Icaya 23

Lok ma kitito ikom Turo ki Cidon

11

Man lok ma pire tek ma kitito ikom Turo. Wukok ba, wun lukwang mel ma wutye idye nam, pien Turo dong kibalo woko, odi ki wang wat dong kibalo woko. Lukwang mel gungeyo loke ikare ma gidwogo ki i Caiprac. 2Wukum, wun jo ma wubedo i dog nam, wun lucatwil me Cidon. Lukwenawu yam gungolo nam, gukwang iwi pii madwong adada 3kawilo kal me Cikor, ma dongo i dog kulu me Nail. In onongo yam ibedo lacatwil ma cato wil i rok mapol. 4Lewic myero omaki, in Cidon, pien nam dong oloko, ki cel gogo matek me dog nam bene owaco ni, “Arem me nywal pe ocana gire, pe bene anywal, pe bene apito lutino mo ma gudongo, lutino awobe nyo kadi wa lutino anyira.”

5Ka lok man biwinye i Ejipt, ci cwiny dano bicwer matek tutwal pi winyo lok ikom Turo.

6Wukat wucit wa i Tarcic, wucit wukoki, wun jo ma wubedo i dog nam! 7Man taun madit mayam dano tye iye ki yomcwiny madwong, taun madit mayam ocake con tutwal, en aye taun madit mayam ocwalo lukwenane gungolo nam, me cito kabedo i lobo mogo mukene. 8Anga ma oyubu lok man ikom Turo, taun madit ma won lalukana me loc, ma lucatwile yam gubedo lutino ker, ma gin jo ma kiworogi adada i lobo? 9Rwot me mony aye ma onongo oyubu, pi giko wakegi me deyo woko ducu, dok me kelo lewic ikom jo me lobo ducu mayam giketo deyo ikomgi. 10Wudok cen i lobowu, wun jo me Tarcic; pien wang wat me Turo dong peke. 11Rwot dong oryeyo cinge woko iwi nam, en bene dong otyeko yengo ker ducu; Rwot dong otyeko miyo cik ikom Kanaan, ni myero kitur cel gogone mateki woko. 12Rwot Lubanga owaco ni, “Yomcwiny mayam wutye kwede dong ogik, wun jo Cidon; kombedi dong kidiyowu woko matek, ma kadi bed wukat i Caiprac, kunu bene pe wubinongo kayweyo.”

13Kong wunen lobo pa jo Kaldaya! Gin aye rok ma onongo gumoko ni Turo bibedo kabedo pa lee tim, ento pe jo Aciria. Gin aye ma gutado lubele ma gucudu malo likung kunu, ka dok gumuku odi madito woko ducu ki kunu, ci gumiyo odoko wi obur.

14Wukoki, wun lukwang mel ma wutye idye nam, pien taunwu madit mayam wugeno dong kiketo woko.

15Ikare meno wi dano biwil woko ikom jo Turo pi mwaka pyere abiro kulu, marom aroma ki kare me kwo pa rwot acel. Ka mwaka pyere abiro dong otum, ci Turo bibedo calo malaya ma kiwero pire ni,

16“Kwany opuk agoya, icit kwede idye taun,

in dako ma malaya ma wi dano owil woko i komini!

Mi dwon opuk okok ma winye mamit,

wer bene wer mapol,

wek dano gucak po piri.”

17Ka mwaka pyere abiro dong otum, Rwot dok biweko Turo dok i dog tice. En dok bitic calo malaya ki ker ducu ma iwi lobo. 18Magoba ducu ma en binongo i cato wile meno, pe bigwoko, pe bene bikano mo kadi matidi mo, ento bityero woko me bedo gin maleng bot Rwot, ci kibiwilo ki cam mabup ki bongi mabeco pi jo ma woro Rwot.