनला सोडात होतो।

5उन ना तोरी दोहाई दियो,

अना तूना उनला सोडायो,

वोय तोरो पर भरोसा करत होतीन,

अखिन वय नहीं सरमायो भयीन।

6पर मी मानूस नही, कीड़ा सेव

मानूस मा मोरी नाव धराई से,

अखिन लोगगिन मा मोरो बेइज्जती होवासे।

7वोय सबरी देखन वारो मारो मजाक उड़ावासे,

अखिन ओंठ बिचकाव से, अना असो

कव्हतो हुयो डोस्का हिलाव से,1

8“वोय कव्हासेत तुना परमेस्वर पर भरोसा करयो

उ तुमला काहे नही बचावासे?”

पर उ तुम्ही लक खुस से,

ता उ तुमरो मदत काहे नही करासेत?2

9पर तूच ना मोला माय को पोट लक हेडयो,

जबा मी दूध पिवतो लेकरा होतो तबच लक,

तूना मोला भरोसा राखनो सिकायो।

10मी जनम लक च तोला सोप दियो गयो,

अना माय को पोट लक च तू मोरो परमेस्वर आस।

11मोरो लक दूहुर नोको होस

काहेकि संकट जवर से ,

अखिन कोनी मदद करनवारो नहात।

12लगत सा दुस्ट साँडियाहुन ना मोला घेर लियो से,

बासान को जंगल को ताकतवर साँडिया

मोरो आखा-पाखा लक मोला घेरयो हुयो सेत।

13वय फाड़न अना गरजन वारो सेर को जसो,

मोरो कन टोंड फाड़यो हुयो सेत।

14मी पानी को जसो बह गयो,

अखिन मोरी सबा हड्डिहीन को जोड़ उखड़ गइन

मोरो हिरदा मोम भय गयो

उ मोरी देह को भीतर पिघल गयो।

15मोरो ताकत टूट गयो, मोरी घाटी ठिकरा को जसी,

मोरो गरो धूल को जसो सूक गयो

अना मोरी जुबान मोरो टोन्ड को तालू लक चिपक गयो,

तूना मोला मरन को लाय सोड़ दियो से।

16काहेका कुतरा गिनना मोला घेर लियो से।

बुरो करन वारो की मन्डली

मोला मोरो आखा- पाखा लक घेर डाकिसेत;

वोय मोरो हात-पाय ला छेदासेत।3

17मी आपरी सबरी हड्डिहीन ला मोज सकासु;

वय मोला देखासेत अखिन चोवा सेत।

18वय मोरो कपरा आपस मा हिस्सा बाट लेसे,

अखिन मोरो कपरा मा चिट्टी डाक से।4

19अना हे यहोवा ,तू दूर नोको रव्ह ;

हे मोरो सहायक,

मोरी सायता को लाय लहाकी कर।

20मोरो पिरान ला तलवार लक बचाव ,

मोरो पिरान ला कुतरा को पंजा लक बचाय लेव।

21मोला सेर को टोंड लक बचाव,

हव ,जंगली साँड़हीन को सिंगहीन लक

तू ना मोला बचाय लियो से।

22मी आपरो भाऊ-बहिन हीनमा

तोरो नाव को परचार करु

मी मंडली को बीच मा तोरी स्तुति करु। 5

23हे यहोवा ला डरन वारो ओकी स्तुति करो।

याकूब को बंस, तुमी सब ओकी महीमा करो।

हे इसरायल को बंस तुमी वोको भेव मानो।

24काहेकि पिरभू वोना दुखी ला बेकार नही जानयो,

अखिन ना वोको लक घिरना करासेत,

अखीन ना वोको लक आपरो टोंड लुकायो,

पर जबा वोना वोकी दुहाई दियो,

तबा वोकी आयक लियो।

25मोठी सभा मा मोरो स्तुति करनो

तोरो च कन लक होसे,

मी मोरी भेव अना वादा मानन वालो लोख को मोहरा पूरो करहुन।

26दीन मानूस जेवन करके अघा जाहेत,

जोन यहोवा ला तपासा से,

वोय वोकी स्तुति करेहत।

तुमरो जियान हरामेसा जिन्दो रव्हेत।

27धरती का सब दूहुर-दूहुर देसहीन को लोख

यहोवा को गुनगान करेत अखिन वोको कन मुरकेत,

अखिन राज-राज को सब कुल गिनको लोख

तोरो मोहरा आराधना करेत।

28काहेकि राज यहोवा च को आय ,

अखिन सबरी देसगीन पर सासन करासेत।

29धरती को सबरी ताकतवर लोख

जेवन करके अराधना करहेत।

वोय सबरी माती मा मिल जासेत अना

आपरो-आपरो पिरान नही बचा सकेत,

वय, सब वोको पूढा टोघरा टेकेत।

30आवन वालो सन्तान पिरभू की सेवा करहे,

लोख आवन वालो पीढ़ीगिन ला पिरभू को बारे मा सांगेत;

31वय वोको नेकीपन को परचार करेत

अना अबा तकन बिन जन्मो परमेस्वर ला सांगेत

का वोना यो करयो से।