Icaya 61

Kwena maber me laro Cion

112

Rwot Lubanga dong ocwalo Cwiny mere ikoma,

en dong oyera ci oora,

wek ater lok me kwena maber bot jo ma kiunugi.

Oora bene me cango jo ma cwercwiny onurugi,

ki me tito bot jo matye i opii ni kibigonyogi woko,

ki jo ma kitweyogi i buc ni kibiyabo botgi dogola ci gibikati woko. 23

En dok ocwala ni atit pi mwaka ma Rwot bitimo iye ber bot dano,

ki kare me culu kwor pa Lubangawa;

dok pi kweyo cwiny jo ma kumu.

3En oora me miyo lalukana me deyo

bot jo ma kumu i Cion maka buru,

moo wir me yomcwiny maka kumu,

ruk me pako Lubanga maka bedo ki cwiny magoro.

Gin gibibedo calo yadi ma Rwot aye opito,

gin gibitiyo gin matye atir ci kibipako Lubanga pi gin ma en otiyo.

4Gibigero gedo odoco iwi obur mayam obale con;

gibiyubu taun madito ducu ma onongo kibalogi woko,

ma onongo obale con ikare pa yalwak mapol mukato angec.

5Lurok gibicung kun gikwayo romiwu,

gin bene aye ma gibipuru potiwu ki gwoko poti olokwu.

6Ento wun kibilwongowu ni ajwaki pa Rwot,

dano gibilwongowu ni wun lutic pa Lubangawa;

wubicamo lonyo pa rok mapol,

dok wubibedo bene ki deyo pi limgi.

7Wun yam kiketo lewic madit i komwu,

dok bene kijerowu matek tutwal,

pimeno wubibedo i lobowu kikome,

lonyowu bene kibidode kiryo iwi wadigi;

wubibedo dong ki yomcwiny nakanaka.

8Rwot owaco ni,

“An amaro tim matye atir, adag yak ki tim marac;

abiculu wang can ma opoto ikom jona ma opore kakare,

ki abicike kwedgi i gicike ma rii nakanaka.

9Likwayogi bibedo jo matek ikin lurok,

ki nying lutino ma gin gunywalo biwinye adada ikin rok ducu;

jo ducu ma gibinenogi gibiniang ikomgi,

ni gin gubedo rok ma an Rwot amiyo botgi gum.” 104

Cwinya bibedo yom matek i Rwot, abium pi Lubangana;

pien dong otyeko ruka woko ki bongo me lare,

dok bene ouma woko ki jor me kit ma atir,

macalo lanyom ma oruke maber ki tok me deyo,

dok macalo dako manyen ma oruke ki tiko me wel.

11Pien kit macalo jami mapatpat twi i lobo,

ki poto bene miyo gin ma kicoyo iye twi,

kitmeno Rwot Lubanga bene bimiyo kit ma atir ki pak

bedo tye i kin rok ducu.