Icaya 28

Rwot ociko lutela me lobo Epraim

1Ibineno can in lobo Epraim ma itye ki awaka! Deyoni dong tye kaner woko calo lalukana me ature matye iwi lutelani ma gin lumeroni. Gin giwiro wigi ma opong ki awakani ki moo makur ento kadibed kumeno, gin gibutu calo jo ma oto pien gumer woko ki kongo bwino. 2Nen, Rwot tye ki dano mo matek matye ki twero; macalo yamo kot ma kote tye kacwer ki pee, yamo ma balo piny woko abala, dok macalo yamo kot madit tutwal, ma piine mol lak woko ata, en bireto dano woko piny ki tek kitmeno. 3Tok me wake pa lumero me lobo Epraim kibinyono woko piny ki tyen; 4ki ature me deyone mamwonya madani, ma en aye deyo ma ner woko, matye malo inget kulu ma ceko cam tutwal bibedo marom aroma ki nyig oduru mukwongo cek, ma ngolo kare me oro nongo peya oo; dano ka oneno, ruyu camone oyotoyot teke ka oo i cinge.

5Inino meno Rwot me mony bibedo macalo lalukana me deyo maber tutwal bot jone ma gudong. 6En aye bimiyo bot lungolkop cwiny me ngolo kop atir, ci bimiyo keru bot acikari ma gijuku jo ma gioto lweny ikom taun madit.

Icaya ki lunebi me Juda ma lumero

7Ajwaki ki lunebi bene dong gipange apanga ki wot pi kongo bwino makec, gitage ki wot pien gumato kongo bwino makec mada. Wigi dong pe niang ginanyuta ma Lubanga tye ka nyutu botgi maber, oweko pe gingolo kop kakare. 8Wi meja ducu, ka ma gibedo iye, opong ki ngok keken, pe tye kabedo mo maleng ki iwi meja.

9Gin giwaco lok i koma ni, “En bipwonyo anga doki? En dok bitito loke bot anga? Bot lutino ma pud kigengogi agenga dot bo? En tamo ni wan wabedo lutino ma pud kikwanyo doggi akwanya ki i dog tunu bo? 10En temo pwonyowa nukuta ki nukuta, tyeng ki tyeng, wi lok ki wi lok.” 111

Ka pe wuromo winyo loka, ci Rwot dong bilok ki wun ki leb pa jo ma dumu aduma, ki leb pa jo ma gin welo. 12Lubanga yam omiyo botwu yweyo, ento wun giwu wukwero winyo loke woko. 13Pimeno Rwot bipwonyowu nukuta ki nukuta, tyeng ki tyeng, wi lok ki wi lok. Wek wudok wupot woko ki tung ngewu, ci wutur woko, kibicikowu ki owic ci kimakwu wudoko mabuc. 14Pimeno wuwiny lok pa Rwot, wun lungala ma wutye kaloyo rok man i Jerucalem! 15Pien wun wuwaco ni dong wutyeko cike woko ki to, dok bene dong wuporo lok woko kacel ki lyel; wugeno atir ni ka can madit tutwal owok ki ikinwu, pe bigudu komwu gire pien dong wuloko goba odoko kalarewu, dok wukane woko ilok ma pe ada. 162Pimeno omiyo Rwot Lubanga owaco ni, “Nen, dong aketo got me wel i Cion got ma kitemo ma okati woko dong maber, ma en aye bibedo acaki me teguti; ngat ma ye pe bibedo ki lworo mo ma bange woko. 17Abiloko ngolo kop atir doko tol me pimo ot, kun kit ma atir bedo birigi.”

Pee bimolo kalarewu ma opong ki gobani woko, pii bene bipong woko libyeny i kakanewu. 18Meno bimiyo cikewu ma wucike ki to tur woko, ki lok ma wuporo kacel ki lyel bene pe bicung; dok ka can madit biwok ki ikinwu, can meno bigoyowu bimiyo wupwode piny lirat. 19Kare ducu ma can meno biwok ki ikinwu, ci bigoyowu, pien biwok dyeceng ki dyewor nino ki nino; dong niang ilok meno bikelo lworo madit tutwal. 20Pien bibedo rom ki dano ma otemo butu i kitanda macek, kun ume ki gium ma pe rome kadi ki acel. 213Pien Rwot bia malo macalo yam kong otimo iwi got Perajim, akemo bimake kit macalo yam kong omake kwede i lung me Gibeon, pi cobo tice, ento tice dok pat tutwal ba! Pi cobo tice ento tice ma okani!

22Kombedi dong wuwek ngala obedi, wek pe gitwewu dok matek tutwal; pien awinyo ka Rwot Lubanga me mony ociko pi tyeko lobo woko ducu.

23Wucik itwu, wuwiny dwona; wuter itwu, wuwiny loka. 24Ngat ma puru potone me coyo iye kodi, bedo ka purune nakanaka ma pe giko purune bo? Itamo ni en bedo ka boto poto ki lokone nakanaka? 25Itamo ni ka dong otyeko tengone maber, ci pe en coyo iye toki, okwer, ka dok pito iye ngano i tyeng, ki cayiri bene kakare, malube ki wanga cor me potone? 26Pien Lubangane pwonye maber, kun niange bene maber kit ma myero en otii kwede. 27Toki mere pe kidino ki yat me dino bel, okwer bene pe kiloro tyen gadigadi iye; toki gire kitengo atenga ki odoo, ento okwer kityero atyera ki kidi me tyerone. 28Kal kwon bene kidino adina, ento pe kidino matek tutwal ma kityero nyige woko. Aguragura ywayo tyen gadigadi wok ki iye, ento pe tyero nyige gire. 29Man ducu oa ki bot Rwot me mony, en Rwot ma kiuru imiyo tam, dok ryekone dit ma pe wace.