Icaya 42

Latic pa Rwot

112

Rwot owaco ni,

“Nen, latica ma an amiyo ki en teko,

ma an kikoma aye ayero ma cwinya yom ikome.

Dong atyeko keto Cwiny ma mera ikome,

en dong bimiyo jo me rok ducu gibitiyo gin matye atir.

2En pe biredo dok pe bidange kun ilo dwone malo,

pe kibiwinyo dwone i wanga yoo.

3En pe bituru lagada ma okak,

dok pe bineko mac tara ma lyel niminimi;

en bikelo ngolo kop atir bot dano ducu.

4En bibedo ki gen nakanaka ma cwinye pe bale,

nio ka dong omiyo tiyo gin matye atir oromo lobo ducu.

Lobo ma kamabor i dog nam ducu gitye kakuru cike.” 53

Rwot Lubanga ocweyo polo,

ka dong oryeyo woko,

ma oyaro wi lobo ki jami ducu matye iye,

ka omiyo kwo ki yweyo bot jo ducu ma bedo iye.

Rwot Lubanga dong owaco kuman bot latice ni, 64

“An Rwot, dong atyeko lwongi me neno ni itiyo gin matye atir i lobo,

amako cingi, dok bene agwoki;

dong atyeko miyi woko bot lurok macalo gicike,

me bedo dero ma menyogi.

7In aye ibiyabo wang lutowang,

ibigonyo lumabuc ki i buc ka ma kitweyogi iye,

wek bene ikwanygi woko ki i piny macol kama onongo gibedo iye.

8An nyinga Rwot,

pe anywako deyona ki lubanga mo mukene,

kadi wa pak ma kipaka kwede bene pe abinywako ki cal jogi ma kipayogi apaya.

9Nen, gin mukwongo mayam atito pire dong otime woko,

kombedi atito botwu pi gin manyen

ma pud peya ocako time.”

Wer me pak

10Wuwer wer manyen me pako Rwot,

wupake wun lobo ducu!

Wek nam kacel ki jami ducu matye iye gupake,

lobo matye i dog nam ki jo ducu ma bedo iye gupake.

11Tim aroo ki lwak gangi ducu matye iye myero gupak Rwot,

jo Kedar ducu myero gupake!

Wek jo ma gibedo i Cela guwer pi yomcwiny,

wek bene gudange ki woo ki iwi godi pi yomcwiny.

12Dano ducu ma gibedo i dog nam kamabor,

myero bene gupak Rwot kun gimiye deyo.

13Rwot cito ka lweny calo oteka lweny,

akemone tuge calo dano ma lalweny,

en dange dok bene woo ki dwon malongo adada,

ento nyutu teke ikom lukwore.

Rwot ocike me konyo jone

14Lubanga owaco ni, “Aling alinga dong

pi kare malac tutwal,

abedo kadiyo cwinya kun pe agamo dog jona;

kombedi dong abicako yele pirgi,

myero dong acak omo cwinya ki yweyo

calo dako matye kacole ki arem me nywal.

15Abibalo lobo ma obedo godigodi kacel ki godi ducu,

dok bene abimiyo gin ducu ma otwi iye two woko;

abimiyo kulu ma pii tye iye two tal woko likang,

abimiyo pii two woko liweng ki i kabedo ducu mayam pii logo iye.

16Abitelo lutowang,

i yoo ma gin pe ngeyo,

i yoo mayam peya guwok ki iye,

en aye abipeyogi ki iye.

Abimiyo colpiny mayam umugi wokoni doko dero,

kama obedo burbur abipiro woko doko ma opire.

Magi aye gin ma abitimo, pe abitenyogi ata liyak.

17Dano ducu ma gigeno cal jogi ma kipayo apaya,

gin jo ma waco bot cal jogi ni, ‘Wun aye lubangawa,’

kibidwokogi cen ki lewic madwong tutwal.”

Jo Icrael pe gupwonye matwal

18Rwot dok owaco ni,

“Wuwiny loka wun ludingit,

wun lutowang bene wuyab wangwu, wek wunen piny.

19Tye ngat mo ma wange oto macalo wang latica,

nyo ite oding macalo it lakwena ma aoroni?

Anga ma wange oto calo wang danona ma dong otyeko dyero kwone pira,

nyo ma wange oto calo wang latica?

20Icrael neno jami mapol tutwal,

ento pe keto cwinye me nenogi maber,

ite tye twolo maromo winyo lok,

ento pe winyo gin mo wa ki acel.”

21Pi kit ma atir pa Rwot,

en mito ni kiwor cike, wek obed ki deyo.

22Ento jone dong kiyakogi dok kimayo limgi woko,

gin ducu dong kicikogi woko ki bur,

kikanogi woko i ot buc;

gudoko dong ginayaka pa dano labongo ngat mo ma larogi,

gin dong mere kiyakogi wa labongo ngat mo ma waco ni, “Wudwok jamigi botgi.”

23Anga ikinwu ma biciko ite kawinyo lok man,

anga ma biketo cwinye kawinyone pi kare ma pud tye anyim?

24Anga ma omiyo jo Icrael i cing ngat ma oyakogi?

Meno pe obedo Rwot ma wan watimo bal i nyimeni?

Pe en aye Rwot ma gukwero lubu yo ma en mitoni,

ma bene gukwero lubu cike wokoni?

25Pimeno omiyo en ocoro lyeto me

akemone ikom jo Icrael, ci otyekogi woko idog lweny.

Macalo mac, akemone olyel oromo i lobo Icrael ducu,

ento jo Icrael pe gumedo ki niang gin matye katime,

mace owangogi, ento jo Icrael pe guparo pire wa ki acel.