Wer pa Solomon 4

Wer pa laco

1Nen, inen mwonya mada, in nyako ma amaro,

pien in iber adada!

Wangi tye karyeny aryenya ki inge kitambara me wii.

Yer wii tye macol dok boco kun ocung lijur calo lwak dyegi,

ma giwoto gicito piny i kor got Gilead.

2Laki tar calo megi romi matar

ma dong kingolo yer komgi woko,

ci kilwokogi.

Gin ducu guryeyo gukeme ki wadgi,

pe tye mo acel ikin gi ma orwenyo.

3Del dogi kwar calo uci makwar,

dok bedo me yomcwiny mada bota me winyo lok ma iloko.

Lemi ducu nongo opong woko calo nyig pomegranat ma kipoko iye i dul aryo,

ma nen ki inge kitambara me wii.

4Nguti bor calo ot pa Daudi ma wiye ocudu malo,

ma kigero ityeng me gweng,

ma kingabo iye kwot ma romo alip acel kulu,

ma gin ducu kwot pa oluma oteka lweny.

5Tununi ryoryo ducu nen calo bure aryo,

calo lutino til aryo ma gin rudi,

ma gitye kacam ikin lenga ma oturu.

6Abibedo iwi got me mura,

ki iwi cere me odok luban,

nio wang ma yamo me odiko ocako kodo mangic,

ki nio wang ma colpiny dong peke.

7In inen mwonya mada, nyako ma amaro,

dok bene pe tye gin mo marac ikomi.

8A woko ki iwi got Lebanon,

in nyako ger ma mera;

a woko ki i Lebanon ibin bota.

Lor ibin piny ki iwi got Amana,

ki iwi got Cenir ki got Kermon,

kama lwak labwor ki kwac gibedo iye.

9Ka aneno wangi, in gin amarana, in nyako ger ma mera,

ki tiko ma iruku ingutini,

otyeko lok woko ki i cwinya liweng.

10Mar ma ibedo kwede ikoma miya yomcwiny madit,

in gin amarana, in nyako ger ma mera,

mar ma itye kwede ikoma kato kongo mamit woko,

dok ngwec mooni kur kato angwece makur ducu.

11Nyako ma amaro, dogi lim calo kic,

lebi mit bota calo cak ki moo kic.

Ngwec bongini duny makur

calo angwece me yadi cedar me Lebanon.

12Nyako ger ma mera ma amaro, en poto me mung,

poto ma kirumu woko ki cel,

wang it ma kimwono woko maber.

13Ginapita dongo kunu maber atika.

Gidongo calo yadi pomegranat

ma ginyako nyig mabeco makato ducu.

Kunu tye iye lwak ature makur ki yadi me moo nard ma ngwecgi kur,

14yadi me moo ki lenga ki lum ma ngwecgi kur ki yadi me odok luban,

ki yadi me moo mura ki moo mukene ma ngwecgi kur,

ki kit yadi ducu mapatpat ma ngwecgi kur gidongo kunu.

15In ibedo wang it ma piine bido ngom ma i poto,

ma piine gunye molamola,

ma mol a ki ikom got Lebanon cito piny i ora kulu.

Wer pa nyako

16Coo woko, in yamo me tung kumalo,

in yamo me tung kupiny bene ibin, ikod i potona;

wek ngwec yamone obed makur ma duny o wa kamabor.

Wek laco ma amaroni obin i potone

ocam kit nyig yadi ducu mabeco ma iye mito.