Icaya 54

Mar pa Lubanga ikom jo Icrael

1Rwot owaco ni, 1

“Wer wer ki dwon malongo, in dako ma lalur,

mayam pe inywalo latin mo, mwoc ki wer kun idange matek,

in dako ma pud peya yam arem ogoyi!

Pien lutino pa dako ma kiweko odong kene bibedo pol

makato lutino pa dako ma kinyomo ma bedo kacel ki cware.

2Med kabedo me kemani obed malac,

wek kiyar bongi angaba me kicikani woko i kabedoni;

pe ibed ladur, med toli obed maboco,

dok bene gur teke me kemani ocung matek liking.

3Pien wang loboni bimede malac tungi ki tungi,

likwayu bileyo kabedo pa lurok dok gibinya gipongo taun madito ducu mayam gudong oburri.

4Pe ilwor, pien lewic pe bimaki;

pe iwek alee otwodi, pien pe kibiketo lewic ikomi.

Wii biwil woko ikom lewic mayam onongo ibedo kwede ikare me tinoni,

pe dok ibipo ikom cac ma kibedo kacayi kwede pi bedo keni macalo dato.

5Pien ngat ma ocweyi aye obedo cwari,

nyinge Rwot me mony;

ngat ma okoki ki i can en aye Ngat Maleng me Icrael,

kilwonge ni Lubanga me wi lobo ducu.

6Pien Rwot dong otyeko lwongi woko,

calo dako ma gibwoto odong kene,

kun tye ki cwercwiny,

calo dako ma kinyomo ma onongo en pud nyako ka kiryemo woko,

man Lubangani ma owaco.

7Yam onongo aweki keni pi kare mo manok keken,

ento abidwoki woko bota ki kica madwong.

8Yam akano wanga woko ki boti,

pi kare manok ma onongo akemona dwong tutwal,

ento abitimo kica boti ki mar ma pe gik. 92

Pien man ki tung bota rom aroma ki kare pa Nua,

ma akwonge ni pii pe dok bipong iwi lobo ducu,

kitmeno bene dong akwongo ni kiniga pe dong bimaka ikomi,

dok bene pe abijuki onyo abipwodi.

10Kadi bed godi gitwero a,

onyo kadi bed cere bene gitwero kobo woko kamukene,

ento mara ma pe loke pe bia ki ikomi,

dok cikena me kuc pe kibidiro woko cen.”

Jerucalem manyen

113

In taun madit ma ineno can, mayamo okodo ikomi ki tek,

ma pe kikweyo cwinyi,

nen, abimwono got meri ki libi,

dok abiketo te gutini ki capir.

12Abitiyo wi labila odini ki tiko makwar me wel,

dog celi abitiyo ki got makwar ma mil amila,

ki kor celi dong abideyo ki lutino kidi me wel. 134

An kikoma aye abipwonyo lutinoni ducu,

dok abimiyo lutinoni gibibedo maber tutwal ki kuc.

14Kit ma atir bimiyo ibibedo kun icung matek,

pe kibiuni kadi ki acel, lworo mo pe bimaki;

dok jo ma giuni pe gibinyiko cok ka ngeti.

15Kace dano biero daa ikomi,

meno nongo pe oa ki bota;

ngat ma ero daa ikomi bipoto gire pire kene.

16“Nen, an ma aketo latet, ma buku lodi mac,

ci teto jami lweny pi tice;

dok bene aketo ngat ma labal lobo wek ojwer jami woko ducu.

17Pe tye jami lweny mo ma kiteto pi lweny ikomi ma bicobo tice,

ibiloyo lok me adot ducu ma kikelo ikomi.

Man aye gum ma lutic pa Rwot ginongo,

ki loyo kopgi a ki bota.”