Icaya 62

1Pe abiling pi Cion,

pe bene abiywe pi Jerucalem,

nio kadong kityeko gonye woko ki icing jo ma une,

nio kadong larne ocaro piny calo dero mac ma menyo piny idyewor.

2Rok ducu bineno ka kigonyi woko ki icing jo ma giuni, in Jerucalem,

ki luker ducu gibineno deyoni;

dong kibilwongi ki nying manyen

ma Rwot kikome aye bicakone.

3Ibibedo calo lalukana me deyo matye i cing Rwot,

dok ibibedo macalo tok me ker ma nyutu loc pa Lubangani.

4Dong pe kibimede ki lwongi ni taun madit ma dong kibwoto woko,

loboni bene pe kibilwongo ni dako ma kiweko,

ento kibilwongi ni taun madit ma Lubanga cwinye yom ikome,

ci kibilwongo loboni ni dako ma kinyomo;

pien Rwot cwinye yom ikomi,

ci en bibedo macalo cwari.

5Kit macalo awobi nyomo nyako ma peya ongeyo laco,

kitmeno Ngat ma ocweyo in binyomi bene,

dok kit macalo lanyom cwinye bedo yom pi nyako ger,

Lubangani bene cwinye bibedo yom piri kitmeno.

6In Jerucalem, aketo lukurpiny iwi celi malo;

pe gibiling dyeceng ki dyewor benebene.

Wun jo ma poyo wi Rwot ikom cikene,

pe wuywe,

7dok bene pe wumiye kare me yweyo nio wang,

ma en dong omiyo Jerucalem ocung matek

ma dong omiyo odoko gin ma kipako iwi lobo ducu.

8Rwot dong otyeko cike matek tutwal,

en bicobo cikene ki twerone.

En owaco ni,

“Pe dok abimiyo lukwori gicamo kali,

lurok bene pe dok gibimato kongo bwinoni ma in iyele me tiyo tic pire.

9Ento jo ma gukayo kal gibicamo ci gipako iye Rwot,

ki jo ma gupwono olok gibimato kongo bwinone

idyekal me kabedona maleng.”

10Wuwok ki kunu, wuwok ki i dog cel,

wuyub yoo pi lwaka;

wutor yoo, wutor yoo gudu woko,

wucok gweng woko bene ki i yoo,

ka dong wuil bendera malo wek rok ducu gunge ni: 111

Rwot dong otyeko waco bot lwak ducu ma i lobo pi

tito bot jo Cion ni,

“Nen larewu dong tye kabino;

kun jo ma en olaro telo nyime,

ki mot me culu jo ma otiyo maber bote bene tye inyime.”

12Kibilwongogi ni gin rok maleng,

gin jo ma Rwot okokogi ki i can;

dok bene kibilwongo Jerucalem ni, “Taun madit ma Rwot omaro,

ma pe oweko woko ata.”