Wer pa Solomon 2

1An acal ki ature ma i bar Caron,

nyo lenga ma aturene kwar ma maro twi i nota.

Wer pa laco

2Nyako ma amaroni rom ki ature lenga ma odongo ikin okutu,

ikin anyira luwote.

Wer pa nyako

3En laco ma amaroni calo yat acuga

ma ikin yadi ma i bunga,

ka aporo en ki co mukene.

Dok amaro bedo ite tipune,

bedone kangeta romaroma ki camo nyig yat ma lim.

4Ci okelo an i ot me karamane,

ki benderane ma en otingo pira aye mar.

5Miya acam olok ma otwone,

dok wek acam acuga wek koma olim tek;

pien mar omiya adoko latwo kombedi.

6Kono ateno wiya ikom cinge ma lacam,

kun nongo en ogwaka ki cinge ma lacuc.

7Wukwonge bota, wun anyira Jerucalem,

ki nying bure ki til me tim,

ni pe wubibalo mitiwa.

Wer me aryo

Wer pa nyako

8Ci awinyo dwon laco ma amaroni.

Nen, en tye kabino ca,

tye karingo aringa ki iwi godi,

tye karingo ki iwi ceregu kun laro tung bota.

9Laco ma amaroni obedo calo bure, nyo calo twon til.

Nen, en ocung inge celwa ca,

ci ociko wange tye kaneno piny ki i wang ot,

dok obedo kanena ki ikor ot ma obar.

10En laco ma amaroni tye kalok kweda.

Wer pa laco

A ibin, in ma amaro,

in nyako maber atika, a ibin waciti.

11Nen, kare me cwir dong okato woko

ki kot dong bene ocok woko matwal.

12Ature dong ocako turu i lobo,

kare me wer dong aye en,

akuri tye kakoko

ma dwone winye wa i lobowa.

13Oduru ocako nyako nyige,

ki olok bene tye katuru;

ngwec aturene tye kaduny makur.

A ibin, in ma amaroni, laberi,

bin wacit kacel kwedi.

14In ikane calo akuri ikin got ma obar

i kakane matye i kor got ma wiye bit:

wek anen wangi maberi do,

dok awiny dwoni mamit tutwali.

15Wumak co ma girom ki too matinoni woko, ma gibalo poto olok,

pien olokwa dong tye katuru.

Wer pa nyako

16Laco ma amaroni mera kikome ki an bene amere.

En kwayo romine ikin lenga ma oturu

17nio wang ma yamo me odiko ocako kodo mangic,

ma colpiny dong peke.

Loke idwog cen, in laco ma amaroni

calo bure nyo wod til ma pud tidi matye iwi godi.