Icaya 44

Rwot aye Lubanga kene

1Rwot owaco kuman ni,

“Winya ba, in latica Icrael,

wun aye jona ma ayero, wun likwayo pa Yakobo.

2An a Rwot ma aketi, ma acweyi nia ki ii meni,

an aye ma abedo kakonyi ikare ma kwo dong cake ikomi.

In Icrael, pe ibed ki lworo, pien in latica,

in Jecurun1 ma an aye ayero.

3Pien abionyo pii i lobo mutwo ma pii peke iye,

abimiyo ora kulu tonge cako mol i lobo mutwo;

abiketo Cwiny ma mera ikom likwayi,

dok abimiyo gum bene bot likwayi.

4Gin bibedo maber calo lum ma pii oromo kome,

calo yat ma odongo inget kulu ma piine mol.

5Dano ducu ki acel acel gibiwaco ni gin jo pa Rwot,

ci gibicako bino bot jo Icrael me ribe kwedgi.

Jo mukene bicoyo nying Rwot i ngut cinggi,

ci gibilwonge ken gi ni gin dano matye ikin jo pa Icrael.” 62

Rwot ma en Rwot me Icrael,

Rwot me mony ma laro jo Icrael owaco ni,

“An aye abedo mukwongo ki me agiki;

pe dok tye lubanga mo mukene kono an keken.

7Anga macalo an,

matwero tito kikore gin ma bitime ikare me anyim,

cake ki i acakine nio kwede wa i agikine?

Wek gutit botwa gin ma bibedo i anyim.

8Pe wulwor, komwu bene pe omyel;

yam atito lok man botwu woko con,

kun anyutu jami ducu ma bitime.

Wun aye cadena,

dok tye lubanga mo mukene ma pe an?

Tye dok lubanga mo matek tutwal ma an peya awinyo pire?”

Woro cal jogi obedo tim mingo

9Dano ducu ma tiyo cal jogi gubedo jo ma konygi peke, dok cal jogi ma pirgi tek botgini pe konyo gin mo kadi ki acel. Jo ducu ma giworo cal jogi meno gin lutowang ma pe giniang; gin jo meno kibimiyo lewic makogi matek. 10Konyo gin ango me payo cal jok, nyo me liyo nyonyo pi yubu cal jok me awora ma pe twero konyo gin mo? 11Nen, kibimiyo lewic mako jo ducu ma giworo cal jogi macalo meno. Jo ma giyubu cal jogi meno gin dano adana mamwa. Wek gin ducu gucoke kacel, gubin gucung i kabedo me ngolo kop; ci lworo bimakogi, dok alee bene bitwodogi gin ducu.

12Latet nyonyo tiyo tice ki mac. Tek matye i bade en aye tingo kwede nyol me lungo nyonyo. Kec neke, orwo pii bene make matek, ci miyo tekone cako dok woko piny.

13Lapac bene cako pimo bao, ci cero ka wange woko ki kalam kalu, cwero ki rana, ka dong cako pimone ki gin tice. En yubu cal meno bedo calo dano kikome, ma nongo nen maber bene tutwal calo dano, me aketa i ot me worone. 14En twero tongo yadi cedar, nyo twero yero yat mo matye i bunga i tim ci tongo gire. Ikare mukene en kikome pito yat cedar, ka kot ocwer ci miyo dongo. 15Lacen yat meno bikonyo dano macalo yen me awanga i mac, kun dule mukene bedo me tiyo cal jok. Dule tungcel bedo me moko mac me aoya ki me tedo; dul mukene en dong tiyo ki cal jok me aworane. 16Nucu dule en moko ki mac, bulu ki ringo me acamane mamiyo en limo teko. Ka dong tye ka oyo mac ci waco ni, “Mace mit adada! Olyeto koma dong atika!” 17Ka dule mudonge ducu en tiyo ki cal joke me aworane; en woro cale meno, kun lego ni; “In aye lubangana, lara do!”

18Jo meno pe gingeyo dok bene pe giniang gin ma gitiyo, pien wanggi oume woko, pe giromo neno piny; tamgi bene obale woko pe gitwero niang i gin matye ada. 19Pe tye ngat mo ikin jo ma tiyo cal jogi ma tamo tam, nyo matye ki ngec, ma weko en twero niang ci waco ni, “Nucu yat an atiyo ki cal jok ki mukene awango woko i mac, lodine atedo ki mugati, abulu ki ringo ci acamo woko; dule mukene ma dong odonge en aye atiyo ki cal joka me awora. Cake ningning ni an ada aye dong atye kany kaworo odul yat aye?”

20Wic ma oding ki tam me mingo ca omiyo en dong orwenyo woko matwal ma pe dong romo neno ni etye kaworo cal apaya ma wang wokoni, en keto gene ikom cal jok apaya ma pe twero laro en wa ki acel.

Rwot aye lacwec dok lalar

21Rwot owaco ni,

“In Icrael kong ipo ilok magi, myero ipo ni in latica.

An yam acweyi ni ibed latica,

wiya pe biwil ikomi wa ki acel, in Icrael.

22Dong ayweyo bali woko ducu calo pol ma yamo otero,

ki tim maracu ducu mayam ibedo ka timogi

dong aketogi woko bene macalo lupuu.

Dong idwog cen bota,

pien dong atyeko koki woko.

23Wudange ki wer me yomcwiny, wun lwak me polo,

pien Rwot dong otyeko tiyo lok man!

Wudange ba, wun piny matut!

Wuwoo ki wer, wun godi ducu,

ki yadi ducu matye i bunga i tim!

Pien Rwot dong okoko jone,

deyone dong binen ikom Icrael.

24An aye Rwot ma Lalari,

an aye ma acweyi ki i meni.

An aye a Rwot ma aketo jami ducu, dok aryeyo polo kena;

ikare ma acweyo lobo ngat mo onongo peke ka ngeta ma okonya. 253

Amiyo akota pa lukota doko gin ma konye peke,

dok amiyo lutyet gidoko jo maming;

acoro jo maryek adwokogi cen,

amiyo ryekogi doko mingo.

26Amiyo lok ducu ma lutica gitito cobe kakare,

gin ma lukwenana giwaco bene amiyo cobe.

Awaco bot Jerucalem ni dano dok bibedo i iye doki,

ki taun maditi me Juda ni dok kibigerogi odoco;

ka mayam wi obur dok bidoko gang.

27Awaco ki kut matut ma i nam ki kulu ducu ni gudwon woko,

ci pii bene dwon woko. 284

Awaco bot Ciro ni en bigwoko jona,

ni en bitiyo gin ma amito ni otiine; en bimiyo kigero Jerucalem odoco,

dok bimiyo kiketo teguti ot me wora.”