Icaya 51

Lok me kweyo cwiny jo Jerucalem

1Rwot owaco ni,

“Wuwiny loka, wun jo ma wumito lare,

wun jo ma yenyo Rwot;

kong wunen got mayam kipayowu ki iye,

ki bur madit adada me gweng matek ma kikwinyowu ki iye.

2Kong wutam pi kwarowu Abraim, ki Cara ma obedo dawu.

Ikare ma alwongo Abraim onongo pe tye ki latin mo,

ento lacen amiye gum, ci onywalo lutino,

dok anyayo likwaye odoko mapol tutwal.

3Pien Rwot bikweyo cwiny Cion;

bikweyo cwiny jo ma gitye i kabedone ducu ma kibalo woko,

tim ma iye bibedo calo Eden,

ki tim aroo mutwo bibedo calo poto pa Rwot;

yomcwiny madwong bibedo tye kunu,

kun dano giwero wer me pwoc ki me pak.

4Wuwiny loka, wun jona,

wuter itwu wuwiny loka, wun roka;

pien abimiyowu cik,

ki ngolo kop atir ma bibedo macalo dero bot lurok.

5Kare me loca dong onyiko cok tutwal,

lare ma abikelo tye kabino,

an ki koma aye abiloyo rok ducu;

lobo ducu matye i dog nam gitye ka kura,

gitye ki gen ni abilarogi.

6Wuting wangwu malo i polo,

dok wukul wangwu piny wunen lobo;

pien polo ma wunenoni biket woko macalo yito,

ento lobo biti woko calo bongo,

ka dong jo ma bedo iye gito woko calo ober;

ento lare ma abikelo birii nakanaka, loca pe bigik wa ki acel.

7Wuwiny loka, wun jo ma wungeyo kit ma atir,

wun jo ma dong wumako cika i cwinywu;

pimeno pe wubed ki lworo kadi dano cayowu,

cwinywu bene pe myero obale kace kiyetowu.

8Pien gibirwenyo woko macalo bongo ma nyenye ocamo,

macalo yer romo ma kwidi ocamogi woko,

ento loca pe bigik wa ki acel,

larena bibedo pi yalwak me kare ducu.”

9Coo woko, coo woko ki iwang nino, wek iruk teko, in cing Rwot;

coo woko macalo ikare ma okato, ki yalwak me kare macon.

Pe in aye yam ingolo Rakab ingido woko matinotino,

ci icobo min kulu ineko woko?

10Pe in aye mayam imiyo pii ma i nam otwo woko,

pii madit ma onongo yam tut tutwali

pe in aye imiyo yoo obaro dye nam matut ca,

wek jo ma kikokogi gukat ki iye wa loka nam tungcel?

11Jo ma Rwot okokogi bidwogo cen i Cion,

gibibino kun giwero wer.

Yomcwiny ma rii nakanaka pe birwenyo ki i wigi,

gibibedo ki yomcwiny madwong,

cwercwiny ki cur bia woko ki botgi.

12Rwot owaco ni,

“An aye abedo ngat ma kweyo cwinywu.

Pingo wulworo dano mamwa ma to wokoni,

dano adana marom aroma ki lumii?

13Pingo wiwu owil woko ikom Rwot ma ocweyowu,

ma oryeyo polo,

dok bene ma ocibo teguti me lobo?

Pingo kono wubedo ki lworo nakanaka nino ducu,

pi akemo malyet pa jo ma giunu dano wadigi,

kace gucako ticgi me neko dano?

Akemo malyet pa ngat ma unu danoni kono tye kwene?

14Jo ducu ma onongo kitweyogi macalo mabuc kibigonyogi woko oyotoyot;

gin pe gibito gidonyo piny i bur lyel, cam bene pe biremogi.

15Pien an a Rwot Lubangawu,

ma tugu pii ki i nam, miyo twage kun mor,

nyinga Rwot me mony.

16Dong atyeko keto loka i dogi, akano wangi woko bene dong i tipu

an aye ayaro polo,

ki aketo teguti me lobo, dok awaco bot jo Cion ni, ‘Wun wujona.’” 171

Jerucalem, coo woko ki iwang nino, coo woko, ci i a malo!

In ma dong imato kikopo me akemo ma Rwot aye omiyo boti,

ikare ma imato ducu, ci icako tage.

18Pe tye ngat mo matwero peyi,

ikin lutinoni ducu ma in inywaloni;

pe tye ngat mo matwero mako cingi,

ikin lutino ducu ma in ipitogi.

19Can magi aryoni ducu opoto ikomi lawang acel,

anga ma binywako kumu pi can magi kacel kwedi?

Kiyako loboni kibalo woko liweng,

kec ki neko dano opoto iye magwa;

man anga ma bikweyo cwinyi?

20Awobeni guwile woko,

gubutu piny liraba kama yoo ogik iye ducu,

calo til ma omoko ki obwo;

akemo pa Rwot dong oketo komgi woko,

ki juk ma Lubangani obedo ka jukugi kwede.

21Pimeno, wun jona ma kiunuwu dong wuwiny lok man,

wun jo ma wumer, ento pe wumer ki kongo bwino.

22Rwot Lubangawu ma pido lok pa jone owaco kuman ni,

“Nenu, dong atyeko kwanyo kikopo woko ki i cingwu,

en kikopo mamiyo wumer wutageni;

agulu me akemona pe dok wubimede ki matone.

23Dong abimiyone bot jo ma unuwu,

mayam guwaco botwu ni,

‘Wuryebe piny aryeba ic

wek wawot ki i komwu.’

Ma omiyo wuloko ngewu odoko ngom me anyonagi,

dok ngewu onongo dong tye macalo yoo ma kilubu.”