Icaya 26

Lubanga bimiyo loc ki jone

1Inino meno kibiwero wer man i lobo Juda ni,

“Watye ki taun madit matek adada!

Lubanga kikome aye ma gwoke,

calo cel ma ogure orume woko dyere.

2Wuyab dog cel woko,

wek rok ma kitgi atir,

ma gigene, gudony iye.

3Ngat ma tame tye ikomi,

imiyo en bedo ki kuc me ada,

pien nongo en geni.

4Wugen Rwot nakanaka,

pien Rwot Lubanga aye ma bigwokowa kare ducu.

5Pien dong odwoko woko piny

jo mayam giwake.

Taun madit mayam gibedo iye ma ocudu malo likung en ocoro oreto woko piny i apwa.

6Jo mayam kidiyogi piny dong ginyono ki tyen gi,

lucan ma onongo piny obwoyogi dong giwoto ki tyen gi iwiye.

7Yo pa dano ma kite atir bedo apyel, cere peke iye;

in lakite atir aye ma iyubu.

8Ai Rwot, wan walubu mitini

dok waketo genwa ikomi;

cwinywa bene mito dworo in keken.

9Aparo piri dyewor,

tipuna matye iiya puk odiko con ka yenyi.

Pien ka ingolo kop i lobo,

ci jo ma bedo iye gipwonyo kit ma atir.

10Dano marac kadi bed kitime gin maber,

pe twero pwonye me bedo dano ma kite atir;

bedo mere katimo tim mogo ma pe tye atir i lobo pa dano ma cwinygi atir,

kun pe neno dit pa Rwot. 111

Ai Rwot, badi tye otinge malo me pwodogi,

ento lukwori pe gineno.

Mii lewic omakgi, ai Rwot.

Mii gunen kit ma imaro kwede joni;

cwal dong mac ma iyubu pi jo macalo meno wek otyekgi woko.

12Ai Rwot, ibimiyo wabedo ki kuc,

pien ticwa ducu in aye ma itiyo pirwa.

13Ai Rwot Lubangawa,

rwodi mukene ma pe in yam guloyowa,

ento in keni aye i Rwotwa.

14Gin dong guto woko, pe dok gibibedo kwo!

Dong gudoko tipu, pe dok gitwero a malo,

pien in imiyo ki gin pwod ci ityekogi woko,

imiyo wi dano bene dong owil woko ikomgi.

15Ento dong imiyo rokwa onya, ai Rwot,

in dong imiyo rokwa man onya, deyo obed boti;

imedo wang lobowa bene odoko malac.

16Ai Rwot, wan wabedo ka legi ikare ma watye i can,

ikare ma iketo can ikomwa, wan wabedo kayenyi.

17Wabedo calo dako matye ki arem me nywal,

ma twenye atwenya ki koko pi arem ma en tye kwede;

wan bene yam wabedo kitmeno inyimi, ai Rwot.

18Wan wabedo ki arem calo me nywal,

ento maka nywalo latin dano pe dong wanywalo gin mo.

Pe tye loc mo ma wan waloyo pi lobowa,

pe watye ki likwayowa me leyo katyenwa. 192

Joni mayam dong guto woko, pud dok gibibedo kwo,

komgi mutoni dok bicer.

Wun jo ma wubedo i apwa, wuco woko

wek wuwer wer pi yomcwiny!

Macalo toyo aye kweyo lobo,

kitmeno Rwot bimiyo kwo ki jo mayam dong guto woko.

20Wubin, wun jona, wudony i kicikawu,

ka wulor dogola woko;

kong wukane kunu pi kare mo manoknok,

nio ka akemo pa Rwot dong okato.

21Pien nen, Rwot tye kabino kun a ki i kabedone

pi keto can ikom jo ma bedo i lobo pi balgi;

remo ma dong oo i lobo binen woko kamaleng,

lobo bene pe dong bikano kom jo ma oto.”