Icaya 53

1Dano gugamo ni, 1

“Anga mono ma onongo romo ye lok ma kombedi wan watitoni?

Dok anga ma oneno teko pa Rwot ilok man?

2Pien onongo obedo miti pa Rwot pi latice me dongo inyime calo ginapita ma pud tye ka dongo adonga,

ma pud lwite donyo adonya i ngom mutwo.

En pe tye ki kom mo maber nyo deyo

ma kono omii wacik wangwa ikome,

gin mo ma ywayo tam pa dano onongo peke bote kadi ki acel,

dok gin mo matwero miyo wabedo ki tam ikome bene peke.

3Wan wacaye dok wakwere woko bene,

en obedo ki cwercwiny madwong ki arem madit ma okato kare.

En tye ngat ma dano giumu wanggi woko ikome,

wan wacaye, ma pe waparo pire wa ki acel. 42

Adada, en ociro can pirwa,

otingo aremwa woko ducu ikome;

kigoye dok kitime marac atika,

ma omiyo wabedo katamo ni Lubanga aye ma oketo can man ikome. 53

Yam kicobe pi balwa,

kiketo ret ikome pi timwa marac;

can ma kiketo ikomeni okelo kuc botwa,

pi goco ma kigoye kwede omiyo wacang. 64

Wan ducu onongo yam wangak warwenyo woko calo romi,

ngat acel acel onongo okwanyo yone kene,

ento Rwot dong otingo can me balwa ducu oketo ikome. 756

Yam kiune, kiketo can ikome,

ento en pe ongamo doge me loko lok mo;

calo latin romo ma kitero ka nekone,

dok calo romo ma oling inyim lunyar yere,

kitmeno en pe ongamo doge me loko gin mo.

8Kiune, kingolo kop ikome, ka kikwanye woko;

anga kono ma oparo pi gin ma otime ikome,

ni kikwanye woko ki i lobo pa jo makwo,

kigoye pi bal pa jo me rokwa? 97

Kiyike kacel ki lutim maracu,

dok ki yiko kacel ki lulonyo,

kadi bed onongo en pe otimo bwami mo,

dok pe oloko lok goba ki doge.”

10Rwot owaco ni,

“An aye yam amito ni en oden can;

wek tone obed me koko dano ki i balgi.

Ci en bineno likwaye,

dok en bikwo nakanaka.

Ci mitina bicobe kun wok ki bote.

11Inge neno can matek, en bibedo ki yomcwiny adada;

ci en bingeyo atir ni pe edeno can nono, ci weko cwinye bikwe.

Latica ma kite atir, bimiyo kikwano jo mapol ni kitgi atir;

en bitingo balgi ducu ikome. 128

Meno bimiyo amiyo bote kabedo me woro ikin jo madito,

en bene binywako jami ma kiyako i lweny kacel ki jo matego.

Pien en dong omine kene me to woko,

ma omiyo kikwane kacel ki lubalo;

ento en otingo bal pa dano mapol,

dok obako doge olego pi lubalo adada.”