Icaya 1

11

Man aye lok ma Lubanga onyutu bot Icaya wod pa Amoj mukemo Juda ki Jerucalem ikare me loc pa Ujia, Yocam, Akaj ki Kejekia ma gubedo luker me Juda.

Lubanga ojuku jone

2Lubanga owaco kuman ni,

“In polo ki lobo kong wuter itwu wuwiny.

Lutinona ma apitogi ma gudongo mabeconi,

dong gujemo woko ikoma.

3Twon ngeyo rwode,

kana ngeyo kama rwode miye iye cam,

ento Icrael pe ngeya,

lwaka pe giniang.

4Oii, rok ma lubalo,

jo ma bal onurugi woko,

likwayo pa lutim tim maracu,

lutino ma kitgi dong obale woko!

Dong gubwoto Rwot woko,

gicayo Ngat Maleng me Icrael,

gupoke kweda gudok woko cen adada.

5Pingo pud dok wumito ni kimede ki goyowu?

Pingo wumede ameda ki jemo?

Wunen bur dong oromo wiwu woko ducu,

cwinywu bene dong odoko goro.

6Cake ki ipar tyenwu nio kwede wa iwiwu malo,

kamo maber peke kadi ki acel;

ret ki bur dwong iye ata,

ma wang ret mogo bene remone pud tye kacwer acwera;

pe kibiyo tut ki iwang bur, dok bene pe kitweyo wang ret,

pe bene kibido wang bur ki moo.

7Lobowu odong nono,

taunwu madito ducu dong kiwango woko ki mac;

lurok gumayo lobowu woko ma wun bene wuneno,

lobowu odong nono,

rom ki lobo ma lurok guyako.

8Guweko Jerucalem odong

calo bolo ma kiweko i poto olok,

dok calo obot ma kiweko i poto okono,

calo taun madit ma lumony dong gutyeko rumune woko. 92

Kono nene Rwot me mony pe oweko dano mogo gudong,

kono onongo wabedo calo Codom,

kono dong wadoko calo Gomora.

10Wuwiny lok pa Rwot, wun jo Jerucalem ki luloc matye iye!

Wuter itwu wuwiny pwony pa Lubangawa,

wek pe wubed calo jo Gomora ki Codom! 113

Gitumwu ma wutyero mapol kit menoni kono konye ngo ki bota? Man Rwot aye owaco.

Nyogi romiwu ma wutyero me gitum awangani dong oroma woko,

kacel ki moo dwolo me limwu makwo ma gucwene;

cwinya pe mito remo twoni, kadi remo nyogi romi

nyo remo nyogi dyegi.

12Ka wubino kawora, anga ma olegowu kono ni wukel lwak gityerwu bota?

Anga ma owaco botwu kono ni wunyon dyekala?

13Pe wumede ki kela gitum ma konygi peke bota,

yito odok eceta ma ngwece kur odoko gin me kwer mada ki tung bota.

Karama me Por Dwe, ceng Cabit, ki lwongo dano i cokewu,

ducu dong opong ki balwu keken.

14Karama me Por Dwe mewu ki ninowu madito

mayam kiciko pirgi, gin ducu cwinya daggi;

gudoko ter mapek tutwal bota, aol woko dong ki tingogi.

15Ka wutango cingwu,

abiumu wanga woko pe anenowu;

kadi bed wulega tyen mapol ata,

pe abiwinyo legawu wa ki acel,

pien cingwu obedo remo keken.

16Kong wulwoke woko, wubed maleng,

wubol timwu maracu woko cen kamabor

wek pe dok obed kanen inyima;

wuwek dong timo gin marac,

17wupwonye me timo gin maber.

Wulub ngolo kop atir,

wukony jo ma kiunugi;

wular lutino ma won gi peke,

dok wupid pi mon ma coggi oto.

18Wubin kong kombedi,

wek walar lok kacel,

kadi bed dong balwu kwar marom mene,

bidoko matar calo pee;

kadi bed kwar calo pala,

bidoko calo yer romo matar.

19Kace wuye winyo loka,

ci wubicamo gin mabeco ma cek ki i lobo.

20Ento ka wukwero kun wujemo woko,

ci pala lucwan bityekowu woko;

man Rwot kikome aye ma owaco.

Taun Madit ma opong ki bal keken

21Taun madit mayam kigeno dong odoko malaya adada!

En mayam ngolo kop ma atir tye iye,

kit ma atir bene onongo tye iye,

ento kombedi dong opong ki nek keken.

22Jerucalem, yam onongo irom ki ryal maber,

ento kombedi dong itye calo cet ryal;

yam onongo itye calo kongo bwino maber,

ento kombedi dong ii opong ki pii keken.

23Rwodiwu ducu dong gudoko lujemo,

gudoko bene lurem lukwo.

Dano acel acel ki ikin gi maro lim me wil i mung,

cwinygi tye mere me nongo camucana keken.

Pe giparo pi lutino kic,

pido pa mon ma coggi oto pe o inyimgi.

24Meno omiyo Rwot, ma en Rwot me mony,

Rwot ma en Won Twer me Icrael, owaco ni,

‘Abiculu kwor ikom lukwora,

ci dong pe gibimiya abarwic.

25Abiloke dok alwenyo ikomgi;

abitwako cet ryalwu ducu, abiliyo woko maber,

abigwaro kit rac mo woko liweng ki ikomwu.

26Abidwoko lungolkopwu gibedo kit macalo yam tye con,

ki jo mamiyo tam botwu bene bibedo kit macalo yam tye wi atii.

Lacen kibilwongi ni in taun madit ma kite atir,

taun madit ma gene.’

27Kibikoko Cion ki ngolo kop atir,

jo ma bedo iye ma gingut kibikokogi pi kit ma atir.

28Ento jo ma lujemo ki lubalo kibinekogi woko kacel,

ki jo ma obwoto Rwot woko, gibityekogi woko liweng.

29Pien lewic bimakowu pi yadi kworo,

mayam wugungu piny ka worogini;

alee bitwodowu pi poti mayam wucito iye kaworo.

30Pien wubidoko macalo yat kworo ma pote oner woko,

dok bene macalo poto ma pii peke iye.

31Dano matek bidoko calo lum mutwo,

ma wang ka mac ogudu,

ki tice bene bibedo calo mac ma mwoc kire malo;

ci gin aryo ducu gibiwang kacel,

kun nongo pe dok tye ngat mo ma neko mac ki ikomgi.”