Wer pa Solomon 6

Wer pa anyira Jerucalem

1In nyako maber ma inen mwonya makato anyira ducuni,

en ngat ma imaroni kono ocito kwene?

En oloke odok tung kwene?

Wac ki wan, wek wakonyi ki yenyone.

Wer pa nyako

2En ma amaroni ocito odok gire

tung piny i potone,

kama yadi ma ngwecgi kur dongo iye.

En tye kakwayo romine i poto,

en tye bene kapwono ature lenga.

3Laco ma amaroni, en mera kikome ki an bene a mere.

En kwayo romine ikin lenga ma oturu.

Wer me abic

Wer pa laco

4In nyako ma amaro, iber calo taun madit me Tirja,

inen mwonya mada calo taun madit me Jerucalem,

inen oluma calo buca mony ma gutingo benderagi.

5Lok wangi cen pe inena, pien imiyo apari mada.

Yer wii ocung lijur calo lwak dyegi,

ma giwoto gicito piny i kor got Gilead.

6Laki tar calo megi romi matar

ma dong kingolo yer komgi woko,

ci kilwokogi.

Gin ducu guryeyo gukeme ki wadgi,

pe tye mo acel ikin gi ma orwenyo.

7Lemi ducu nongo opong woko calo nyig pomegranat ma kipoko iye i dul aryo,

ma nen ki inge kitambara me wii.

8Laker twero bedo ki daker ma romo pyere abicel ki mon angeca ma romo pyere aboro,

wa ki anyira ma mabeco ma welgi pe kwane.

9Ento pud ayero nyako ma amaro, en nyako aceli keken

ma nen mwonya mada calo akuri.

En latin nyako acel keken bot mine,

en latin ma kite ber ma mine maro adada.

Anyira ducu ginene ci gulwonge ni layomcwiny,

lwak mon ker ki mon angecagu giwero wer me pako en.

10Man anga ma nen calo rupinyi?

En nen mwonya mada calo dwe ma ryeny,

dok calo ceng ma ryeny maleng,

ma nen oluma calo buca mony ma gutingo benderagi.

11Acito i poto kama kipito iye yadi ma nyako nyiggi calo yaa,

ka aneno ginapita ma pud gidongo adonga matye i nota,

dok acito kaneno ka olok dong ocako turu me keto nyige,

ki me neno bene ka yadi pomegranat dong oturu.

12Ento ma onongo pud peya ayube,

miti me bedo kwedi atena

oyomo cwinya mada calo laker matye kangwec i gadigadi me ker.

Wer pa anyira me Jerucalem

13Dwog cen, dwog cen, in nyako me Culam,

dwog cen, dwog cen, wek waneni.

Wer pa nyako

Pingo wugomo ni wunena,

ka atye kamyel inyim dul pa luneno aryo mapatpat?