Icaya 47

Ngolo kop ikom Babilon

11

Rwot owaco ni,

“Lor piny, ibed i apwa in nya Babilon ma pud rini!2

In taun madit pa jo Kaldaya ma irom ki nyako ma pud rini.

Bin ilor piny ibed i apwa!

Bed piny i ngom, pe iwi komker!

Pien pe dok kibidwori ni in iyom tutwal,

dok pe iromo tiyo gin mo.

2Kwany lanyakidi wek ireg moko kwon,

gony kitambara woko ki iwii,

luny bongini mabori woko wek tyeni odong nono,

ngol ki idye kulu ikat loka tungcel.

3Ibidong munero, ci lewic bimaki,

komi me mon ma myero pe onen dong binen kamaleng.

An dong abiculu kwor,

pe abiweko dano mo bibwot kadi ki acel.”

4Ngat ma kokowa nyinge Rwot me mony,

en Ngat Maleng pa Icrael.

5Wubed ma wuling mot kun wutye i piny macol,

in Babilon;

pien pe dong kibilwongi ni in daker maloyo rok mapol.

6Kiniga yam omaka ikom jona, oweko amiyo gubedo calo gin kipyeda;

amiyo gubedo ite loci,

ento kica pe omaki ikomgi wa ki acel;

okol ma itweyogi kwede obedo mapek tutwal bot jo muteggi.

7Onongo itamo ni ibibedo kaloyo rok mapol nakanaka,

omiyo pe giri iketo cwinyi ilok magi,

kadi wa po pi kit ma bigik kwede bene pe ipo. 83

Pimeno winy lok man,

in ma imaro yomcwiny tutwali,

in ma ibedo mot labongo ayela mo ni

ibedo katamo ni pe tye ngat mo marom kwedi,

dok ni pe ibibedo macalo dato nyo ni kadi ki lutinoni bene pe bito.

9Kit can aryo ma kitmeno bipoto ikomi,

inino acel, i dakika mo manoknok keken;

to pa lutino ki doko dato,

gin ducu bipoto iwi lawangacel magwa,

kadi bed itim lwak tim jokjok mapol ata,

kadi bed dong ityet tyet marom mene.

10In onongo dong itamo ni itye ki kuc ikom tim maracu ma ibedo katimonegu,

kun itamo ni ngat mo peke ma neni.

Ryekoni kacel ki ngec ma itye kwede gubedo ka rwenyi arwenya,

ibedo katamo ki i cwinyi ni pe tye ngat mo marom kwedi.

11Ento gin marac bipoto ikomi,

ma in pe itwero timo gin mo me jukune.

Can bipoto ikomi,

ma pe ibitwero kwanyone wa ki acel;

topiny bipoto ikomi oyot mada, ma in pe ingeyo iye gin mo.

12Cung matek i tyet

dok imede ki timo tim me jokjok,

mayam ibedo katimone cake wa i tinoni;

gwok nyo man twero konyi i yo mo,

nyo bene twero miyo dano gilwori.

13Komi dong oloc woko pi tam mapol tutwal ma kitye kamiyo boti;

kong gin dong gubin gulari,

gin jo ma ngeyo poko polo,

ki jo ma ngiyo lakalatwe kun giciko wanggi malo likang,

jo ma ka i Por Dwe manyen ducu gitito gin ma bitime i komini.

14Nen, gin girom ki cung kal ma mac wangogi woko;

pe gitwero laro kwogi pirgi ken gi ki i tek me leb mac.

Mac man pe obedo mac me aoya,

pe bene mac ma gitwero bedo ingete.

15Jo ma ibedo kayele kwedgini tye kitmeno ki tung boti,

ma ibedo kabalo kareni botgi cake wa katinoni.

Gin ducu gibitenyi woko ata liyak,

kun ngat acel acel cito i yone pat;

ngat mo peke ikin gi ma bilari.