Icaya 49

Icrael aye dero ma menyo lurok

11

Wuwiny loka, wun lobo ma wutye i dog nam,

wucik itwu wuwiny, wun rok ma wua ki kamabor.

Rwot olwonga ma onongo pud atye i ic,

ocako nyinga ma onongo pud atye i i maa. 22

En omiyo lok ma kati ki idoga tye bit calo lak pala lucwan,

okana woko i tipu cinge;

en omiyo adoko calo atero ma gipako lake,

okana woko i juru aterone.

3En owaco ni, “In latica,

pi in Icrael, dano biketo deyo ikoma.”

4Ento an awaco ni, “Ayele me tiyo tic nono,

atyeko tekona woko ducu nonono, labongo kony mo;

ento kadi bed kumeno, gin ma myero pira tye bot Rwot,

Lubanga gire bicula pi tic ma atiyo.”

5Ma pud peya kinywala, onongo Rwot dong oyera woko,

en oketa me bedo latice ma bidwoko jo pa Yakobo cen bote,

ki me coko jone jo Icrael mayam guket woko ata,

pien Rwot oketo deyo ikoma, Lubangana aye dong omiya teko. 63

Rwot owaco bota ni,

“Tic ma alwongi iye pe obedo me roco deyo pa kaka pa Yakobo me dwokone malo kit macon ca keken,

ento an Rwot dong aketi me bedo dero bot lurok,

wek imii lare oo wa i agiki piny ducu.”

7Rwot ma en Ngat Maleng me Icrael, ma en aye koko jo Icrael,

en owaco kit man bot ngat ma kicayo matek,

ngat ma rok mapatpat dong okwero woko,

matye macalo opii pa luloc ni,

“Luker bineni ci gia woko malo,

rwodi bineni ci gibiryebe woko piny.”

Man bitime pien Rwot, ma en lagen,

Ngat Maleng me Icrael dong otyeko yero in.

Roco Jerucalem

84

Rwot owaco kuman ni,

“Abigamo dogi ikare me timo ber bot dano,

abikonyi ikare me laro dano, abigwoki bene,

pi in omiyo abiketo gicike ki rok ducu,

abimiyo dong ibedo i lobo pa kwarowu ma kombedi dong odoko oburri.

9Abiwaco bot lumabuc ni, ‘Wukati woko,’

ki bot jo matye kama col ni, ‘Wukati woko kamaleng.’

Gin bibedo calo romi ma camo lum inget yoo ducu,

ka camgi bibedo iwi cere ducu kama yadi peke iye. 105

Kec pe binekogi, kadi orwo pii bene pe binekogi,

yamo malyet ki ceng bene pe biwangogi,

pien ngat ma kica omako ikomgi aye ma bitelogi,

bitelogi kelogi wa inget wang it ma piine gunye agunya ki i ngom.

11Abiketo yoo wok ki iwi godina ducu,

kibitucu yoo guduna cito malo iwi godi.

12Nen, gibia ki kamabor,

kun gia ki tung kumalo ki tung kupotoceng,

jo mukene gibia ki i lobo Ciene.”

13Wer wer ki yomcwiny, in polo,

cwinyi obed yom ba in lobo;

wumwoc ki wer, wun godi!

Pien Rwot dong okweyo cwiny jone,

kica bimake ikom jone ma guneno can tutwali.

14Ento jo Cion guwaco ni.

“Rwot dong obwotowa woko ata,

wiye dong owil woko ikomwa.”

15Ci Rwot ogamo cutcut ni,

“Wi dako twero wil ikom latine ma en doto,

kica pe twero make ikom wode ma en onywalo?

Kadi bed dano wiye twero wil, ento an wiya pe biwil i komwu.

16Nen, in Cion dong atyeko coyo nyingi woko idye cinga,

cali nen i wanga kare ducu.

17Lugedoni gibibino oyotoyot tutwal,

jo ma guyaki gibia cito woko.

18Ting wangi malo, nen kabedo ducu;

pien joni ducu gibicoke gibino boti.

Rwot owaco ni, ‘Akwonge ni,

gin gibibedo gin me deyo boti,

macalo tiko me wel bedo me deyo ingut nyakoger.’

19Adada, wi oburri dong odong nono,

loboni dong otyeko bale woko;

ento kombedi dong bibedo mading mada bot jo ma bibedo kunu,

jo mayam guranyowu dong gibibedo kamabor.

20Lutinoni ma kinywalogi i opii,

ibiwinyo ka giwaco ni, ‘Kabedo man ding tutwal;

myero dok kimed kabedo botwa.’

21Ibicako penye kekeni ki i cwinyi ni,

‘Anga ma onywalo jo magi?

An yam abedo lalur, dok abedo ki cwercwiny madit,

kikwanya kitera woko cen calo opii;

anga kono dok ma opito lutino magi?

Kong inen, yam adong kena,

ento lutino magi dok gua ki kwene kono?’”

22Rwot Lubanga owaco ki jone kuman ni,

“Nen, abiryeyo cinga bot lurok,

ci abitingo benderana malo bot rok mapol;

gibikelo awobeni kun gikwakogi ikorgi,

dok bene gibitingo anyirani iwi gwokgi.

23Luker bidoko wegi lutinoni ci gipitogi,

mon pa luker bibedo macalo

megigi ma bidotogi.

Gibiryebe piny inyimi kawori,

ki mwolo madit gibinyutu worogi boti.

Meno bimiyo ingeyo ni An a Rwot;

lewic pe bimako jo ma kura.”

24Itamo ni kitwero kwanyo jami ayaka woko ki i cing dano matek,

nyo kitwero mayo opii woko ki i cing dano mager?

25Ento Rwot owaco kuman ni,

“Opii ma dano matek omakogi, kibimayogi woko ki bote,

jami ayaka matye i cing ngat mager bene kibikwanyo woko ki bote,

pien abipyem ki jo ma pyem kwedwu, ci abilaro lutinoni woko.

26Abimiyo jo ma unuwu bineke keken gi,

dok gibimer ki nek macalo dano gimer ki kongo,

calo gumato kongo bwino.

Meno bimiyo dano ducu ngeyo ni, An a Rwot ma Lalarwu,

Ngat Matek pa Yakobo ma kokowu.”