Icaya 43

Lubanga ocike me laro jone

1Kombedi dong Rwot Lubanga ma ocweyo in Icrael, owaco kuman ni,

“Pe ilwor, pien dong atyeko koko in woko.

An alwongi ki nyingi, in i mega.

2Ka ibiwok ki idye nam matut, abibedo kwedi, abigwoki;

pii ma i kulu bene pe bimwonyi;

kadi ibiwot iwok ki idye mac, pe ibiwang,

leb mac pe bigudu komi.

3Pien an a Rwot Lubangani,

an Ngat Maleng pa Icrael ma lari.

Abimiyo Ejipt bedo calo lim mo me koko in,

Etiopia ki Seba bibedo gin ma kiwili kwede.

4Pien in ibedo gin me wel mada bota,

piri dit, dok amari adada,

meno aye gin ma omiyo amiyo dano me koko in,

dok amiyo rok pi laro kwoni.

5Pe ilwor, an atye kwedi,

abikwanyo likwayi woko ki tung kunyango akelogi kany,

dok abicoko joni woko ki tung kupotoceng adwokogi kany bene.

6Abiwaco bot jo matye tung kumalo ni, ‘Dong wuweke,’

dok abiwaco bot jo matye tung kupiny ni, ‘Pe dong wumede ki make’

wek awobena kacel ki anyirana gudwog woko dong ki kamabor,

wek gua gudwog cen ki i lobo ducu.

7Gin jona, kilwongogi ki nyinga, an aye acweyogi,

dok acweyogi wek guket deyo ikoma.”

Jo Icrael gubedo Caden pa Rwot

8Lubanga owaco kuman ni,

“Wukel lwaka i kabedo me ngolo kop.

Wanggi tye, ento pe gineno piny;

itgi tye, ento pe giwinyo lok.

9Wek rok ducu gucoke kacel,

mii dano ducu gucoke kunu.

Anga ikin lubangagi ma twero tito lok ikom gin ma bitime ikare me anyim,

anga ikin lubangagi ma onyutu botwa gin mayam dong otime wacon?

Myero gukel caden gi pi tito lok ikomgi wek gulo lok,

wek ka dong guwinyo lok, gumok kacel ni loke kakare dok ada.”

10Rwot owaco ni, “Wun jo Icrael, wun cadena.

Wun wubedo lutica ma an aye yam ayero,

wek wungeya dok bene wuye an, wuniang atir ni an aye Lubanga kena.

Cake yam con lubanga mo peke ma obedo tye,

dok bene pe bibedo tye lubanga mo ma biluba.

11An kena aye a Rwot,

pe dok tye ngat mo mukene matwero larowu.

12An yam aye atucu pi larowu, ci alarowu, dok atito pire kamaleng bot dano,

ikare ma onongo lubanga mo ma welo pud peke ikinwu;

wun bene wubedo cadena.

13An Lubanga, pud bene abimede me bedo Lubanga nakanaka;

pe dok tye ngat mo mukene matwero larogi ki i cinga:

pe tye ngat mo matwero genga tiyo tica.”

A ki i lobo Babilon

14Rwot Lubanga pa Icrael ma larowu owaco kuman ni,

“Abicwalo mony ikom jo Babilon pi larowu;

gin bituru rii me dog cel woko ducu,

woo me yomcwiny pa jo Kaldaya biloke doko kumu.

15An a Rwot Lubangawu Maleng,

an aye ma acweyowu wun jo Icrael, dok an aye rwotwu.”

16Rwot yam oyabo yoo idye nam,

en ma omiyo yoo obedo tye idye pii makato ki i iye tek adada.

17En opeyo dul mony matek tutwal okelogi ci onekogi woko,

ki lwak gadigadi kacel ki aguragura.

Gin ducu gupoto piny ma pe dok giromo a malo,

odiyogi woko lirwit calo mac tara ma kineko.

18Rwot Lubanga owaco kuman ni,

“Wiwu myero dong owil woko ikom gin mayam otime con tutwal,

pe wubed katamo gin mayam dong otime woko con.

19Myero wucik wangwu wunen gin manyen ma atye katimone;

kombedi dong tye katime.

Wun pe wuneno ce?

Abitucu yoo baro ki idye tim,

ki kulu bicako bedo tye i tim aroo kunu.

20Lee tim ducu gibiwora, too ki udu gibipaka;

pien abimiyo pii bedo idye tim ata, ki kulu i tim aroo,

pi miyo pii ki jona ma ayero wek gumati.

21Gin rok ma an aye acweyogi pira kena,

wek guwer wer me paka.”

Bal pa jo Icrael

22Rwot owaco ni,

“Ento wun yam pe wuwora, wun jo Icrael,

onongo dong wuol kweda woko ce!

23Onongo dong pe wukelo romiwu me atyera bota me gitum awanga,

onongo bene pe dong wuwora ki gitumwu.

An bene pe abedo kayelowu pi gitum,

pe bene abedo ka olo komwu pi odok luban.

24Pe wuwilo lum makur pira ki lim,

dok pe wumiya ayeng ki moo dwolo me gitumwu ma wubedo katyerone bota.

Ento wumiya atingo peko me balwu kun wuolo koma ki balwu maracu tutwali.

25Kadi bed an kena aye ma ajwayo balwu woko;

atimo kumeno pi kit ma an atye kwede,

pe dong abipo pi balwu.

26Wukel adotwu i koma wek walar lok kacel kwedwu,

wukel lok ma nyutu ni lokwu tye atir wek wulo giwu kop.

27Kwarowu mukwongo bene obalo,

wa lulocwu bene yam gutimo roc mapol ikoma.

28Pimeno aketo kipwola ikom rwodi ma giloyo kabedo maleng,

ajalo jo Icrael me aneka,

jo Icrael dong gudoko gin ayeta pa dano.”