Icaya 45

Rwot oyero Ciro

1Rwot owaco ni,

“Ciro dong odoko rwot ma dong atyeko wirone ki moo,

amiyo ki en twero, dok aketo en me loyo rok mapol,

acwale wek ocit otur teko pa luker woko,

atye kayabo dogcel me taun madito woko i nyime.

2Abitelo nyimi,

abiyubu yoo bedo mapwot piri,

abituru dogola ma kitiyo ki mola woko liweng,

abitongo nyonyo rii me dogcel ducu aturu woko.

3Abimiyo boti lim ma kikano ka macol,

ki jami mogo ma kikano i kabedo matye i mung,

wek inge ni an Rwot Lubanga pa Icrael,

an aye ma atyeko yeri dok alwongi ki nyingi.

4Aketi ni wek ikony latica Icrael,

ma gin jona,

meno aye gin ma omiyo ayero in;

alwongi ki nyingi,

amiyi woro madit kadi bed pe ingeya.

5An keken aye abedo Rwot,

pe dok tye Rwot mo mukene,

lubanga mo mukene bene dong peke kono an keken;

abimini teko kadi pe ingeya.

6Man atimo wek dano gunge ni an kena aye a Rwot,

cake ki tung kupotoceng nio kwede tung kunyango,

pe dok tye lubanga mo mukene kono an keken.

7An aye ma aketo dero ki colpiny,

amiyo kuc bedo tye ki can bene bedo tye,

an Rwot aye ma atiyo jami magi ducu.

8Abionyo loc o piny i lobo kun a ki i polo,

abimiyo cwer calo kot,

lobo biyabe pi gamo lare,

dok bedo ki kit ma atir bene bicake i lobo;

an Rwot abimiyo lok man time ada.

Rwot aye ma ocweyo gigu ducu

91

Ngat ma pyem ki Lubanga ma ocweye bineno can.

Agulu lobo twero pyem ki ngat ma ocweye?

Lobo twero penyo lacwe agulu gin ma en tiyo?

Nyo agulu twero waco bot lacwe agulu ni pe kicweya maber?

10Latin ma penyo wone ni, ‘In inywalo ango?’

Latin meno bineno can;

nyo ma penyo mine ni, ‘Itye ki arem me nywalo gin ango?’”

11Rwot, en Ngat Maleng ma ocweyo Icrael, owaco kuman ni,

“Wun pe wuromo penya lok ikom lutinona,

dok bene pe wutye ki twero mo me tita gin ma myero atii.

12An aye ma acweyo lobo,

ka dong acweyo dano me bedo iye;

aryeyo polo obedo tye kit macalo tye kwedeni pi teka,

an bene aye ma aciko jami ma i polo ni gubed kit macalo gitye kwedeni.

13An aye ma aketo Ciro i tice me loc,

abimiyo en cobo tic ducu kakare, en bigero odoco tauna maditi,

dok bigonyo jona woko ki i opii,

pe pi cul nyo kadi pi pwoc mo ma abimiyo bote.”

Man lok ma an Rwot me mony aye awaco.

14Rwot owaco ki Icrael ni,

“Lonyo ducu me Ejipt ki jami acata ducu me Etiopia,

gin ducu bidoko meri,

ki jo Seba ma gin twoni jo maboco,

gin ducu gibibino boti ci gidoko opiini,

gibilubu kori ma nongo dong kitweyogi woko ki nyor,

gibiryebe piny inyimi ka wori.

Gin ducu gibimwole woko inyimi kun giwaco ni,

‘In keken giri aye itye ki Lubanga,

lubanga mo mukene dong peke kono merini keken.’”

15Ada, in aye ibedo Lubanga ma kane woko,

ai Lubanga pa Icrael, in aye ma ilaro dano.

16Lewic bimako jo ducu ma yubu cal jogi,

alee bitwodo gin ducu.

17Ento jo Icrael Rwot bilarogi woko,

lar ma en larogi kwede birii nakanaka;

lewic pe bimakogi wa ki acel,

alee mo bene pe bitwodogi liweng.

18Pien Rwot aye gire ma ocweyo polo,

en bene aye ma obedo Lubanga!

En ocako tic me cweyo lobo, ci otiyo otyeko,

en omiyo ocung omoko matek kakare.

En yam pe ocweyo lobo ci oweko woko kun onyobe atata,

en oketo ni dano twero bedo iye.

En Rwot aye ma owaco ni, “An a Rwot,

pe dok tye Rwot mo mukene.

19An yam pe aloko lok i mung,

i lobo matye i piny macol,

an gira yam pe awaco bot likwayo pa Yakobo ni,

‘Wubiyenya i kabedo ma obedo atata.’

An Rwot aloko lok ada,

dok anyutu gin matye kakare.”

Rwot me wi lobo ducu ki cal jogi me Babilon

20Rwot owaco ni, “Wucoke kacel, ci wubin,

wubin wunyik cok,

wun jo me rok mapatpat ma dong wubwot.

Jo ma bedo katingo cal jogi ma kipayo apaya

gin jo ma pe giniang gin mo kadi ki acel;

gibedo kalego cal jok ma pe twero larogini.

21Wubin wunyut lokwu i kabedo me pido;

wek jo ma pido gupenye ken gi.

Anga ma oweko lok man ongene cake ikare macon?

Pe an Rwot aye ma ceng atimo?

Pe dok tye lubanga mo mukene kono an keken,

an aye Lubanga ma kite atir, ma laro dano,

pe dok tye lubanga mukene kadi ki acel.

22Wuloke wubin bota, wek alarwu,

wun jo ma bedo iwi lobo ducu!

Pien an Lubanga kena, pe tye lubanga mukene. 232

An dong atyeko kwonge ki nyinga kena,

lok ma aloko tye atir;

lok meno pe bipoto piny i ngom ma nongo pe ocobe kun awaco ni,

‘Jo ducu gibirumu conggi inyima,

dano ducu gibikwongo kwong me lubu loka.

24Dano gibiwaco ni,

Rwot keken aye bimiyo wabedo ki kit ma atir ki tek gire;

ci jo ducu mayam cwinygi obedo kawang ikom Rwot,

gibibino bote ma nongo lewic makogi mada.

25Likwayo Icrael ducu gibibedo ki loc pi Rwot,

ci dong gibipake pi gin ducu ma en otiyo.