Icaya 60

Deyo ma bibedo tye i Jerucalem i anyim

1A malo ba, in Jerucalem, wek iryeny calo ceng,

deyo pa Rwot dong otuc ocaro komi woko.

2Nen, colpiny biumu lobo woko,

mutu macol licuc biumu rok mukene woko,

ento dero pa Rwot biryeny ikomi,

ci kibineno deyone ikomi.

3Lurok gibibino i leng pinyi,

luker gibibino i dero ceng ma otuc ikomi.

4Ting wangi malo wek kong inen piny,

jo ducu gibicoke kacel, gibibino boti;

awobeni gibia ki kamabor,

dok anyirani kibitingogi atinga i kor.

5Ibineno ci cwinyi bipong ki yomcwiny madwong atika,

cwinyi bibedo kagone adada pi lwak yomcwiny ma itye kwede;

pien lim mabup me nam dong kibiweko i cingi,

ki lonyo pa rok mapol kibikelo boti.

6Lwak kinaga mapol ki lutino kinaga bibino ki i Midian ki Epa;

kadi wa jo me Ceba ducu gibibino boti.

Gibibino kun gikelo jabu ki odok luban,

gin bitito kun gipako Rwot pi gin ducu mabeco ma en otimo.

7Romi ducu me Kedar kibicokogi boti,

nyogi romi me Nebayot kibikelogi boti pi gin atyera;

kibikelogi macalo gitum iwi keno tyeri me atyera, ci ibigamogi,

dok ibimedo deyo ikom odi ma dong ideyoni.

8Magi kono jo mene ma gituk calo poli,

nyo macalo amam ma gidok i dog odigi?

9Meli ma a ki i dog nam ducu bigure,

mel ma oa ki i Tarcic aye bitelo yo,

me kelo lutino pa Lubanga ki kamabor

kacel ki lonyo madwong tutwal,

pi nying Rwot Lubanga

ma en Ngat Maleng me Icrael,

pien en dong oketo deyo ikom jone.

10Rwot Lubanga owaco kuman bot Jerucalem,

“Lurok bigero celi, lukergi bikonyi ki tic;

pien ikare mayam akemo omaka omiyo apwodi,

ento pi mitina kena dong atyeko timo kica boti. 111

Dogceli bibedo twolo kare ducu,

pe kibiloro i dyeceng kadi i dyewor;

wek ibed kagamo lonyo pa rok ducu.

Kibikelo luker me lobo ducu ma kimakogi ki loc madit atika.

12Pien rok ki ker ma pe biye loci kibinekogi woko;

kodi rok macalo meno pud dok kibibalo lobogi dok aye.

13Deyo me Lebanon kibikelo boti, ciprec ki yadi mabeco ducu,

wek omii kabedona maleng onen ma mwonya;

dok bene abimiyo kabedo me teno tyena pong ki deyo. 142

Lutino pa jo mayam gubedo kauni gibibino boti lagungu gungu;

ki jo mayam gubedo kacayi gibiryebe piny ka tyeni;

gibilwongi ni in ibedo taun madit pa Rwot,

Cion ma obedo taun madit pa Ngat Maleng me Icrael.

15Kun kono yam kong kiweki ata, kikweri woko,

kun ngat mo peke ma wok kato ki boti.

An dong abimiyo ibedo dit nakanaka,

jo me kare ducu bibedo ki yomcwiny piri.

16Ibigamo lonyo pa jo me rok ducu kacel ki lukergi.

Ka man bitime miyo ibingeyo ni An a Rwot, an aye ma lalari,

dok an aye ma akoko in,

an a Won Twero ma abedo Lubanga pa Yakobo.

17Abikelo jabu maka mola,

abikelo ryal, maka nyonyo,

abikelo mola maka bao,

abikelo nyonyo maka gweng.

Luloci pe dok biuni,

abimiyo gin bibedo kaloyo loc atir dok ki kuc bene.

18Tim me bwami pe dok biwinye i loboni,

kadi yak nyo kadi bale pa lobo pe binen iwang apoki loboni.

Abigwoki dok akani macalo cel;

ci ibipaka pien atyeko lari. 193

Ceng aye pe dok bimenyi dyeceng,

kadi dero me dwe bene aye pe bimenyi dyewor;

an Rwot aye ma abimenyi nakanaka,

an Lubangani aye ma abimiyo ibedo ki deyo.

20Kareni me kumu bigik woko;

an Rwot aye abibedo deroni ma rii nakanaka,

cengi pe dok bipoto, dweni bene pe birwenyo.

21Joni ducu dong gibibedo jo ma kitgi atir;

gibileyo lobo doko meggi matwal,

gibinen macalo jang yat ma an aye apito,

tic ma an kikoma aye atiyo wek dano gumiya deyo.

22Dogola pa joni tye manok ento olo dong bidoko kaka,

ngat matidi mada bidoko twon rok mo matek.

An a Rwot,

abimiyo man time oyot ka karene oromo.”