Icaya 2

Rwot biloyo lobo ducu ki kuc

(Mik 4:1-3)

1Man aye lok ma, Lubanga onyutu bot Icaya wod pa Amoj mukemo Juda ki Jerucalem.

2Ikare me anyim

got kama Ot pa Rwot ocung iye,

bibedo got mabor makato godi ducu,

bore bikato cere ducu;

dok rok ducu bimol cito iye.

3Lwak lurok mapol gibibino ci gibiwaco ni,

“Wubin, wek wacitu iwi got pa Rwot,

i Ot pa Lubanga pa Yakobo;

wek en opwonywa gin ma en mito ni watii,

ka wek walub yo mere.”

Pien cik bia ki i Cion,

lok pa Rwot bia ki i Jerucalem. 41

En bingolo kop ikin rok mapol,

dok bingolo kop pa lwak rok mapol;

gibiteto pala lucwan gi doko lak kweri dyang,

ki tongigi doko pala me ngolo jang olok;

rok mo pe bilweny ki rok wadigi,

pe dong gibimede ki pwonyo lweny.

5Wun jo me ot pa Yakobo

wubin wacitu kun ceng pa Rwot ryeny menyowa.

Rwot bingolo kop ikom jo ma wake

6Pien in Rwot iweko lwaki woko ata,

ibwoto jo me ot pa Yakobo,

pien lutyet ma gua tung kunyango gupong iye mada,

ki lukota macalo jo Piliciti,

gitye ka tudu wat ki lurok.

7Lobogi opong ki ryal ki jabu,

lonyogi pe twero tum;

aguragura bene dwong tutwal i lobogi,

gadigadi lwenygi bene pe twero tum.

8Cal jogi dwong i lobogi tutwal,

giworo tic ma gutiyo ki cinggi,

gin ma gutiyo pirgi ken gi ki cinggi.

9Ma omiyo dano dong tye ki lewic,

dano acel acel rwome odok piny adada;

pe itim kica botgi pi bal man! 102

Dony i boro got,

ci ikane woko i apwa,

pi twon lworo madit ikom Rwot ki pi ringo deyo me dite.

11Kibijuku wake pa dano woko,

ki buta pa dano bikwe woko.

Ci Rwot keken aye kibipako inino meno.

12Inino meno Rwot me mony bijuku wake ki lyere, pa jo ducu ma gin tye i rwom ma malo, ma giwake.

13En bityeko yadi cedar ducu me Lebanon maboco ki matye malo;

ki yadi kworo ducu me Bacan.

14En biyaro wi godi ducu ma gucung likung wa malo

ki lobo ducu ma obedo cerecere,

15ki gedo ducu ma bocoboco,

ki cel me gang ducu ma kigero matek;

16ki mel ducu me Tarcic,

wa ki yeya ducu ma gibeco me anena.

17Kibijuku wake pa dano woko,

ci wake pa dano acel acel bikwe woko.

Kibipako Rwot keken inino meno.

18Cal jogi ducu kibijwero woko.

19Dano bidonyo i boro got ki i bur ma kikwinyo i ngom,

pi lworo Rwot ki pi ringo deyo me dite,

ka en bia malo kun ryango kom jo ma bedo i lobo.

20Inino meno cal jogi me ryal ki me jabu ma dano gutiyo me aworagi,

kibibolo woko bot buyu ki bot olik,

21ci gibidonyo ii got ma obar,

ki ikin got ma okak atata,

pi twon lworo madit ikom Rwot,

ki pi ringo deyo me dite,

ka en bia malo karyango kom jo ma bedo i lobo.

22Pe i ket geni ikom dano ma yweyo tye i umeni.

Dano kono konyo ango?