Wer pa Solomon 7

Wer pa laco

1Tyeni ma iruku war iyeni ber atika,

in nyako ma nen calo daker!

Emi nen ma olunge alunga calo tiko ngut ma kicweyo maber,

calo tic ma ladiro aye otiyo.

2Peni bene obedo kiluka calo ngut opoko

ma kipiko iye kongo bwino mamit jwijwi.

Ii obedo calo wit ngano ma kiduru kacel,

ma ature lenga odongo orumu woko dyere.

3Tununi obedo calo lutino til ma kinywalogi rudi,

dok bene obedo calo lutino bure aryo.

4Nguti otone calo wir lak lyec

ma ocudu malo likung,

wangi nen calo kut ma i Kecibon,

ma cok ki dog taun madit me Bat-rabim.

Umi ber calo lubele me Lebanon,

ma okemo Damaciko.

5Deyo me wii ocudu malo likung calo got Karmel,

yere olot ma oluk ma nen maber calo bongo ma obedo lamarlamar;

neno ber me yer wii omiyo an rwot ma meri dong adoko calo lamabuc.

6In iber, inen mwonya mada,

in nyako ma amaro adada, in imiyo an abedo ki yomcwiny madwong.

7In icalo yat otit,

dok tunu ma i kori obedo calo tuga otit.

8Ci an awaco ni, abiito yat otiti

ci amako jange ka apwono nyige.

Ki tung bota tununi nen calo tuga nyig olok,

ki yweyo me dogi kur calo yat ma ngwece kur.

9Dogi mit rom ki kongo bwino mamit adada.

Ka imato imwonyo cito i ii ma pwot,

makato ki i dogi ki ikin lakigu.

Wer pa nyako

10Laco ma amaroni en mera kikome,

mitine ducu tye ocung ikoma.

11Bin, in ma amarini,

wek wacit kacel kwedi i potoni,

ka dong wabibutu i dyewor i gangi matye kunu.

12Ci wabia malo con i odiko wacito i poti olok,

wek wacit wanen kace olok dong gucako turu me keto nyiggi,

dok me neno kace olok dong turu,

me neno bene ka yadi pomegranat dong turu.

Ci dong abinyutu mar mera boti ki kunu.

13Ngwec yat nyodo tye kaduny makur,

ki yadi mabeco ducu ma inget dogolawa gutyeko nyak woko.

In ma amaro agwoko nyig yadi ma yomo cwiny piri,

tye macone kacel ki manyene bene.