Wer pa Solomon 8

1Kono yam ibedo omera,

ma idoto cak ki i tunu pa maa!

Ci onongo ka arwate kwedi i gudu,

onongo atwero noto lemi ma pe ngat mo twero caya.

2Dok onongo atwero telo wii ateri wa i ot pa maa,

wa i kicika pa maa; ma en aye ma onywalani.

Dok onongo atwero mini kongo bwino ma ngwece kur imato,

ki kongo me pig nyig pomegranat ma mera wek imat.

3Kono bene ateno wiya ikom cingi ma lacam,

kun in nongo igwaka ki cingi ma lacuc.

4Wukwonge bota, wun anyira Jerucalem,

ni pe wubiyelo nyako ma amaroni nio ka dong watyeko cobo mitiwa.

Wer me abicel

Wer pa anyira Jerucalem

5Meno anga ma oa ki i tim matye kabinoni,

ma ojenge ikom laco ma en maroni?

Wer pa nyako

Acoyo in ikare ma itye ite yat acuga,

en i kabedo ma meni onywali iye ki arem madwongi,

i kabedo meno aye meni ma onywalani obedo iye ki arem madwong.

6Myero imar an keken ki cwinyi ducu,

dok itinga i badi macalo gin ma meri kikome;

pien mar tek calo to,

dok bene ger calo lyel.

Meny calo leb mac ma lyel,

leb mac ma lyel ki tek makato ducu.

7Pe tye pii mo kadi opong madit marom mene ma twero neko mac me mar woko,

kadi lalele ma mol matek pe twero mwonyo mar.

Ento ka dano mo otemo wilo mar ki lonyone ducu ma en tye kwede i ode,

ci jo gibicaye matek makato.

Wer pa omegi nyako

8Watye ki laminwa matidine,

tunune pud peya ogulu.

Wabitimo gin ango pi laminwani,

ikare ma awobi mo bilok kwede

kun mito ni enyom?

9Ka nene laminwa obedo macalo cel me gang,

onongo watwero yubu lubele me ryal ma ocudu malo likung ikome.

Ka onongo en obedo macalo doggang,

onongo watwero lorone ki bao me yat cedar.

Wer pa nyako

10An abedo macalo cel,

dong tununa gubedo calo wi cel ma ocudu malo.

En ngat ma marani dong ngeyo,

atir ni an ngat ma kelo kuc.

Wer pa laco

11Solomon yam tye ki poto oloke

i kabedo ma kilwongo ni Baal-amon.

Ci en oyero lupur me gwoko poto oloke;

ma dano acel acel myero ocul bote lime maromo ryal alip acel pi olok ma ocek iye.

12Atye ki poto olok ma mera kikoma matye pira kena;

in Solomon, itwero gamo giri lim me ryal alip aceli;

ki lupur ma gigwoko oloki in ibimiyo botgi lim me ryal miya aryo.

13Ci in ma ibedo kama yadi ma ngwecgi kur dongo iyeni,

luwota gimito winyo dwoni;

lok wek bene awinyi.

Wer pa nyako

14Bin bota oyotoyot, in ma amaroni,

bed calo bure

nyo calo wod til ma bedo iwi godi kama yadi ma ngwece kur dongo iye.