Icaya 46

1Jogi pa jo Babilon dong cok gik woko!

Bel ki Nebo mayam kiworogini,

kombedi dong gudoko yec ma kiketo inge kana,

ma dong gudoko yec mapek tutwal

mamiyo lee ol adada.

2Gin ducu dong gukule piny, gugungu kacel;

cal jogi pe gitwero lare ken gi,

ento dong kimakogi woko kimito terogi i opii.

3Wuwiny loka, wun jo me ot pa Yakobo,

wun jo ma wudong i ot pa jona Icrael.

Abedo kagwokowu cake wa ki i i megiwu,

atingowu cake ikare ma kinywalowu.

4An Lubangawu ma bigwokowu,

abigwokowu nio wang ma wutii;

abibedo katingowu kadi wa ikare ma nongo lwar dong otwi i wiwu.

An aye ma acweyowu dok agwokowu bene,

abikonyowu, dok abilarowu.”

5Rwot owaco ni,

“Wupora ki anga mono?

Tye ngat mo marom kweda?

Wupora do wek wabed calcal.

6Jo ma jobo jabu ajoba ki i kicaa megi,

ma gipimo ryal ki mijan,

giculu lim bot latet jabu wek oyub botgi cal jok,

ka dong giryebe piny inyime ka worone.

7Gitingo giketo iwi gwokgi,

gicibo i kabedone, ci cung iye matwal,

kun pe twero a woko kene ki i kabedone meno.

Ka dano mo kok bote pi kony, en pe gamo doge,

pe laro dano meno ma okok bote ikare me cane.

8Ber wupo ikom lok man, wun lubalo;

kong wutam, wek wulwod loke ki i cwinywu.

9Wupo ikom gin mayam otime wacon,

pien an kena aye Lubanga,

pe dok tye mo mukene ma cal kweda.

10Cake wacon i acaki piny,

anyutu kit ma gin man bitime kwede woko,

ki kit ma bigik kwede bene.

Awaco ni gin ducu ma ayubu bicobe,

dok abitimo gin mo keken ma ayube me tiyone.

11Abilwongo dano calo acut ki tung kunyango;

dano meno bia ki kamabor,

me cobo gin ma dong atyeko yubu con.

An dong aloko, dok abicobone,

dong atyeko yubune, dok bene abitimo.

12Wuwiny loka, wun jo ma ludingo,

wun jo ma wutamo ni lare bor kwedwu tutwal.

13Nino ma abilarowu iye dong cok,

pe dong bor wa ki acel,

pe abigale me laro dano, abilaro Cion,

pi Icrael ma anongo deyona pire.”