Icaya 22

Kwena ma mako Jerucalem

1Man lok ma pire tek ma kitito ikom nota me ginanyuta ma Lubanga onyutu bot Icaya. Gin ango matye katime ma oweko wun ducu wutye iwi odiwu kakwero karama? 2Pingo dano ducu ma i taun madit gitye ka dange ki woo me yomcwiny? Jowu ma guto i lweny ca, pe kinekogi ki pala lucwan, pe bene kinekogi i lweny kadi ki acel. 3Lulocwu ducu onongo dong guringo woko kacel, kinguku makogi woko ma peya gulwenyo. Jo ducu ma kinongogi kimakogi woko, kadi bed jo mogo ikin gi guringo kamabor tutwal. 4Ma omiyo awaco ni, “Wulok wangwu cen, pe wunena, wuwek akok matek pi cwercwiny ma atye kwede. Ngat mo pe oyele ka kweyo cwinya, pien jona ma kinekogi pol tutwal.”

5Pien Rwot Lubanga me mony tye ki ninone, ma ninone obedo nino me woo, ki me nyono dano woko piny, ki nino me bango dano ducu i lung me ginanyuta, ma en aye bene nino me muku cel me gang woko dok dano bikok ki iye atata ki ikin godi. 6Mony ma oa ki i Elam gubino ma gingweco iwi aguragura kun gungabo juru aterogi dong angaba, ki mony ma oa ki i Kir dong gitye ma gutere woko ki kwotgi. 7Nota ma miu ma ceko cam me Judaya gupong ki gadigadi lweny keken, dok wegi aguragura gitye gucung woko i dog cel me Jerucalem. 8Gin mayam jo Juda gigengo ki komgi dong orwenyo woko.

Inino meno wucito wukelo jami lweny matye i Ot me Bunga.1 9Wuneno kit ma kimuku kwede cel me gangkal pa Daudi, dok wunongo kit me jolo pii piny i ngom i joro. 10Wukwano odi ducu ki i Jerucalem, ka wureto odi mogo woko piny wek wunong gweng me gero cel matek. 11Wukwinyo bene joro me pii ikin cel aryo me jolo pii me joro macon. Ento yam pe wutamo pi Lubanga ma oyubu loki wacon, dok ma oweko otime kit menoni.

12Inino meno Rwot Lubanga me mony onongo owaciwu ni wukok dok wukum, ni wulyel yer wiwu ki ni wuruk bene bongo cola. 132 Ento wun doki wubedo kanyero ki yomcwiny, wuneko twoni dyangi ki romi ma pe wace, wucamo ringo dok wumato kongo bwino. Wuwaco ni, “Wek wacamu cam, dok wamatu mat bene, pien diki wabito woko.” 14Rwot me mony onyute kene bota kun waco ni, “Adada, pe kibitimo kica botgi pi bal man, nio wang ma guto. Man lok ma an Rwot Lubanga me mony aye awaco.”

Lok ma kiciko ki Cebna

15Rwot Lubanga me mony owaco ni, “Bin icit bot Cebna ma lakan jami, ma en aye lalo jami ma i ot pa rwot, cit ipenye ni, 16‘Tic ango ma itiyo kany? Dok angagi ma obedo wadini kany ma omiyo itye ka golo bur lyeli kekeni kun itongo lyeli iwi got malo? 17Nen, Rwot bikwanyi ki tek ci boli woko cen, kadi bed onongo nene ibedo dano mo matek tutwal. En bimaki woko matek liking, 18ci lungi woko adunu calo odilo ka boli woko cen i lobo mo malac mada. Ibito kunu inget gadigadini ma onongo inyate kwede tutwali. In giri ma ikelo lewic i ot pa laditi. 19Abikwanyi woko ki i dog tici, ci adwoki woko cen i rwom mapiny.’

20Inino meno ka man dong otime, abilwongo latica Eliakim wod pa Ilkia, 21ci abimiyo en aye ruku bongini me tic, ki del me tweyo pyer, ki kitambara me tweyo wic; tweroni ducu abidwoko i cinge. En bibedo calo wego bot jo Jerucalem ki jo Juda. 223Abimiyo twero ducu me ot pa Daudi bedo i wiye. Abimiye layab me loro dogola, ma ka en oloro, ci ngat mo pe dok twero yabone; dok ka oyabo, ngat mo pe twero lorone. 23Abimiyo en bedo tek calo teke ma kiguro matek, jo me ot pa wone ducu binongo deyo pire.

24Jo me ot pa wone ki wadine ducu bibedo ter mapek tutwal i wiye. Gin ducu gibingabe ikome calo kikopo ki cupa ma kingabo malo. 25Ka man bitime inino meno, ci teke mayam kiguro mateki biyogge woko doko yogoyogo poto woko piny. Meno aye bibedo agiki pa jami ducu mayam gungabe ikome.” Man lok ma Rwot dong otyeko waco.