Wer pa Solomon 3

1Abutu anino i kabutuna dyewor benebene,

abedo kaleko lek ikom en ma amaroni:

ci abedo kayenyone, ento pe amedo ki nonge;

ka alwongo en, ento en pe ogamo doga.

2Abia kombedi acito arumu taun madit woko,

abiwoto wa i dye gudugu ki wa ikacokegu.

Abibedo kayenyo en ngat ma amaroni.

Ayenye, ento pe amedo ki nonge.

3Lukurpiny ma onongo gitye kawot me longo dye taun madit gunonga.

Ci an apenyogi ni, “Wuneno en ngat ma amaroni?”

4Ikare ma akato lukurpiny manok,

ci atugi nongo en ma amaroni woko cut.

Akwako kore, ma pe onongo atwero weko en ni ocit ka mo

nio ka dong akelo en wa i ot pa maa,

wa i kicika ot pa maa ma onywalani.

5Wukwonge bota, wun anyira Jerucalem, ki nying bure ki til me tim,

ni pe wubibalo mitiwa.

Wer me adek

Wer pa nyako

6Meno kono anga ma a ki i tim matye kabinoni kun dunyu apwa, calo yito ma duny,

kun ngwec kome calo ngwec mura ki odok eceta ma kiomo ki loka nam,

ma obedo angwece ma lucatwil gicatoni?

7Nen, gitye katingo Solomon ki kitarane maber;

dok jo ma gin oteka lweny ma romo pyere abicel aye gurume,

co ma gin oyita lweny me i Icrael.

8Gin ducu jo makwiri i tic ki pala lucwangu,

dok gungiyo ki lweny.

Kun dano acel acel ikin gi tye ki pala lucwane ma otweyo i eme,

ma dong gikuru gin mo keken ma time i wor.

9Kitingo rwot Solomon ki kitara

ma kiyubu ki bao mabeco adada me yadi me Lebanon.

10Wir ma kiketo me wiye kitiyo ki ryal,

ci ngeye kitiyo ki jabu, ki kabedone oumu ki bongo ma obedo lamarlamar.

Ki tung iye kideyo maber tutwal,

ma anyira Jerucalem aye guyubu pi cwiny me mar ma gitye kwede.

11Wun anyira Cion, wubin wunen rwot Solomon.

Ma en oruku lalukana ma mine oketo iwiye

inino ma onyomo iye dakone,

inino ma en obedo kwede ki yomcwiny madwong.