Icaya 52

Lubanga bilaro Jerucalem

11

Coo woko, coo woko ki iwang nino,

ruk tekoni, in Cion;

ruk bongini mabecone,

in Jerucalem, taun madit maleng,

pien dano mo ma pe kiliro, ki jo ma komgi ki keni,

pe dok gibidonyo boti.

2Teng apwa woko ki ikomi wek ia malo,

in Jerucalem mayam ibedo opii.

Wugony tol woko dong ki ingutwu,

wun jo Cion mayam wubedo opii.

3Pien Rwot owaco kuman ni,

“Pe yam kiculu lim mo me wilowu ikare ma wudoko opii,

dok bene pe kibiculu lim mo me kokowu ki i opii.

4Yam wuwoto wucito i lobo Ejipt macalo lubedo,

lacen jo Aciria guunuwu labongo bal mo. 52

Kong wunen kombedi dok kitero jona woko i Babilon nonono;

jo ma gitye kaloyogi gitye kawake kun giyeto nyinga dyeceng jwi.

6Pimeno jona dong gibingeyo nyinga,

gibingeyo ni an Lubanga,

gibingeyo ni an aye ma aloko kwedgi.” 73

Neno tyene ber mada iwi godi, ngat makelo lok maber,

ma tito pi kuc,

makelo lok maber me gin maber,

ngat ma tito lok me lare,

ma waco bot Cion ni, “Lubangani tye kaloc.”

8Kong wuwiny, lukur taun madit gitye kawer ki dwon malongo,

giwero wer me yomcwiny kacel;

pien gitye kaneno Rwot ki wanggi,

kun tye kadwogo cen i Cion.

9Wumwoc ki wer lawangacel, wun ducu,

wun wi obur Jerucalem;

pien Rwot dong okweyo cwiny jone,

dong okoko Jerucalem woko.

10Rwot dong onyutu tekone maleng kamaleng inyim rok ducu;

dano ducu ma iwi lobo gibineno,

kit ma Rwot Lubangawa larowa kwede. 114

Wua, wua woko, wua woko ki kunu,

pe wugud gin mo ma kome ki keni;

wua woko ki kunu, wek wucit wulonye kekenwu,

wun jo ma wutingo jami pa Rwot.

12Pe wubia oyotoyot ma komwu myel,

pe bene wubiringo aringa, pien Rwot bitelo nyimwu

dok Rwot Lubanga pa Icrael bibedo i ngewu

kun gwokowu cawa ducu.

Can pa latic pa Rwot

13Rwot owaco ni,

“Nen, tic pa latica biwot maber,

kibiwore ci kitinge malo:

en bibedo dano mamalo tutwal.

14Jo mapol ma gunene gubedo ki ur matek;

wange onongo nen pat mada ki wang dano,

wa kome bene onongo pe rom ki kom dano. 155

En bipoyo kom rok mapol kitmeno,

luker ducu doggi bitwo woko pire;

pien gibineno gin mayam pe kititigi pire,

dok gibiniang i gin mayam peya guwinyo pire.”