Icaya 4

1Inino meno mon abiro gibipoto ikom laco acel kun gimake woko liking ma giwace ni, “Wan giwa wabicamo camwa dok bene wabiyenyo ginarukawa ki komwa, ento in myero itim ber iwek walwongi ni in ibedo cogwa; wek okwany lewic woko ki iwiwa ni pe kinyomowa.”

Deyo pa Jerucalem ikare me anyim

2Inino meno ginapita ma Rwot omiyo olot odongo bibedo maber kun bene nongo tye ki deyone; gin ma ocek i lobo bimiyo jo Icrael ma obwot gibiwake kun bene nongo gitye ki deyo. 3Jo ma odong i Jerucalem kibilwongogi ni jo maleng, gin aye jo ma Lubanga dong ocoyo nyinggi ni myero gubed kwo i Jerucalem. 4Ikare meno Rwot ki twerone, bingolo kop atir, kun nongo dong otyeko lonyo jone ki lwoko remo me bal ducu ma oo idye Jerucalem. 51Ci Rwot dong biketo pol i dyeceng, ki yito me mac ma caro piny i dyewor, i kabedo ducu matye iwi got me Cion, ki iwi dano ducu ma gucoke iye. Deyo pa Lubanga biumu Jerucalem. 6Deyone meno bibedo me gengo lyeto dyeceng, ki me gengo yamo ki kot.