Icaya 24

Rwot biketo can ikom lobo

1Nen, Rwot biweko lobo dong nono, bimiyo doko obur, dok en biloko lobo bedo okani, ci keyo dano woko ma bedo iye. 2Ikare meno can ma bipoto ikom ajwaka bibedo rom ki can ma poto ikom dano ata; can ma bipoto ikom opii bibedo rom ki can ma poto ikom ladite; can pa angeca bene bibedo rom ki can pa mego ma en tiyo bote; can pa lacatwil bibedo rom ki can pa lawilwil; can pa lamii banya bibedo rom ki can pa laden banya; can pa ngat ma pido banya bibedo rom ki pa ngat matye ki banya. 3Lobo kibibalone woko, ci kibiyako jami matye iye woko ducu. Man lok pa Rwot kikome.

4Lobo tye kakumu, tekone bene orwenyo woko, iwi lobo ducu piny obale woko, teko pa lobo orwenyo woko, polo ducu dong onyonge woko. 5Lobo dong obale gire woko inyim Lubanga, pi jo ma bedo iye; pien dano dong guturu cik pa Lubanga woko, pe gulubu gin mayam en ociko, guturu bene wa gicike ma rii nakanakani woko. 6Pimeno Lubanga oceno lobo woko, jo ma bedo iye gitye kaneno can iye pi balgi; meno omiyo jo ma i lobo gitye kaneno can, jo manoknok keken aye gudong. 7Olok kikome bene dong oner woko, kongo bwino tye kadoko nok, jo ducu mayam cwinygi yom gitye kacur acura. 8Ajaa agoya ma kok malongo pi yomo cwiny dano dong oling woko, woo pa jo ma dange ki yomcwiny madwong dong oling woko, yomcwiny mo mamiyo dano goyo opuk bene dong peke. 9Dano pe dok mato kongo bwino ki wer idoggi kit mayam con; lumat kongo dong nongo kongo kec idoggi marac. 10Jami ma i taun madit ducu dong onyobe woko atata, odi ducu matye i taun madit meno kiloro doggi woko wek dano pe gudony i iye. 11Dano tye ka dange ki koko pi kongo bwino ma dong orwenyo woko; kit yomcwiny mayam gitye kwede dong ogik woko, yomcwiny mo dong peke i lobo. 12Taun madit dong kiweko odoko obur, dog cel bene kituru woko, ci kingido matinotino. 13Bitime kitmeno ikin lurok ma gibedo iwi lobo, bibedo calo yaa ma dong kipwono nyige woko, nyo macalo olok ma dong kikoro nyige woko. 14Jo ma bibwot biilo dwon gi malo kun giwero wer me yomcwiny; woo ma gibidange kwede pi dit pa Rwot biwinye wa tung kupotoceng. 15Pimeno wun jo ma wutye kunyango, wubimiyo deyo bot Rwot; ki wun jo ma wubedo i dog nam, wubimiyo deyo i nying Rwot me Icrael. 16Cake ki kamabor ma iwi lobo wabiwinyo dano biwero wer me pako Rwot ma en Ngat ma kite atir!

Ento an gen mo peke pira! Ajony ningok, ajony ningok, can iwiya gira! Pien jo ma luroro dong gutany woko ki lok rorogi ikom dano, pi lok rorogini omiyo gidoto dano marac tutwal. 17Lworo, bur, ki owic, bimakowu, wun jo ma wubedo i lobo. 18Ngat ma biringo woo ma kelo lworo, bipoto woko i bur; kace bikati woko ki i bur, ci bimoko i owic. Pien polo dong biyabe woko, ci guti me te lobo bene biyenge. 19Lobo dong bibale woko, lobo dong bibar woko idyere, lobo biyenge matek tutwal. 20Lobo dong bitage calo lamero kongo, biyenge calo ot aduc; bale dong dwong, onure woko, orete woko piny ma pe dok twero a malo. 21Ikare meno Rwot biketo can ikom mony me polo, ki i polo kunu, ki i lobo kany, ikom luker me lobo. 22Lubanga bicoko rwodi ducu kacel calo mabuc ma i bur, ci biloro wigi woko i ot buc, ka dong kicako keto can ikomgi ma nongo dong kong kare okato malac. 23Alee bitwodo dwe woko, lewic bene bimako ceng; pien Rwot me mony aye bibedo rwot iwi Cion, ki i Jerucalem, binyutu deyone inyim ludongone.