Icaya 50

1Rwot owaco kuman ni,

“Waraga me keto nyom mayam aryemo ki minwu tye kwene,

ma ceng amiye ikare ma onongo aryemeni?

Yam acatowu bot anga ikin jo mayam onongo acamo banyagi?

Nenu, yam kicatowu pi balwu, dok pi turu cik,

en aye ma oweko kiryemo minwu woko.

2Pingo kono yam pe anongo dano mo ikare ma abino kalarowu?

Dok ikare ma alwongo lwongo,

pingo ngat mo kono pe ogamo doga?

Wutamo ni cinga cek, pe twero kokowu?

Tekona peke me larowu?

Atwero ciko nam ci two woko,

dok atwero loko kulu ducu doko tim aroo;

miyo rec ma i igi bidoko coo pi can pii, ci gito woko.

3Atwero bene loko polo doko macol licuc,

macalo bongo cola ma kiruku ikare me kumu.”

Latic pa Lubanga ma lawiny

4Rwot Lubanga dong opwonya ilok ma myero aloki,

wek ange lok mamiyo teko bot dano ma ool.

En coya woko ki iwang nino kare ducu i odiko,

en coya wek awiny gin ma en pwonya kwede.

5Rwot Lubanga dong otyeko yabo ita woko,

pe ajemo, pe bene aloke ngeya. 61

Aloko ngeya bot jo ma goya,

dok bene aloko lema bot jo ma telo yer tika;

pe akano wanga woko ki lewic ki i laa ma kingulu iye.

7Ento Rwot Lubanga konya,

ma omiyo alee mo peke ma otwoda;

meno omiyo wanga obedo matek calo got,

dok onongo angeyo bene ni pe kibiketo lewic iwiya; 82

pien ngat ma bimiyo aloyo kop tye cok kweda.

Tye ngat mo ma mito pido kweda?

Wek wacung kacel kwede i otkot.

Anga ce ma lakworani?

Wek obin cok ingeta kany.

9Nen, Rwot Lubanga konya,

anga ma bingolo kop loya ni an labal?

Nen, gin ducu gibiti woko calo bongo, nyenye bicamogi woko.

10Anga ikinwu ma lworo Rwot,

ma winyo lok ma latice waco?

Anga ma woto i piny macol

ma pe neno yoo ma en tye kawot iyeni,

ento geno gire Rwot,

kun jenge ikom Lubangane?

11Nen, wun jo ducu ma wumoko mac,

wun jo ma moko mac ikom yen!

Wuwot i dero mac ma dong wumokoni,

kun nongo mac ma wumoko i lak yen ca lyel menyo yoo botwu.

Gin ma wubinongo ki bota en ene:

wubibutu piny ma nongo wutye ki arem madit tutwal.