Icaya 48

Lubanga aye Rwot me kare mabino anyim

1Kong wuwiny man, wun jo me ot pa Yakobo,

ma kilwongowu ki nying Icrael, wun likwayo pa Juda,

wun wukwongo kwong i nying Rwot,

kun wutucu bene nying Lubanga pa Icrael,

ento pe i ada, dok pe i yo ma atir.

2Kadi bed wulwonge kenwu ni wun jo me taun madit maleng,

dok wujenge ikom Lubanga pa Icrael,

ma nyinge Rwot me mony.

3Lubanga owaco bot Icrael ni,

“Yam atito con gin ma bitime i anyim,

loke yam okati ki idoga, ci amiyo dano gungeyo woko;

aruyugi me time oyotoyot, ci bene otiine ocobe kakare.

4Pien onongo angeyo ni wun jo ma wuding,

ma wiwu tek calo nyonyo,

dok tur nyimwu bene obedo macalo mola.

5Man aye gin ma omiyo yam atitiwu loke con,

atucu lok man botwu con ma peya otime,

wek ka otime pe wuwac ni cal jogiwu aye mutimo,

kun wumede ki waco ni cal apayawu

ki cal ma wuliyo aliya ki mac aye ma guwaco ni otime.

6Dong wutyeko winyo lok man,

kombedi dong wuneno gin magi ducu;

ci pe wubitito pire?

Cake kombedi cito kwede anyim abimiyo wuwinyo jami mogo manyen,

gin mukene ma pe wun wungeyo kadi ki acel.

7Pud amiyo gitime atima kombedi,

peya gutime wacon,

onyo wuwinyo pirgi kadi ki acel,

wek pe wuwac ni yam onongo wungeyogi con.

8Peya yam wuwinyo pirgi,

dok bene peya onongo wungeyogi,

cake wacon itwu onongo pud oding woko.

Pien onongo angeyo woko ni wubibedo ki tim aranyi me goba,

dok bene cake wa ki i ic, onongo wubedo jo ma lujemo.

9Dong pi nyinga abimiyo kinigana gale,

kong abijuku kinigana woko pirwu wek dano gupaka,

wek pe atyekwu woko.

10Nen, dong atyeko liyowu woko, ento pe macalo ryal,

atemowu i mac buk me can magwa adada.

11Man atimo pira kena, atimo pi bera gira.

Atwero weko kipyedo nyinga ningning?

Pe atwero miyo deyona wa ki acel bot lubanga mo mukene.”

Ciro aye latela ma Rwot oyero

12Rwot owaco ni, 1

“Wuwiny loka, wun jo pa Yakobo, wun jo Icrael ma an alwongowu.

An Lubanga, an aye abedo mukwongo dok abedo me agiki.

13An aye ma aketo teguti me lobo ki cinga,

ayaro polo ki cinga ma lacuc;

ka alwongogi,

ci gin ducu gicung kamaleng kacel.

14Wugure kacel wun ducu, wek wuwiny loka.

Anga ki i kin lubanga mo mayam kong otito pi gin ma bitime anyim ni,

ngat ma an Rwot amaro en aye abioro me cobo yuba ikom Babilon,

en bilwenyo ikom jo Kaldaya.

15An kikoma aye dong aloko,

dok bene dong atyeko lwonge woko,

nyime bibedo leng, dok en bibedo bene maber.

16Wunyik cok bota kany, wek wuwiny:

cake i acaki piny, pe aloko gin mo i mung,

cake ikare ma ocako time, onongo atye kunu.”

Kombedi Rwot Lubanga dong oora ci oruka ki Cwiny Maleng.

Yub pa Lubanga pi jone

17Rwot ma en Ngat Maleng me Icrael,

ma en aye okokowu ki i opii, owaco kuman ni,

“An a Rwot Lubangawu

amito pwonyowu wek wubed maber,

kun atelowu i yo ma myero wuwot iye.

18Kono yam wubedo kawinyo cika, kono ber!

Kono onongo kucwu omol calo kulu ma mol jwi,

kono loc obino botwu calo nam ma piine mol labongo yweyoni.

19Likwayowu kono obedo calo kweyo,

dano ma gua ki i komwu kono dong gidwong calo apwa;

kono nyinggi pe orwenyo kadi ki acel,

kono bene pe kijwerowu woko liweng ki inyima.” 202

Wua woko ki i Babilon, wuring woko ki bot jo Kaldaya,

wunyut lok man kun wugoyo kijira, dok wutit pire bene,

wucwal loke ocit wa i agiki piny,

kun wuwaco ni, “Rwot dong okoko latice Icrael woko!”

21Ikare ma en obedo katelogi i tim,

orwo pii pe onekogi matek;

en omiyo pii otuc omol pirgi,

kun a ki ikom pata got,

obaro got ci pii onyete woko kamaleng. 223

Ento Rwot owaco ni, “Kuc peke pi jo ma gin lutim maracu.”