Icaya 25

Wer me pak

1Ai Rwot, in aye Lubangana;

abidwori dok abipako nyingi,

pien dong itiyo jami me aura tutwal,

dok icobo gin mayam iyubu con, ki gen ki ada.

2Iloko taun madito odoko obur;

kadi wa taun madito ducu mayam kirumugi ki cel matek;

odi pa lurok bene gudoko obur;

pe dok kibigero gedo mukene kakare.

3Meno bimiyo lwak rok matego giketo deyo ikomi;

taun madito ducu pa lurok ma kica peke iye gibilwori.

4Pien in aye kabedo matek ma lucan giringo laro iye,

in i cel gogo matek kama jo ma piny obwoyogi bene giringo laro iye,

in aye kama dano gwoko iye yamo kot ki lyeto me ceng.

Pien aluu yweyo dog dano ma gin pe lukica

obedo calo yamo kot ma kodo kun pyeto kot wa i kor cel,

5nyo calo lyeto ka piny dong otwo.

Dong ijuku woo pa lukwor woko,

macalo tipu pol ma kweyo lyeto;

meno omiyo jo ma pe lukica dong guling,

pe dok giwero wer.

Lubanga oyubu karama

6Rwot me mony bitedo karama pi rok ducu iwi got Cion, karama ma kicamo iye ringo makur, ki mato kongo bwino ma ocek mamit adada, ki ringo ma miu, ma moo ma i cogo dwong ata, ki kongo bwino ma kiliyo woko maber ka dong ocek mamit adada. 7Dok iwi got man, Rwot biyeco bongo me cwercwiny ma kiumu ki rok woko ducu, ma gubedo karukune ikare me kwero cola. 81Rwot Lubanga dong bimwonyo to woko matwal, dok en bidunyo pig wang dano woko ducu, ci bikwanyo lewic woko ki iwi jone inyim jo ducu ma iwi lobo; pien man lok ma Rwot aye owaco.

9Inino meno kibiwaco ni, “Nen, man aye Lubangawa ma wabedo ka kurune pi larowa. Man aye Rwot ma wabedo ka kuruneni. Wabedu dong ki yomcwiny pi kit ma en olarowa kwede.”

Lubanga bipwodo Moab

102

Cing Rwot bigwoko got Cion, ento Moab mere kibinyono woko piny i kabedone, kit macalo kinyono kwede reng kal i bur ma kionyo iye cet dyang. 11Jo Moab biryeyo badgi idyere kit ma dano mo matye ka kwang ryeyo kwede bade me kwang; ento Rwot bimiyo wakegi gik woko kacel ki dito ma gitye kwede. 12Celgi ma gugero ma ocudu malo likungi kibireto woko piny, kibicoro kireto woko piny wa i apwa.