Icaya

Buk pa

ICAYA

Lanyut wilok madito ma i buk man

Buk man kipoko iye i dul adek mapatpat.

(1) Cura 1—39 tito kare ma Juda, ma en aye ker me kupiny pa jo pa Lubanga, tye ki lworo ikom Aciria. Lanebi Icaya onongo oneno ni peko pa jo Juda pe obedo jo Aciria ento obedo bal ma jo Juda gitimo, en aye bedo ludingo pe me winyo lok pa Lubanga ki bedo ki gen manok ikom Lubanga. I loke ki tic manen kamaleng, lanebi Icaya olego lutela ki lwak me bedo ki kwo maber dok ni gutii ki ada ento ka gukwero ci can ki bale pa lobogi aye dong odong ma Lubanga bikelo ikomgi.

Icaya bene owaco kamaleng ni kare bibino ma kuc bibedo tye iwi lobo ducu dok lakwar Daudi aye bibedo rwot ma kite atir.

(2) Cura 40—55 loko pi kare ma jo mapol me Juda onongo gitye i lobo Babilon ma onongo kidiyogi dok gin onongo peke ki gen mo. Lanebi owaco kamaleng ni Lubanga bigonyo jone dok dwokogi cen paco i Jerucalem wek gucak kwo manyen.

Wilok madit ma i cura magi en aye ni Lubanga aye Rwot maloyo gin ma time ikwo pa dano, dok yube pi jone kwako cwalo kwenane iwi lobo ducu, wek gunong gum kun a ki bot jo Icrael.

Dul coc ikom “Latic pa Rwot” tye ikin dul coc ma ngene tutwal i buk me Cik Macon.

(3) Cura 56—66 pole loko pi kare ma dong jo pa Lubanga gudwogo i Jerucalem ma dong gimito lok me cuku cwinygi ni Lubanga bicobo cikene bot jone. Lok ma pire tek en aye lubu gin ma atir, ngolo kop kakare, gwoko ceng Cabit, miyo tyer bot Lubanga ki lok me lega. Dul lok ma ngene tutwal tye i cura 61:1-2, ma Yecu otiyo kwede ikare ma en cako tice.

Lacim wilok madito ma i buk man

Miyo ngec ki cike mapatpat

Miyo pwod ki rok mapatpat

Ngolo kop pa Lubanga ikom lobo ducu

Ajuk pa Rwot ki cike mukene

Rwot Kejekia me Juda ki jo Aciria

Kwena me cike ki me bedo ki gen

Ajuk pa Rwot ki cike