Icaya 41

Rwot ocike pi konyo jo Icrael

1Rwot Lubanga owaco ni,

“Wuling mot, wuwiny loka,

wun lobo matye i dog nam;

wek rok ducu gulim tek manyen;

gucak bino wek gulok lokgi.

Myero wan ducu wanyiku cok wek wangolu kop ikinwa kekenwa.

2Anga ma otugu oteka ma oa ki tung kunyango,

dok miyo en loyo lweny i kabedo ducu ma en woto iye?

Anga mamiyo en loyo rok mapol,

kun miyo bote twero me nyono luker woko ite tyene piny?

Pala lucwane miyo dano gidoko calo apwa,

aterone nekogi, tingogi woko calo cung kal ma yamo tero.

3En ryemogi woko, ci kato cito ki kuc,

ma nongo dwir mada, kun nongo nen calo tyene pe gudo piny.

4Anga ma omiyo gin magi ducu otime?

Anga ma omiyo lwak jami ma kombedi tyeni

kit macalo kombedi gitye kwedeni nia i acaki piny?

An Rwot aye abedo mukwongo nia i acaki piny,

an Rwot Lubanga abibedo tye bene i agiki.

5Lobo matye i dog nam dong guneno gin ma atiyo,

lworo omakogi, komgi obedo ka myel amyela;

gin ducu dong gubino gunyiko cok.

6Dano acel acel konyo lawote,

kun waco bot omine ni, ‘Di cwinyi!’

7Lapac cuku cwiny latet jabu,

ngat ma cwero kom cal apaya wek obed pwot cuku cwiny ngat ma goyo agoya ikom got ki nyono,

kun waco ni, ‘Gin meno ber;’

ci kiguro cal meno woko matek ki cumar wek pe dok oput woko. 81

Ento in latica Icrael,

in Yakobo ma dong atyeko yeri,

lakwar Abraim ma en ngat ma amaro.

9In ma ceng akeli ki i agiki lobo,

alwongi ki i gul kamabor adada,

kun awaci ni, ‘In latica,

dong atyeko yeri, dok bene pe abiboli woko cen.’

10Pe ilwor, an atye kwedi,

cwinyi pe opoti, pien an Lubangani;

abimiyi tek, dok abikonyi,

abimaki ki cinga ma lacuc, mamiyo iloyo lukwori.

11Wunen, jo ducu ma kiniga omakogi i komwu,

gibimiyo lewic makogi, dok alee bene twodogi woko;

jo ma pyem kwedwu, wun jona,

gibidoko calo gin ma konye peke, ci gito woko.

12Wubiyenyo jo ma lwenyo kwedwu, ento pe wubinongogi;

jo ma oto mony ikomwu,

gibidoko calo gin ma konye peke.

13Pien an a Rwot Lubangawu,

dong amako cingwu ma lacuc woko liking;

an atye kawaco botwu ni, ‘Pe wulwor, an abikonyowu.’”

14Pe ilwor Yakobo, kadi bed ibedo calo kwidi,

pe wulwor, wun jo Icrael, kadi wugoro mada!

Abikonyowu, man an Rwot aye awaco;

an Ngat Maleng me Icrael, aye ma bikokowu.

15Nen, abimiyo wudoko opam me dino kal,

mapek, dok manyen, ma dino kal maber tutwal;

wubidino godi ci wunginyogi woko,

dok wubiloko lobo ma gubedo cere gidoko calo cung bel.

16Wubipyetogi, ci yamo bitingogi woko,

yamo lapiru me kot bikeyogi woko atata.

Ento wun wubibedo ki yomcwiny i Rwot;

wubiwake bene mada pi Ngat Maleng me Icrael.

17Kace lucan kacel ki jo ma piny obwoyogi gibiyenyo pii me amata,

kun pii pe nen wa ki acel,

ma nongo dwon gi otwo dok ma lebgi omoko woko likang,

ci an Rwot abiwinyo legagi ci abidok iye bene,

an Lubanga pa Icrael pe abitenyogi ata.

18Abimiyo pii mol iwi godi kama pii peke iye,

pii bibedo kagunye agunya ki piny i lung gu.

Abimiyo pii pong idye tim kama yam otwo woko.

Wang it dong bibedo tye i lobo mutwo.

19Abimiyo yadi cedar dongo idye tim,

ki okutu lacari ki yadi matino ma ngwecgi kur, ki yaa;

abiketo yadi cule doko bunga idye tim kama yadi peke iyeni,

yadi ciprec kacel ki kit yadi mukene.

20Dano gibineno wek gunge ni,

Rwot Lubanga Maleng pa Icrael aye

omiyo kit gin man otime,

gin gibitamo pire mot lacen ci gibiniang ni

Rwot aye matye katimo man.

Rwot Lubanga ocayo lwak lubanga me rok mukene

21Rwot Lubanga ma en Rwot pa jo pa Yakobo owaco ni,

“Wun lwak lubanga pa lurok, wunyut lok ma wutye kwede,

dok wukel pidowu mogo matek bota.

22Wubin wunyut botwa gin ma bitime i anyim.

Dong wutit bot lwak gin mayam otyeko time woko,

wek kong watam;

wutitiwa gin ma bia ki ikom gin ma dong otyeko timenu;

wek wan bene waniang ilok ma bitime.

23Wutitiwa gin ma bitime i anyim,

wek omii waye ni wun wubedo lubanga.

Kong wutim gin maber nyo marac,

ma poto cwinywa mamiyo bene lworo makowa.

24Wun pe wugin mo kadi ki acel,

gin ma wutiyogu ducu konye peke;

jo ma yerowu doko gin me kwer ki tung bota.

25Dong atyeko tugu ngat ma bedo i lobo ma tung kunyango ci en bibino;

atuge me bino ka lweny kun a ki i tung kumalo;

en binyono luloc woko piny ki tyene calo nyono coto,

calo lacwe agulu ma nyono lobo me tice.

26Anga mayam otito botwa ki i acaki ni lok man bitime,

wek waye ni en oloko lok matye atir dok ada?

Ngat mo ma otito botwa peke, dok bene ngat ma otucu peke,

pe tye ngat mo ma owinyo ka wubedo ka loko gin mo.

27An Rwot aye akwongo tito lok man bot jo Cion,

dok bene acwalo lakwena ocito i Jerucalem wek otit lok maber bot jo ma bedo kunu.

28Ento ka angiyo piny aneno gin lwak lubangagu,

pe anongo mo acel matwero miyo tam,

onyo matwero dok i peny ma apenyo.

29Nen, gin ducu konygi peke,

ticgi ma gitiyo ducu mwa;

calgi ma kitiyo ki mola ma kiliyo ducu mwa calo yamo.”