Icaya 5

Wer ikom poto olok

11

Wek kong awer wer bot ngat ma amaroni,

wer me mar ikom poto oloke.

Ngat ma amaroni onongo opuru poto oloke iwi cere

kama ceko cam tutwal.

2Oboto poto, ka dok ocero bene,

ocoko gweng bene woko ducu ki iye

ka dong ocako pito iye olok mabeco ma oyero ayera.

Ci oketo lubele me kiyo pinyi idyere,

ka dok okwinyo bur pi jolo pige.

En dong ocako bedo ki gen ni binyako nyige mabeco,

ento dok onyako mere nyige calo olok me tim.

3Kombedi dong, wun jo ma bedo i Jerucalem, ki wun jo me Juda,

wutim ber wungolkop ikin an ki poto oloka.

4Gin ango ma odong ma onongo myero atim i poto oloka ma pe atimo?

Ikare ma abedo ki gen ni olok binyako nyige mabeco,

pingo dok onyako mere nyige calo olok me tim?

5Wuwek kong dong atit botwu gin ma abitimo ikom poto oloka.

Abimuku cel woko ki ingete, wek dong obale woko;

abicoro lobo me cele areto woko piny, wek lee tim onyon lobo ma iye woko atata.

6Abibwoto bake ki doo liyuk,

pe dong abingolo jange, kadi wa doyo tere,

okutu ki ocok bitwii, ci gidongo iye;

abiciko pol ducu wek pe dok gumii kot ocwer iye.

7Pien poto olok pa Rwot me mony, gin aye jo Icrael ki jo Juda.

Gin ducu gubedo gin ma en opito me yomo cwinye,

ma onongo en tye ki gen ni gin bibedo ki kit ma atir,

ento kong inen, gitye kaneke woko keken gi;

onongo atye ki gen ni gibibedo jo ma kitgi atir,

ento kong iwiny twon koko me can ma jo ma kiterogi marac gikok kwede!

Jami maracu ma dano gitimo

8Gibineno can, jo ma giwilo odi gimedo ikom odi madong gitye kwede,

ma gimedo wilo poti ikom poti ma gitye kwede,

nio wang ma kamo dong pe odong ki jo mukene,

kun nongo dong gudong ken gi i lobo.

9Rwot me mony okwonge kun awinyo ni,

“Adada, odi mapol igi bidong nono,

odi madongo, mabeco bidong labongo ngat mo ma bedo i igi.

10Poto olok eka apar,

bia iye kongo bwino maromo lita aboro keken;

ki kodi guniya adek kulu, bia iye aduku aryo keken.”

11Gibineno can jo ma puk odiko con,

kayenyo kongo me amata,

ki jo ma rii ite kongo nakanaka wa dyewor,

nio wang ma gumer matek.

12Gibedo ki opuk, nanga,

ajaa ki nyamulere i karamagi,

kun kongo bene pe rwenyo ki iye;

ento pe giparo pi tic ma Rwot tiyo wa ki acel,

kadi wa loko wanggi me neno gin ma en otiyo ki cinge.

13Meno aye gin ma omiyo kibitero lwaka i opii pi kwiya pinygi;

co mogo ikin gi ma kiworogi kombedi gibito ki kec,

ki lwak mapol orwo pii binekogi matek.

14Pimeno omiyo lyel tye kamwonyo laa tutwal,

kun ongamo doge malac ma okato kare,

ci deyo pa Jerucalem ki lwak jone gidonyo iye,

lwak ma woo ma cwinygi yom.

15Kibikwanyo dong dit pa dano woko,

co dong bidoko jo ma rwomgi piny adada,

jo ma wake bene dong wakegi bigik.

16Ento Rwot me mony dit dok kidwore pi ngolo kop atir.

Lubanga Maleng nyute ni kite leng pi timo gin matye atir.

17Romi gibibedo kacam i Jerucalem macalo gicamo i oletgi,

dok lim makwo mucwe ki dyegi gibicam iwi obur.

18Gibineno can jo ma ywayo kit marac ikomgi ki tol me goba,

ma giywayo bal ki tol calo giywayo gadigadi.

19Gin giwaco ni, “Wek en oru timone oyotoyot,

wek oru tice bene oyotoyot wek wanen;

wek gin ma Ngat Maleng me Icrael oyubu ni ebitiyo obin cok,

obin wek wan bene wange.”

20Gibineno can, jo ma lwongo gin marac ni ber,

kun dok giloke gilwongo gin maber ni rac,

ma giketo colpiny ma ka dero, ki dero ma ka colpiny,

gin makec giloko doko gin malim, ki gin malim giloko doko gin makec!

21Gibineno can, jo maryek iwanggi ken gi,

gin jo ma ginene ken gi ni giryek.

22Lumat kongo madongo bineno can,

ki jo ma gin ludiro i rubu kongo mamit.

23Gin gimiyo ngat ma obalo loyo kop pi lim ma owilogi kwede i mung,

dok gigengo ngolo kop atir ikom ngat ma pe ki bal mo.

24Pimeno kit macalo leb mac wango kwede reng kal,

ki kit ma mac gamo kwede lum ma otwo,

kitmeno bene gibibedo macalo yat ma otop woko,

nyo macalo yat ma ka ture otwo ci duny calo apwa;

pien gukwero winyo cik pa Rwot me mony,

kun gicayo lok ma Ngat Maleng me Icrael oloko.

25Meno aye gin ma omiyo akemo omako Rwot ikom lwake,

omiyo en oryeyo cinge ikomgi, me tyekogi ci onekogi woko.

Godi madongo guyenge,

ci dano guto ma komgi orade ata macalo yugi matye idye gudu.

Man ducu pe okweyo akemo pa Rwot,

en pud tye karyeyo cinge aryeya ikomgi.

26Rwot Lubanga bitingo benderane pi rok matye kamabor,

en bilwongogi ki i agiki piny ki lwiyo.

Nen gin ca, gitye ka ringo, gibino oyotoyot.

27Dano mo ma ool matye kacato atata peke ikin gi,

ngat ma nur ki nino nyo ma onino peke ikin gi,

ngat mo peke ma bongo ma i pyere ogony woko,

tol war bene pe ocod ki i tyen ngat mo.

28Aterogi bit tutwal,

guciko atumgi ki tol ma dong gutelo woko matek,

obong tyen aguraguragi obedo calo pata got,

tyen gadigadigi wire calo yamo lapiru.

29Acikarigi ducu gimor calo dwon labwor ma kok,

gikok calo lutino labwor;

gingur ci gimako lee ma gitye kadwarone,

giywayogi giterogi gigi labongo ngat mo matwero kwanyone woko ki botgi.

30Inino meno kikome, gibingur ikom Icrael macalo nam ma mor.

Ento kace iloko wangi me neno lobo,

ci ibineno colpiny ki can keken,

kun nongo pol oumu wang ceng woko.