Icaya 3

Arubaruba i Jerucalem

1Kong inen kombedi, Rwot ma en Rwot me mony,

dong tye ka kwanyo woko ki bot Jerucalem ki jo Juda

gin ducu ki dano ducu mayam kwogi ocung iye;

en bikwanyo cam ducu ma kwogi jenge iye,

ki pii bene ma kwogi ojenge iye.

2En tye kakwanyo oteka lwenygi ki monygi,

lungolkop ki lunebi,

lutyet ki ludito ma otegi,

3lutel wi jo pyere abic

ki jo me awora,

lumiitam ki lutyet maryek,

ki luryeko ma gitiyo ki lwit me gwoko kom.

4Rwot bimiyo bulu aye bedo rwodigi,

lutino matino aye ma biloyogi.

5Dano gibibedo ka une keken gi,

kun ngat man unu lawote,

dano acel acel unu wadigi;

awobi binywaro ladit ma otegi,

labong ata binywaro dano ma kiworo.

6Inino meno dano bimako omine

ma i ot pa wone, ci biwaco ni,

“In itye ki bongo me aruka,

in aye dong ibibedo ka loyowa,

wi obur man bibedo ite loci.”

7Inino meno en bilok kun waco ni,

“An gira pe abibedo lakony dano;

kwon ki bongo pe i oda;

pe wubiketa me bedo

ngat maloyo lwak.”

8Pien jo me Jerucalem dong gitye kacato,

jo me Juda dong gitye kapoto mere woko;

pien lok ma giloko ki gin ma gitimo kelo akemo pa Rwot,

gujemo woko ikome dok gubalo deyone woko.

9Kitgi ma ginen kwede ikin dano aye bibedo caden ikomgi;

ginyutu balgi woko kamaleng calo Codom,

ma gitimo atyer.

Can iwigi!

Pien gin aye ma gukelo can ikomgi ken gi.

10Wutit bot jo ma kitgi atir ni gibibedo maber,

pien gibilimo gum pi adwogi me gin maber ma gutimo.

11Can bipoto ikom jo maracu!

Can ma bipoto ikomgi bibedo marac mukato kare;

pien gin ma cinggi otimo,

en aye bene ma gibitimo ikomgi.

12Lutino gitye ka unu lwaka,

lwaka kombedi dong gitye ite loc pa mon.

Wun lwaka, lutelwu tye ka rwenyowu arwenya,

gitye kangakowu woko ki i yo ma myero wuwot iye.

Rwot bingolo kop ikom jone

13Rwot dong obino woko ka pido,

en ocung kangolo kop ikom lwake.

14Rwot dong oyabo pido woko ikom lwake,

ocako pido ki ludongo pa lwake ki rwodigi.

En owaco ni, “Wun ki komwu aye ma wucamo poto olok,

jami ma wuyako ki bot lucan tye i odiwu.

15Wunginyo lwaka woko kono pingo,

kun wutimo lucan malit kuman?”

Man lok pa Rwot Lubanga me mony kikome.

Lok me juk ikom mon me Jerucalem

16Rwot owaco ni,

“Pien anyira me Cion giwake,

giwoto ni cwatacwata ma gutono ngutgi atona

kun gineno dano ki wang me kwele,

ginyedo wot anyeda ki wi tyen gi

kun gara ma ityen gi yenge,

ma kok malongo.

17Pimeno, Rwot bimiyo wi anyira Cion toke woko doko bur.

Rwot bimiyo komgi me mon nen kamaleng.”

18Inino meno Rwot bikwanyo atego me tyen monwu mabeconi woko ki tiko ma kirubu me tur nyimgi, mola me cal dwe, 19mola ngut maryeny aryenya, atego ngut cing, kitambara me adwala i ngut; 20bongigi me atweya iwic, ogul me bad, del me tweyo pyer, cupa moo me wir; lwit ma kitweyo me gwoko kom, 21agit cing, agit ma kirwako i um, 22bongigi mabeco ma kiruku inino madito, gomci, bongi me umegi, ki kicaa me cing, 23ginaruka mogo ma mareprep, bongi camanini, kitambara ma kidwalo iwic ki kitambara me gengo wang.

24Ma ka moo ma ngwece kur bibedo gin ma okwok;

ma ka del me tweyo pyer bibedo tol;

ma ka yer ma kikedo akeda maber wigi bital woko;

ma ka ruku bongi mogo me wel,

kibitweyo bongo cola aye i pyergi;

ma ka nen ma mwonya, gibibedo ki lewic.

25Kibineko cogwu woko ki pala lucwan,

co ma gin oteka lwenywu gibito i mony.

26Kumu ki koko me can biwinye i dog cel me Cion;

bibedo calo dako ma kiyako jamine woko ducu,

ma obedo piny i ngom munero.