Icaya 27

Laro jo Icrael ki cokogi kacel

11

Inino meno, Rwot biketo can ikom Leviatan, ma en aye twol ma ngeyo pange tutwal me laro kwone. Rwot biketo can ikome ki twon pala lucwane matek, mabit mada, dok bineko min kulu ma bedo i nam. 2Inino meno, Rwot biwaco ni, “Wuwer wer ikom poto olok ma yomo cwiny, 3ma an Rwot aye agwoko; dok aonyo pii iye kare ducu. Agwoko dyeceng ki dyewor, wek ngat mo pe obal woko. 4An pe atye ki akemo ikom poto olok. Ka kono nene okutu ki ocok tye iye, kono acito alwenyo kwedgi, ka awangogi woko ducu liweng. 5Ento ka lukwora gularo bota ni akonygi, ci myero gucike me bedo kweda ki kuc, adada, myero gucike me bedo kweda ki kuc.” 6Ikare ma bino anyim Yakobo bicomo lwite i ngom, Icrael bituru, dok binyak, ci nyige bipongo lobo ducu.

7Rwot mono yam ojwero Icrael woko lirwatrwat kit ma kijwero ki lukworgi mayam gujwero jo Icraeli? Nyo onekogi woko bene kit macalo en oneko ki jo ma onekogi ca? 8Ai Rwot, yam ipwodogi, ka iryemogi woko, kun ikutugi ki yamo dogi me terogi woko cen i opii, kit ma yamo oro kodo kwede. 9Man bimiyo igonyo Yakobo woko ki i bale, dok man aye bibedo adwogi me kwanyo bale; en biloko godi ducu me keno tyer doko calo gweng ma kiodo woko mapwot, kun Acera ma jok ma dako nyo keno tyer me wango odok eceta pe dok bibedo tye ma ocung.

10Gang me cel gogo dong kiweko odong obur, kabedone dong kiweko odong nono calo tim ata; roci dyang gicamo lum kunu, gibutu ki kunu kun gijwero pot oboke woko ducu wa ki i jang yadi. 11Ikare ma jang yadi dong otwo woko, ci gicako turune woko; mon tongo woko me yen tedo. Pien gubedo rok ma pe niang, oweko Lubanga ma ocweyogi kica mo pe bimake ikomgi wa ki acel, en pe bitimogi maber.

12Ikare meno Rwot bidino ngano cake ki i kulu Euprate nio kwede wa i kulu me Ejipt; Rwot bicokowu woko kacel wun jo Icrael. 13Dok bene inino meno, kibikutu iye tum madit mada, ka dong bimiyo jo mayam onongo gurwenyo woko i lobo Aciria, ki mukene ma onongo kiryemogi gucito i lobo Ejipt, gibidwogo cen ka woro Rwot iwi gote maleng, i Jerucalem.