Wer pa Solomon 5

Wer pa laco

1An dong atyeko bino i potona,

In gin amarana, nyako ger ma mera.

Dong atye kapwono mura ki angwece,

atye kacamo moo kic ma mera ki peda kic:

atye kamato kongo bwinona kacel ki cak ma mera.

Wer pa anyira Jerucalem

Wun luremwa, wumat mat dok wucam,

nio wang ma mar oromowu!

Wer me angwen

Wer pa nyako

2Abedo kanino, ento cwinya bedo kalwodo lok.

Awinyo ka en ma amaroni dwongo dogola.

Wer pa laco

Yaba dogola do in gin amarana,

nyako ma amaro ma yomo cwinya,

in ileng calo akuri, pe tye gin mo ma orem ikomi.

Toyo odyako wiya woko,

ki lupuu ma duny i dyewor bene omwono yer wiya woko.

Wer pa nyako

3Dong atyeko lunyu bongona woko, imito dok aruk aye?

Dong atyeko lwoko tyena woko bene,

imito dok anywangi woko ki ngom?

4En ma amaroni orwako cinge iwang kika,

ci cwinya opoto niling.

5Ikare ma aa kayabo dogola bot en ma amaroni,

ci cinga odyak woko ki moo mura,

lweta ducu odyak woko ki pig mura maliyo,

ikom lalor ma kimako ka kiyabo kwede dogola.

6Ci ayabo dogola bot en ma amaroni,

ento anongo ni en dong oloke ocito woko.

Ikare ma nene en olokoni tipu koma oto woko lirut.

Ayenye tutwal ento pe amedo ki nonge;

alwonge bene kwe, ci en pe ogamo doga.

7Ka lukurpiny ma gubedo ka longo dye taun maditi gunonga;

ci gugoya dok guketo ret ikoma,

dok lukurpiny meno ma gikuru cel me taun maditi

gulunyu bongona me lageng koyo woko ki ikoma.

8Wukwonge bota, wun anyira Jerucalem,

ka wunongo en ngat ma amaroni,

wutite ni mar kombedi omiya adoko latwo.

Wer pa anyira Jerucalem

9In nyako maber ma nen mwonya makato anyira ducuni,

titiwa kit ngat ma imaroni.

Kit gin ango ma miyo kitwero bedo ki ur pire,

ma omiyo icikowa kuman?

Wer pa nyako

10En ngat ma amaroni nen maber dok kome kwar ma nen mwonya,

en nen woko kamaleng kadi ka tye ikin jo alip apar.

11Yer wiye boco dok omine amina

yere col calo kom okur,

tye me wel makato jabu woko.

12Wange nen calo kom akuri

matye i nget wang it ma piine mol,

ginen calo akuri ma gikwang i cak,

nyo calo kidi me wel ma gimwono maber.

13Leme obedo calo poto ma kipito iye yat angwece,

ma ngwece kur mada.

Doge nen maber calo ature lenga,

ma moo mura tye kamol ki iye.

14Bade calo jabu ma kilungu adunu,

en oruku jami me welgu.

Kome pwot calo kom lak lyec,

ma kideyo ki kidi capir.

15Tyene obedo calo wir ma pwot,

ma kicibo ikom got ma kideyo ki jabu.

Kite nen calo got Lebanon,

ma nen maber mada kun yat cedar mabecone orumu.

16Lok ma en loko winye ma mit tutwal,

ki gin mo keken ma odok ikome yomo cwinya matek.

Man aye ngat ma amaroni ma en bene larema,

dong wun anyira Jerucalem myero dong wunge man ni ngat ma amaroni tye kit man.