Icaya 21

Ginanyuta matito pi poto pa Babilon

1Man lok ma pire tek ma kitito ikom Babilon, ma en aye lobo matye i dog nam. Kit macalo yamo lapiru kodo mager kwede i Negeb, kitmeno bene can bibino kun a ki i tung kupiny, ki i lobo ma dano lworo tutwal. 2Lubanga onyutu bota lok mapek mada; layak gire yako jami pa dano ayaka, ngat ma balo lobo bene neko dano woko liweng ki i lobo.

In Elam, cit malo i lweny, ki in Media, dong irum taun maditi woko! Kit can ducu ma Babilon okelo abityeko woko, abimiyo gik woko licwic. 3Lanyut meno omiyo arem madwong oketo pyera woko, omiyo koma ducu rem mwode atata calo dako ma rem ki nywal; odiya woko piny ma dong pe miyo aromo winyo kit gin mo; poyo koma apoya, ma pe dong aromo neno gin mo. 4Tam dong oloya woko, lworo madit adada dong obalo wiya woko; ka abedo kaparo pi otyeno ma piny tye ribiribi; ento meno ducu kela myelkom keken. 5I ginanyuta aneno ni dong kiyubu meja woko, mukeka bene dong kipeto woko, gitye dong kacam kun gimato mat bene. Ci lawimony odange ni, “Wun rwodi wua malo, wuwir kom kwotwu ki moo!” 6Pien Rwot owaco bota kuman ni, “Cit ikel lakurpiny, myero otit gin ma en tye kanenone. 7Ka en bineno wegi aguragura ma giringo aryo aryo, jo ma iwi kana ki jo ma iwi kinaga, myero en ocik ite matek, dok onengi maber tutwal.” 8Ci lakurpiny odange ni, “Ai Rwot, acung iwi lubele malo dyeceng jwi, acung i kabedona bene dyewor benebene. 91

Nen wegi aguragura gitye karingo ki aryo aryo.” Cutcut gugamo doge ni, “Babilon dong opoto, opoto gire woko; cal jogi apaya ducu ma dano giworo kinginyogi woko piny.”

10Wun jona, ma kidinowu woko ka kipyetowu woko calo ngano, gin maber ma awinyo ki bot Rwot me mony, ma en Lubanga me Icrael en aye atito botwu.

Lok ma kitito ikom Edom

11Man lok ma pire tek ma kitito ikom Edom. Ngat mo tye kalwonga ki i Ceir, kun penya ni, “Lakurpiny, dyewor obedo ningning? Lakurpiny, dyewor obedo ningning?” 12Lakurpiny ogamo ni, “Piny dong oru woko, dyewor dok bidwogo. Kace wumito penya pire, ci wutwero dwogo dok ka penya; wutwero dwogo cen kany gire pi tyen me aryo.”

Lok ma gitito ikom lobo pa jo Arab

13Man lok ma pire tek ma kitito ikom lobo pa jo Arab. Wun jo Dedan ma wutye kamol ki kinagawuni, wubibutu idye okutu itim aroo matye i lobo pa jo Arab. 14Wumii pii amata bot jo ma orwo pii nekogi, wumii bene cam bot wuring ayela, wun jo ma wubedo i lobo Tema. 15Pien guringo pala lucwan, pala dong kiwoto woko ki i akura, ki atum ma kiketo iye atero ma dong kitelo woko, ki can mogo ma lweny kelo.

16Pien man aye lok ma Rwot owaca ni, “Dong odong mwaka acel keken, calo kit ma lapakaca kwano ki mwaka me tice, ci deyo me Kedar ducu bidoko ginacaya. 17Jo me Kedar ma gin oteka ma gibidong ki ikin jo ma celo atero, welgi bibedo nok; pien an Rwot Lubanga pa jo Icrael dong aloko man.”